37 ¹ Sedekaia pikinini man bilong Josaia i stap olsem king long ples bilong Jehoiakin pikinini man bilong Jeoiakim. Nebukanesa king bilong Babilon i mekim Sedekaia i kamap king bilong ol lain Juda. ² Tasol Sedekaia na ol wokman bilong em na olgeta manmeri bilong ol lain Juda i no harim tok bilong God Yawe olsem em i tok long maus bilong profet Jeremaia. ³ Olsem na Sedekaia na Jehukal, pikinini man bilong Selemaia na Sefanaia, pikinini man bilong pris Maseia i salim tok i go long profet Jeremaia. Na ol i tokim em olsem, "Kisim ples bilong mipela na yu beten i go long God Yawe, God bilong mipela." ⁴ Jeremaia i go i kam long ol manmeri long taim em i no go long kalabus yet. ⁵ Taim ol ami bilong Fero i kam autsait long Isip na ol Kaldia husait i banisim ol lain Jerusalem i harim dispela tok, ol i lusim ol lain Jerusalem. ⁶ Na tok bilong God i kam long maus bilong profet Jeremaia na i tok olsem, ⁷ "God Yawe, God bilong ol Israel i tok olsem. Yupela i mas tok olsem long king bilong ol Juda long wanem em salim yu long kisim sampela gutpela tingting long mi, "Lukim ol lain ami bilong Fero i kam long helpim yu i laik go bek long graun bilong ol long Isip. ⁸ Ol lain ami bilong Kaldia bai i kam bek long pait wantaim dispela biktaun, ol bai bagarapim na kukim olgeta samting i stap long dispela taun." ⁹ God Yawe i tok osem, no ken giamanim yupela yet long tok olsem, 'Tru, ol lain ami bilong Kaldia i lusim mipela,' tasol ol bai i no inap lusim yupela na i go. ¹⁰ Maski sapos yupela i winim olgeta lain ami bilong ol Kaldia i pait wantaim yupela, tasol ol lain i kisim bagarap na i stap long haus sel bilong ol, dispela lain tasol tu bai i kirap na kukim dispela biktaun. ¹¹ Olsem tasol ol ami bilong Kaldia i lusim Jerusalem long taim ol lain ami bilong Fero i kam, ¹² orait, Jeremaia i go autsait long Jerusalem na i go long graun bilong ol lain Bensamin. Em i laik kisim hap bilong dispela graun olsem graun bilong ol lain bilong em. ¹³ Taim em i kamap long Bensamin geit, bos bilong ol soldia i stap long hap. Nem bilong en em Irisa, pikinini man bilong Selemaia na tumbuna pikinini man bilong Hananaia. Na em i holim pasim profet Jeremaia na i tok olsem, "Yu laik lusim mipela na go long ol Kaldia." ¹⁴ Tasol Jeremaia i tok, "Em i no tru. Mi no lusim yupela na i go long ol soldia bilong Kaldia." Tasol Irisa i no harim tok bilong em. Na em i kisim Jeremaia i go long ol ofisa bilong king. ¹⁵ Tasol ol ofisa i belhat long Jeremaia. Na ol i paitim em na putim em long kalabus, long olpela haus bilong kuskus Jonathan em ol i mekim olsem haus kalabus. ¹⁶ Olsem na ol i putim Jeremaia long kalabus aninit long graun na em i stap inap planti dei. ¹⁷ Na king Sedekaia i salim sampela lain long kisim em i kam long haus bilong king. Insait long haus bilong em i nogat man na king i askim em olsem, "I gat sampela tok i kam long God Yawe o?" Na Jeremaia i bekim tok bilong em olsem, "I gat tok i stap. Yu bai i go long han bilong king bilong Babilon." ¹⁸ Na Jeremaia i tokim king Sedekaia olsem, "Mi mekim wanem kain ron long yu na ol wokman bilong yu na ol dispela manmeri bilong yu na yu putim mi long kalabus? ¹⁹ Ol profet bilong yu i stap we, ol dispela lain husait i tok profet olsem king bilong Babilon bai i no inap kam pait long yu wantaim ol manmeri bilong yu? ²⁰ Tasol harim, bosman bilong mi king! Larim bel isi bilong yu i stap long mi. Na no ken salim mi go long haus bilong Jonathan dispela kuskus, long wanem bai mi dai long hap." ²¹ Olsem na king Sedekaia i putim wanpela lo olsem, ol wokman bilong em i mas lukautim Jeremaia long banis bilong haus king. Ol lain i save kukim bret i save givim em bret olgeta dei long kaikai, inap olgeta bret long biktaun i pinis. Olsem na Jeremaia i stap yet long banis bilong haus king.