30 ¹ Tok i kam long God Yawe i go long Jeremaia i olsem, ² "God Yawe bilong ol Israel i tok olsem, 'Yu raitim olgeta tok mi tokim yu i go insait long skrol buk. ³ Harim gut, God Yawe i tokaut long ol dei i wok long kam,long dispela taim mi bai mekim olgeta samting i kamap gutpela long ol manmeri bilong mi, Israel na Juda. Mi bai kisim ol i kam bek long graun mi bin givim long ol lain tumbuna bilong ol na ol bai i stap long en. Mi God Yawe i mekim dispela tok. ⁴ Dispela toktok God Yawe i tokim i go long ol Israel na Juda, ⁵ "Orait God Yawe i tok olsem, 'Mipela i harim krai bilong ol man i stap long bikpela hevi na nogat gutpela sindaun. ⁶ Yu skelim dispela, em orait sapos wanpela man i karim pikinin. Bilong wanem mi lukim olgeta yangpela man wantaim han bilong ol i stap sait long mit bilong ol i olsem meri i laik karim pikinini? Bilong wanem pes bilong ol i save senis? ⁷ Lukaut, narapela kain taim bai i kam i no wan kain olsem nau, ol Israel bai i go insait long bikpela hevi long dispela taim tasol em bai i helpim ol. ⁸ Long dispela taim, God Yawe bai i tokaut olsem, "Mi bai rausim olgeta hevi i karamapim yupela na bai mi brukim sen i kalabusim yupela na yupela bai i no inap stap long kalabus gen . ⁹ Tasol ol bai lotuim God Yawe bilong ol, na stap aninit long Devit husat mi bai mekim em kamap king bilong ol. ¹⁰ God Yawe i tokaut olsem, yupela Israel wokman bilong mi, yupela no ken pret na tingting planti. Harim gut, mi bai kisim yupela i kam bek long narapela ples na mi bai kisim ol pikinini lain bilong yupela i kam aut long ples yupela i stap olsem kalabus. Ol Israel bai kam bek gen na sindaun gut na em bai nogat hevi na pasin bilong pret. ¹¹ God Yawe i tokaut gen olsem, Mi stap wantaim yupela long helpim yupela, mi bai bagarapim olgeta kantri mi bin rausim yupela i go stap long en. Tasol mi bai i no inap bagarapim yupela. Mi bai stretim pasin bilong yupela long stap gut na mi no inap larim yupela i stap gut taim yupela i mekim pasin nogut gen. ¹² God Yawe i tok olsem, 'Bikpela bagarap yupela i bin kisim i no inap long pinis na i kamap olsem sua i no inap long drai. ¹³ I no gat wanpela man inap long helpim yupela na wanpela samting i inap long oraitim yupela. ¹⁴ Ol kantri yupela i save bihainim tok bilong ol i lusim tingting long yupela. Ol i les long kamap wantok bilong yupela, long wanem mi bin givim bagarap long yupela olsem ol birua bilong yupela inap long givim dispela bagarap. Mi bin mekim olsem long stretim pasin bilong yupela, taim yupela i stap aninit long ol man nogut. Long wanem yupela i mekim planti pasin nogut. ¹⁵ Bilong wanem yupela i singaut long mi bai helpim yupela long taim yupela i kisim bagarap? Dispela pen bilong yupela i no inap long pinis. Bilong wanem pasin nogut bilong yupela i go bikpela tru, olsem na mi bin mekim dispela samting i kamap long yupela. ¹⁶ Ol man husait i bagarapim yupela, mi bai bagarapim ol na ol birua bilong yupela bai i go i stap olsem ol kalabus man long narapela kantri. Ol man husat ol bin kisim ol samting bilong yupela, long wankain pasin, mi bai mekim ol man bai kisim samting bilong ol. ¹⁷ God Yawe i tok, mi bai stretim olgeta hevi bilong yupela na mi bai mekim yupela i kamap orait gen. Mi bai mekim olsem, long wanem ol man i givim beksat long yupela na no gat wanpela man i luksave long ol man bilong Saion. ¹⁸ God Yawe i tok olsem, "Harim, mi redi long kisim ol gutpela samting i kam long yupela pikinini lain bilong Jekop long wanem mi sori long ol. Ol bai mekim wanpela biktaun long hap ol bikpela bagarap i bin kamap na strongpela banis bai stap gen. ¹⁹ Orait ol bai i singaut wantaim amamas na singim song long litimapim nem bilong mi. Mi bai putim ol i go antap na mi i no inap long daunim ol. Mi bai givim biknem long ol na ol man bai i no inap long putim ol i go daunim. ²⁰ Orait ol manmeri bilong ol bai i stap gut olsem bipo. Ol bai i kam bung wantaim long lotuim mi na mi bai givim hevi long ol man husat i mekim nogut long ol. ²¹ God Yawe i tok olsem, 'Wanpela bai i kamap king namel long ol. Em bai kam aut long ol man Israel taim mi singautim em, em bai i kam klostu long mi long lotuim mi sapos mi no mekim olsem ol manmeri bai i no inap kam klostu long mi, husat gen bai i kam klostu long mi? ²² Orait yu bai i stap lain manmeri bilong mi na bai mi i stap God bilong yu. ²³ Yupela i mas was gut, dispela em soim bel hevi na belhat bilong God Yawe na em bai i no inap pinis. Dispela belhat bilong em bai i kam olsem bikpela win na bagarapim ol bikhet manmeri. ²⁴ Belhat bilong God Yawe bai i no inap pinis. Em bai i stap inap olgeta samting i kamap bihainim tingting bilong em. Long las dei yupela bai save gut long ol dispela samting."