4 ¹ Bihain long Ehut i dai, ol lain manmeri bilong Israel i givim baksait long God Yawe na mekim pasin nogut gen long ai bilong God Yawe. ² God Yawe i larim ol i go long han bilong Jabin em King bilong Kenan i save stap long taun Hasor. Nem bilong komanda bilong ami bilong em i Sisera na em i save stap long taun Haroset Hagoim. ³ Ol manmeri bilong Israel i singaut long God Yawe long helpim ol, long wanem Sisera i gat 900 ain karis na em i save paitim ol na mekim nogut long lain manmeri bilong Israel long 20 yia olgeta. ⁴ Nau wanpela profet meri, nem bilong en Debora (em meri bilong Lapidot) i wok long givim tingting long ol hetman bilng Israel long dispela taim. ⁵ Na em i save sindaun aninit long diwai pam bilong Debora namel long Rama na Betel antap long ples maunten bilong Efraim na ol manmeri bilong Israel i save kam long em long stretim toktok na hevi namel long ol yet. ⁶ Em i singaut long Barak, pikinini man bilong Abinoam bilong Kades long Naptali. Em i tokim em, "God Yawe, God bilong Israel i tok long yu olsem, 'Yu mas kisim 10,000 man bilong lain Naptali na Sebulon na go long maunten Tabor. ⁷ Mi bai bringim Sisera, Ami ofisa bilong Jabin i kam bungim yu long wara Kison wantaim karis na ami bilng en, tasol mi bai givim ol long han bilong yupela.'" ⁸ Tasol Barak i tokim em, "Sapos yu kam wantaim mi orait bai mi go. Tasol, sapos yu no kam wantaim mi bai mi ino inap go. ⁹ Na Debora i tok, "Em orait mi bai i go wantaim yu, tasol long dispela rot nau yu go long en, yu no inap kisim biknem,long wanem, God Yawe bai givim Sisera i go long han bilong wanpela meri." Olsem na Debora i go wantaim Barak long Kades. ¹⁰ Orait Barak i singautim ol man bilong Sebulun na Naptali long kam bung long Kades. Olsem na 10,000 man i bihainim em na Debora tu i go wantaim ol. ¹¹ Dispela taim Heber (ma long ples Kena) i lusim ol lain Kena na stap em yet. Ol lain Kena i lain tumbuna bilong Hobab (em tambu papa bilong Moses) na em i wokim haus sel klostu liklik long diwai ok, long ples Sananim klostu long ples Kades. ¹² Taim ol i tokim Sisera olsem, Barak pikinini man bilong Abinoam i go antap pinis long Maunten Tabor, ¹³ Sisera i stretim ol dispela 900 ain karis na olgeta soldia long Haroset Hagoim igo inap long wara Kison husait i stap wantaim em long kam. ¹⁴ Na Debora i tokim Barak olsem, "Orait yumi go nau! Long wanem, dispela de em God Yawe i putim Sisera long han bilong yu na bai yu winim em. Ating God Yawe ino go pas long yu a? Olsem na Barak i go daun long Maunten Tabor wantaim 10,000 man husait i bihainim em. ¹⁵ God Yawe i mekim Sisera na olgeta karis na olgeta ami bilong en i kamap longlong tru. Na Sisera i kam daun long karis na i ranawe lek nating. ¹⁶ Tasol Barak i ronim ol karis na ami i go inap long Haroset na Hagoim, na kilim i dai olgeta ami bilong Sisera long bainat na nogat wanpela man i stap laip. ¹⁷ Tasol Sisera i ranawe i go long haus sel bilong Jael, meri bilong Hebes em man long Kena, long wanem igat wanbel namel long Jabin em king bilong Hasor na famili bilong Heber man long Kena. ¹⁸ Jael i kam bungim Sisera autsait na tokim em olsem. "Bikman, kam insait, kam insait long haus sel bilong mi na noken pret." Olsem na em i harim tok na i go insait long haus sel bilong Jael na em i karamapim em wantaim blanket. ¹⁹ Na Sisera i tokim em,"Plis inap yu mi givim mi liklik wara long dring, nek bilong mi i drai." Olsem na em i opim lid bilong skin meme i gat milk na i givim em long dring na em i karamapim blanket long em gen. ²⁰ Em i tokim Jael olsem, "Plis sanap long dua stap na sapos wanpela man i kam na askim yu, 'I gat sampela lain i stap long hia o nogat?', orait, tok olsem, 'Nogat,." ²¹ Na bihain, Jael (meri bilong Heber) i kisim na holim pek bilong haus sel na hama na i go isi tru long em na paitim pek igo insait long sait long het bilong en inap pek i go insait long graun na em i dai. ²² Barak i bhainim Sisera kam yet olsem na Jael igo autsait long bungim em na tokim em, "Kam na bai mi soim yu dispela man yu wok long painim." Na taim em igo insait, em i lukim pek bilong haus sel insait long het bilong Sisera na em i dai stap. ²³ Olsem na long dispela dei, God i bin winim Jabin, king bilong kantri Kenan long ai bilong ol lain Israel. ²⁴ Na strong bilong ol lain Israel i kamap bikpela na bikpela moa long Jabin, king bilong ol Kenan inap ol i bagarapim em na pinisim em tru.