3 ¹ Nau God Yawe i larim dispela ol kantri bilong traim Israel, olgeta wanwan i gat nem long Israel husait i no bin save long pait i kamap long Kenan. ² Em i mekim dispela long skulim ol lain i kamap nau bilong lain Israel husait i no save long pasin bilong pait. ³ Dispela em nem bilong ol kantri ol 5-pela king bilong ol Filistia, olgeta ol Kenan, ol Sidon na ol Hivi husait i save stap long ples maunten bilong Lebanon, bilong Maunten Balhermon long dua bilong rot i go long Hamat. ⁴ Olgeta dispela kantri i stap bilong God Yawe i traim ol Israel, long save tru bai ol inap bihainim tok, em i givim long tumbuna bilong ol Moses. ⁵ Olsem na ol manmeri bilong Israel i sindaun wantaim ol Kenan, ol Hit, ol Amor, ol Peres, ol Hivi, na ol Jebus. ⁶ Na ol Israel i marit nabaut wantaim ol na i bihainim ol god bilong dispela hap ples. ⁷ Ol manmeri bilong Israel i mekim pasin nogut tru long ai bilong God Yawe na lusim tingting olgeta long God Yawe, God bilong ol. Ol i lotu long god Bal na ol god meri Asera. ⁸ Olsem na God Yawe i belhat long ol Israel na i salim ol i go long hap bilong Kusan Risataim king bilong kantri Aram Naharaim long Mesopotemia. Ol manmeri bilong Israel i stap aninit long Kusan Risataim inap 8-pela krismas. ⁹ Taim ol Israel krai i go long God Yawe, God Yawe i makim man i kam bilong helpim ol lain manmeri bilong Israel na kisim bek ol, olsem na em i makim Otniel pikinini bilong Kenas, liklik brata bilong Kalep. ¹⁰ Spirit bilong God Yawe i givim strong long em na em i kamap hetman na kisim ol i go long pait. God Yawe i givim strong long winim pait wantaim Kusan Risataim king bilong Aram. Na Otniel i winim Kusan Risataim. ¹¹ Na ol i stap gut long dispela graun inap 40 krismas. Na bihain Otniel pikinini man bilong Kenas i dai. ¹² Bihain ol Israel i kirap gen na wokim pasin nogut tru long ai bilong God Yawe na God Yawe i givim strong long Eklon king bilong Moap bilong daunim ol Israel. ¹³ Eklon i tok gris na bung wantaim ol Amon na ol Amalek na ol i go pait na winim ol Israel na kisim Biktaun bilong ol Diwai Det. ¹⁴ Ol manmeri bilong Israel i stap aninit long Eklon king bilong Moap inap 18 krismas. ¹⁵ Taim ol Israel singaut i go long God Yawe, God Yawe i givim man inap long helpim ol, Ehut pikinini man bilong Gera bilong lain Benjamin, em i han kais man. Ol manmeri bilong Israel i salim sampela presen olsem takis i go long Eklon king bilong Moab. ¹⁶ Ehut i mekim wanpela bainat i gat tupela sait sap, longpela bilong en olsem 50 sentimita na em i pasim wantaim laplap na haitim long hansut. ¹⁷ Em i givim presen olsem takis i go long Eklon king bilong ol Moap. Eklon em i patpela man tru. ¹⁸ Bihain long Ehut i givim presen olsem takis, em i go bek wantaim ol lain i bihainim em kam. ¹⁹ Ol i wokabaut i go na taim ol i kamap long dispela ples bilong mekim ol giaman god klostu long Gilgal, Ehut i tanim i go bek na i tok, "Mi gat wanpela hait tok bilong yu, king bilong mi." Eklon i tokim olgeta wokman bilong em lusim rum na i go. ²⁰ Ehut i kam long em. Na king em yet i sindaun na kisim win long rum antap long haus. Ehut i tok, "Mi gat tok bilong yu i kam long God." Na king i lusim sia na i kirap. ²¹ Ehut kwiktaim apim hankais i go na pulim bainat i stap long hansut antap long lek na i sutim long bodi bilong king. ²² Han bilong bainat tu i go insait long em na bihainim sap bilong en. Na hap bilong bainat i go kamap long baksait na gris tu pas wantaim, olsem na Ehut i no pulim bainat i kam aut long bel bilong em. ²³ Bihain Ehut i go autsait long dua bilong rum i stap antap na pasim olgeta dua na lokim olgeta dua. ²⁴ Bihain long Ehut i go pinis, ol wokman bilong king i kam na lukim olsem ol dua bilong rum i stap antap olgeta i pas, olsem na ol i ting, "Em yet i stap na kisim kolwin long rum i stap antap." ²⁵ Olgeta i tingting planti na ol i pilim olsem ol i no mekim stret wok bilong ol long lukautim king taim dua bilong rum i stap antap i pas yet. Olsem na ol i kisim ki na opim i go insait na lukim bosman bilong ol i dai pinis. ²⁶ Nau ol wokboi i weit na tingting planti long wanem samting ol bai i ken mekim, Ehut ranawe na abrusim ples bilong ol ston ol i katim piksa bilong god giaman na em i go kamap long Seira. ²⁷ Taim em i kam kamap pinis, em winim biugel long ples maunten i stap long kantri Efraim. Na olgeta manmeri bilong Israel i lusim ples maunten na i go daun na em i kamap hetman bilong ol. ²⁸ Em i tokim ol, "bihainim mi, long wanem God Yawe i winim pinis ol birua bilong mipela ol Moap."Ol bihainim em i go kisim liklik han wara bilong Jodan na pasim ol Moap na i no larim wanpela i brukim wara na ranawe i go hapsait. ²⁹ Long dispela taim ol i kilim 10,000 man bilong Moap na em ol strongpela man inap long pait. Tasol nogat wanpela i ranawe. ³⁰ Long dispela dei ol Moap i stap aninit long strong bilong Israel na ol i stap gut inap olsem 80 krismas. ³¹ Bihain long Ehut narapela hetman i kamap, nem bilong em Samgar pikinini bilong Anat husait i kilim 600 man bilong Filistia wantaim stik bilong hariapim ol kau. Em i rausim ol Israel long han bilong ol birua.