5 ¹ Long dispela dei Debora na Barak pikinini man bilong Abinoam i singim dispela song; ² "Taim ol lida bilong Israel i go pas yet, na ol manmeri i amamas tru long pait- yumi litimapim nem bilong God Yawe! ³ Yupela ol king, harim, yupela ol lida, putim ia gut na harim, bai mi singim song long God Yawe, bai mi singim song bilong litimapim nem bilong God Yawe, God bilong ol Israel. ⁴ God Yawe, taim yu go long Seir, taim yu wokabaut long Idom, graun i guria, na skai tu i guria, na klaut tu i kapsaitim wara i kam daun. ⁵ Ol maunten i guria taim God Yawe i wokabaut i kam ; maski maunten Sinai tu i guria taim God Yawe, God bilong ol Israel i kam. ⁶ Long taim bilong Samga pikinini man bilong Anat, long taim bilong Jael, ol man ino wokabaut moa long ol bikpela rot, ol i save bihainim ol arapela han rot. ⁷ Long Israel ino bin gat planti man bilong pait istap, inap mi Debora i kirap, i kirap olsem mama bilong Israel. ⁸ Taim ol i givim baksait long God Yawe na i bihainim ol arapela god, ol birua i kam pait long ol dua bilong biktaun na i rausim olgeta samting bilong pait long han bilong ol 40 tausen ami bilong Israel. Nogat wanpela ami i kam bek wantaim wanpela samting bilong pait. ⁹ Bel bilong mi i stap wantaim ol man i go pas long pait long Israel, wantaim ol man husait i amamas tru long pait, yumi givim biknem long God Yawe long ol. ¹⁰ Yupela husait i sindaun antap long waitpela donki i gat gutpela mat bilong sindaun, na yupela husait i save wokabaut long rot, yupela tingim olgeta dispela samting. ¹¹ Harim nek bilong ol lain husait i singsing arere long hul wara. Ol i tokaut long stretpela pasin bilong God Yawe, na stretpela pasin bilong ol man bilong pait long Israel. Bihain ol manmeri bilong God Yawe i go daun long geit bilong biktaun. ¹² Kirap, kirap Debora. Kirap, kirap na singim song. Kirap Barak, yu pikinini man bilong Abinoam, kirap na holim pasim ol kalabus man bilong yu. ¹³ Ol man i stap laip yet,ol i kam daun long ol hetman. Ol man bilong pait wantaim ol manmeri bilong God Yawe i kam daun long mi. ¹⁴ Ol sampela lain Ifrem i kam, we asples bilong ol i stap long Amelek, ol manmeri bilong Benjamin i bihainim ol. Ol man Makir i go pas long pait i kam daun, long lain Jebulun ol man bilong karim ol samting bilong opisa i kam. ¹⁵ Ol hetman bilong mi long Isaka i stap wantaim Debora, na ol Isaka i go wantaim Barak, ol i hariap na bihainim em i go long wanpela ples daun. Namel long ol lain bilong Ruben, ol i no save bai ol i mekim wanem samting. ¹⁶ Bilong wanem yu sindaun namel long ol paia ples, na yu harim ol wasman bilong sipsip i pilai musik long ol sipsip bilong ol. Ol lain bilong Ruben ol i no save bai ol i mekim wanem samting. ¹⁷ Giliat i stap hapsait long Jodan, na Dan, bilong wanem em i raun nating antap long ol sip i stap. Asa i stap long nambis na i stap klostu long ol ples we sip i save sua long en. ¹⁸ Long ples bilong pait, ol lain Jebulun i save lusim laip bilong ol na strong long pait, na ol lain bilong Naptali tu i save stap redi long pait olsem ol lain Jebulun. ¹⁹ Olgeta king i kam na pait, ol king bilong Kenan i kam pait wantaim mipela long Tanak klostu long ol wara bilong Megido. Tasol ol i no kisim silva samting namel long pait na i go. ²⁰ I olsem ol sta long heven i kisim ples bilong mipela na i kam pait , na i olsem ol sta i stap long rot bilong ol long skai na i pait wantaim ol Sisera. ²¹ Wara Kison i karim ol i go pinis, dispela olpela wara, em wara Kison, Mi tokim mi yet long sanap strong na wokabaut. ²² Ol hos i kam wantaim nois bilong lek, na ol i kalap wantaim strong bilong ol. ²³ Ensel bilong God Yawe i mekim strongpela tok bilong bagarapim ples Meros, em i mekim tok bilong bagarapim ol manmeri i stap long dispela ples, bilong wanem ol i no kam long helpim God Yawe. Ol i no kam long helpim God Yawe long pait wantaim ol strongpela man bilong pait. ²⁴ Namel long olgeta meri, God i mekim gut long Jael. Jael em i meri bilong Heba man long Kenai. Namel long olgeta meri i save stap long haus sel, God i mekim gut moa yet long Jael. ²⁵ Na dispela man i askim long wara na em i givim milk long en na em i putim bata long dis wankain olsem pikinini man bilong king i save kaikai na kam givim long en. ²⁶ Em i putim han bilong en long pin bilong haus sel na hansut bilong en long hama bilong wokman. Em paitim Sisera wantaim hama na brukim het bilong en. Em i brukim het bun bilong Sisera i go liklik liklik taim em i sutim em long het i go kamap long narapela sait. ²⁷ Em i pundaun namel long lek bilong en, em pundaun na slip i go daun namel long lek bilong en wantaim bagarap. Em i dai long dispela ples stret Jael i bin kilim em long en. ²⁸ Long windua bilong en, em i lukluk i go autsait. Mama bilong Sisera i lukluk long liklik hul long haus na i singaut wantaim wari, 'Bilong wanem em i kisim karis bilong em i go longwe hap na i no kam? Bilong wanem na lek bilong hos i save pulim karis bilong en i stap longpela taim? ²⁹ Na savemeri bilong en wantaim gutpela tingting i bekim na givim long em. ³⁰ Ating yupela i no painim na skelim ol stil samting? Wanpela meri o tupela meri long wanwan man, olsem gutpela kala laplap ol i winim long pait na karim bilong Sisera i kam, ol i mekim gutpela laplap ol i wokim long han na putim long nek bilong ol meri, a?' ³¹ Olsem na olgeta birua bilong yu bai i dai pinis, O God Yawe! Tasol ol pren bilong yu ol i olsem san taim em i kam antap wantaim strong bilong en." na dispela ples i gat gutpela sindaun na bel isi long 40 yia olgeta.