2 ¹ Ensel bilong God Yawe i lusim ples Gilgal na go long Bokim, na i tok, ''Mi kisim yupela long Isip na mi bringim yupela i kam long graun mi bin promis long givim ol papa bilong yupela. Mi tok, ''Mi no inap brukim kontrak bilong mi. ² Yupela i noken mekim kontrak wantaim ol manmeri husait i stap long dispela hap. Yupela i mas brukim olgeta alta bilong ol i go daun. Tasol yupela i bikhet na i no laik harim tok bilong mi. Em yupela i mekim wanem? ³ Na nau mi tok, ''Mi no inap rausim ol Kenan long ai bilong yupela, tasol ol bai i kamap nilnil long yupela, na ol god giaman bilong ol bai i kamap birua long yupela.'' ⁴ Taim ensel bilong God Yawe i mekim dispela tok long ol manmeri bilong Israel, olgeta manmeri i singaut bikmaus na i krai nogut tru. ⁵ Na ol i kolim dispela ples Bokim. Na long dispela hap ol i mekim ol ofa long God Yawe. ⁶ Nau Josua i salim ol manmeri i go, ol manmeri bilong Israel i go long wanwan ples ol i makim, ol i sindaun long en na kamap papa long em. ⁷ Ol manmeri bilong Israel i aninit long God Yawe long taim bilong Josua na ol hetman, em ol lain husait i lukim God Yawe i mekim ol bikpela samting bilong ol Israel. ⁸ Josua pikinini bilong Nun wokman bilong God Yawe i dai taim em i winim 110-krimas. ⁹ Ol i planim em long mak bilong graun ol bin makim bilong em long Timnat Eret, long ples daun bilong Ifraim, long hap not bilong Maunten Gas. ¹⁰ Dispela ol nupela pikinini bilong ol i bung wantaim ol papa, ol nupela pikinini i kamap bihain ol i no bin save long God Yawe o wanem samting em i bin mekim long ol Israel. ¹¹ Ol manmeri bilong Israel i mekim pasin nogut tru long ai bilong God Yawe na i lotu long Bal god giaman. ¹² Ol i go longwe tru long God Yawe, em God bilong ol papa bilong ol, husait i kisim ol i kam aut long Isip. Ol i bin igo bihainim ol arapela god, em ol god bilong ol manmeri husait i stap klostu long ol, na ol i brukim skru long ol. Ol i mekim God Yawe i belhat long wanem ¹³ ol i go longwe long God Yawe na i lotu long Bal na Astorets. ¹⁴ Belhat bilong God Yawe i kam wantaim paia long ol Israel, na em i givim ol i go long han bilong ol man nogut husait i stilim olgeta samting bilong ol. Em i mekim ol i kamap wokboi bilong ol man husait i gat strong i kamap birua bilong ol na i raunim ol long olgeta hap. Olsem na ol i no inap daunim ol birua bilong ol. ¹⁵ Olgeta taim ol Israel i go long pait wantaim ol birua, han bilong God Yawe i kam antap long ol long daunim ol, olsem em i bin tokim ol bipo na ol i stap long bikpela guria na pret. ¹⁶ Na God Yawe i makim ol jas , husait i bin helpim ol long han bilong ol birua i stilim ol samting bilong ol. ¹⁷ Tasol ol i no laik harim na bihainim tok bilong ol jas . Ol i no laik aninit long God Yawe, olsem ol i givim ol yet igo long ol giaman god na lotu long ol. Olsem na ol i lusim ol gutpela rot ol papa i bin bihainim - ol lain husait i bin bihainim ol lo bilong God Yawe-tasol ol yet i no bin mekim olsem. ¹⁸ Na God Yawe i makim ol Jas bilong lukautim ol, God Yawe i helpim ol Jas na rausim ol birua bilong ol long taim ol jas i stap yet. God Yawe i sori long ol taim ol i krai long em taim ol man i bagarapim ol na mekim nogut long ol. ¹⁹ Tasol taim ol Jas i dai pinis, ol i givim baksait long God gen na mekim pasin nogut i winim ol pasin nogut ol papa i bin mekim. Ol i bihainim ol arapela god na i lotu long ol. Ol i no laik givim baksait long pasin nogut bilong ol na ol rot nogut ol i bihainim. ²⁰ Na belhat bilong God Yawe i kam long ol Israel; na em i tok,''Ol dispela manmeri i bagarapim kontrak bilong mi, mi bin givim ol lain papa bilong ol- long wanem ol i no bihainim tok bilong mi- ²¹ Mi no inap, igo olsem long nau, bai mi rausim ol birua bilong yupela long ol graun Josua i no kisim yet na em i dai. ²² Bai mi mekim olsem na bai mi traim ol Israel, bai ol i bihainim tok bilong God Yawe o nogat na wokabaut insait long em, olsem ol papa bilong ol i bin bihainim.'' ²³ Dispela as tasol God Yawe i lusim ol dispela kantri i stap yet na em i no bin rausim ol birua i go aut na i givim ol long han bilong Josua.