28 ¹ Long namba 4 yia bilong king Sedekaia i stap king bilong Juda, long namba 5 mun, Ananaia pikinini man bilong profet Asu bilong Gibion i toktok long mi insait long haus bilong God Yawe long ai bilong ol pris na ol manmeri na em i tok olsem, ² ''God Yawe i gat olgeta strong, God bilong Israel i tok olsem, Mi brukim hap plang bilong putim long nek em king bilong Babilon i bin putim long yupela. ³ Tupela yia i no pinis yet na bai mi kisim olgeta samting bilong haus bilong God Yawe na bai mi bringim i kam bek, em king Nebukatnesa bilong Babilon i bin rausim na karim i go long Babilon. ⁴ Na bai mi kisim Jeoasin pikinini man bilong Jeoakin king bilong Juda na olgeta lain Juda em ol i bin i go kalabusim ol long Babilon i kam bek long dispela ples na bai mi brukim hap plang bilong putim long nek em king bilong Babilon i bin putim long yupela, dispela em God Yawe i tok.'' ⁵ Nau profet Jeremaia i toktok long profet Ananaia long ai bilong ol pris na olgeta manmeri insait long haus bilong God Yawe. ⁶ Profet Jeremaia i tok olsem, ''God Yawe i ken mekim olsem yu tok, God Yawe i ken mekim olsem ol tok profet bilong yu na kisim bek ol samting bilong haus bilong God Yawe na ol lain i stap kalabus long Babilon i kam bek long dispela ples. ⁷ Tasol nau yu putim yau wantaim ol manmeri na harim tok mi autim. ⁸ Ol profet i bin kamap paslain long yumi na i stap bipo tu i tok profet long ol pait, bikpela bagarap na bikpela sik bai kamap long ol manmeri na ol bikpela kantri. ⁹ Olsem na sapos wanpela profet i tok olsem bai i no gat hevi na i gat gutpela sindaun tasol na tok bilong em i kamap tru, orait bai yumi save olsem God Yawe i salim em i kam.'' ¹⁰ Tasol profet Ananaia i kisim hap plang bilong putim long nek long nek bilong profet Jeremaia na i brukim. ¹¹ Olsem na profet Ananaia i toktok long ai bilong olgeta manmeri na i tok olsem, God Yawe i tok olsem, Long wankain pasin tasol, i no tupela yia yet na bai mi brukim hap plang bilong putim long nek em king Nebukatnesa bilong Babilon i bin putim long nek bilong olgeta lain manmeri.'' Profet Jeremaia i lusim na i go. ¹² Sampela taim liklik bihain long profet Ananaia i bin brukim hap plang bilong putim long nek long nek bilong profet Jeremaia, tok bilong God Yawe i kam long Jeremaia na i tok, ¹³ Yu go na toktok long profet Ananaia na yu tokim em olsem, ''God Yawe i tok, Yu bin brukim hap plang bilong putim long nek ol i wokim long diwai, tasol bai mi wokim hap plang bilong putim long nek ol i wokim long ain.'' ¹⁴ God Yawe i gat olgeta strong, God bilong Israel i tok olsem, Mi bin putim hap plang bilong putim long nek ol i wokim long ain long nek bilong ol dispela lain manmeri, long mekim wok bilong king Nebukatnesa bilong Babilon bai ol i stap wokman bilong em na mi givim em tu ol wel abus i stap long bus long em i bosim.'' ¹⁵ Profet Jeremaia i mekim dispela tok pinis na em i tok gen olsem, Ananaia Yu harim, God Yawe i no bin salim yu, tasol yu yet yu mekim dispela ol manmeri i bilipim giaman bilong yu. ¹⁶ Nau God Yawe i tok olsem, Lukim, bai mi rausim yu long dispela graun. Long dispela yia tasol bai yu dai long wanem, ol tok bilong yu i mekim ol manmeri i sakim tok bilong God Yawe. ¹⁷ Long namba 7 mun bilong dispela yia yet profet Ananaia i dai.