17 ¹ Ol sin bilong ol Juda i stap long lewa bilong ol we ol raitim wantaim sap naep i gat daimon poin. Ol katim stret i go insait long lewa bilong ol, na raitim tu long hon bilong teibol tambu. ² Ol pikinini bilong ol tu i no lusim tingting long teibol tambu wantaim ol bilip diwai pos nating i stap sait long ol diwai na antap long maunten. ³ Maunten bilong mi long olgeta ples, na olgeta gutpela mani kago samting bilong yupela bai mi bagarapim na rausim wantaim ol ples bilong lotu long giaman god, bilong wanem yupela mekim planti sin long olgeta hap long Israel. ⁴ Yupela bai lusim olgeta samting mi givim yupela. Na bai yupela i go kalabus long han bilong ol birua long ples longwe hap yupela i no save long en, bilong wanem yupela laitim paia long bel hat bilong mi, we paia i no i nap pinis. ⁵ God Yawe i tok,"Husat manmeri i putim bilip bilong em long man nating em kisim bel nogut bilong mi bilong wanem ol mekim man kamap strong bilong ol na ol i no luksave na givim bel long God Yawe. ⁶ Em olsem liklik sotpela gras i stap long ples Araba i nogat wara na i no inap lukim gutpela samting i kam. Em bai kisim taim stret long drai ples i no gat wara na pulap long ston. ⁷ Tasol man husat i putim bilip bilong em long God Yawe, em bai kisim blesing bilong wanem as tru bilong tok stret em wanpela God Yawe tasol. ⁸ Em bai i olsem ol diwai ol i planim arere long wara. Rop bilong diwai bai painim wara. Em i no i nap long poret long strongpela san taim em i kam, bilong wanem lip bilong diwai em grin i stap yet. Diwai i no poret long traipela san long wanpela krismas na em bai i no i nap long stop long karim kaikai. ⁹ Lewa bilong ol man i bagarap nogut tru na i winim ol sampela samting. Em i gat bikpela sik, husat tru inap long luksave long dispela. ¹⁰ Mi God Yawe, husat i save sekim tingting na luksave long lewa bilong man. Mi givim wanwan man pei long gutpela pasin na stretpela bilip bilong ol. ¹¹ Pisin patris i save brukim kiao we em yet i no karim. Sampela man bai kisim bikpela pei nating long wok ol i no mekim tasol long namel taim olgeta kago bai i lus nating na long arere bilong en em bai kamap longlong man. ¹² Ples bilong yumi long lotu em istap antap tru bipo yet wantaim olgeta pawa. ¹³ God Yawe wanpela tasol bai helpim Israel. Husat lusim yu bai kisim bikpela sem; na husat i stap long graun na givim baksait long yu, em bai i go insait long graun, bilong wanem ol i no luksave long God Yawe husat i save givim wara i gat laip olgeta taim. ¹⁴ Mekim mi orait,God Yawe na bai mi kamap orait ken, helpim mi na mi kisim malolo, bilong wanem yu tasol gutpela na amamas long mi. ¹⁵ Lukim, ol i tokim mi olsem, "Tok bilong God Yawe i stap we? Larim em i kam!" ¹⁶ Long mi, mi i no ronowe long wok yu givim mi olsem wokman bilong lukautim sipsip. Mi i no tingim na wetim ol bikpela hevi bai mi bungim. Yu save pinis ol toktok kam aut long maus bilong mi. Olgeta toktok mi mekim long ai bilong yu tasol. ¹⁷ Yu no ken birua long mi. Yu tasol bai helpim mi long taim nogut. ¹⁸ Ol birua bilong mi bai ol sem, tasol yu no ken mekim mi sem, larim ol kisim taim na mi i stap gut. Salim taim nogut i go long ol birua na ol i ken kisim bikpela hevi moa yet. ¹⁹ God Yawe tokim mi olsem,"Go sanap long geit bilong ol manmeri na we king bilong Judah ol i save i go i kam, na olgeta arapela geit bilong biktaun Jerusalem. ²⁰ Tokim ol olsem,"Harim tok bilong God Yawe, yupela king na manmeri bilong Juda, na olgeta manmeri husat i stap insait long biktaun Jerusalem husat i save kam insait long ol dua. ²¹ God Yawe tok olsem,"Harim gut nogut yu kisim bagarap, i no ken karim hevi long de Sabat na kisim i kam long ol geit bilong Jerusalem. ²² Yu no ken kisim kago i go aut long haus bilong yu long de Sabat. Tambu tru long wok, larim de Sabat i stap em yet, olsem mi God Yawe i bin tokim ol tumbuna bilong yupela bipo." ²³ Ol i no harim tok na bihainim,ol strongim kona na i no harim mi long stretpela tok mi mekim. ²⁴ Em bai kamap sapos yu harim mi gut - em tok stret bilong God Yawe - yu i no ken kisim hevi i kam long geit bilong biktaun long de Sabat, larim na luksave long de Sabat bilong God Yawe. Tambu tru long wokim wok long dispela de, ²⁵ olsem na ol king na pikinini bilong ol wantaim ol lain husat bai sindaun long sia king bilong king Davit bai kamap long geit wantaim amamas long karis na ol hos, ol bai kam wantaim ol lida bilong ol Juda na olgeta manmeri husat i stap insait long biktaun Jerusalem na olgeta bai i stap oltaim oltaim. ²⁶ Ol bai kam long biktaun bilong Juda na arere long Jerusalem, hap graun bilong Bensamen na long ples tambilo, long maunten, long Negev na ol bai karim ol ofa olsem, ofa bilong kukim, sakrifais ofa, sit bilong kaikai ofa, switpela smel ofa na tenkyu ofa i go long haus bilong God Yawe. ²⁷ Tasol sapos yupela i no harim toktok bilong mi - na larim de Sabat i stap fri na yu sakim tok na karim hevi kago i kam long geit bilong Jerusalem long de Sabat - mi God Yawe bai kukim dispela geit wantaim ol gutpela ples bilong king na dispela paia ol man i no i nap kilim i dai.