61 ¹ Spirit bilong Bikpela God Yawe i stap wantaim mi, long wanem, God Yawe i bin makim mi long tokaut long dispela gutnius long ol lain tingting bilong ol i no stap stret. Em i salim mi i kam long oraitim ol lain bel bilong ol i bruk tru na tokaut long belisi long ol lain husait i stap long kalabus na opim dua bilong ol. ² Em i salim mi i kam long tokaut long yia bilong God Yawe i laikim, em i taim bilong bekim bek bilong God na long mekim gut long ol lain husait i krai na sori. ³ Em i salim mi i kam long givim ol lain i sori na krai long maunten Saion, long givim ol wanpela gutpela plaua bilas bilong putim long het i kisim ples bilong sit bilong paia, wel bilong amamas i kisim ples bilong sori na krai, pasim hap laplap i gat namba, bai ol manmeri i amamas long ol i kisim ples bilong tingting bilong daunim na givim nem nogut long ol, long kolim ol olsem gutpela diwai i gat stretpela pasin na bai planim God Yawe na bai ol i givim biknem long em. ⁴ Ol bai i wokim gen olpela ples bilong ol i bagarap pinis, ol bai i kamapim gen olpela samting ol birua i bagarapim. Ol bai kamapim gen biktaun bilong ol na ol pasin na samting bilong tumbuna bilong ol, ol birua i bin bagarapim na rausim long en. ⁵ Ol lain long narapela ples bai i lukautim ol sipsip bilong yu na ol pikinini man bilong narapela ples bai i wok long ol gaden na ol wain gaden bilong yupela. ⁶ Ol bai i kolim yu olsem ol pris bilong God Yawe, ol bai i kolim yu olsem ol wokman bilong God bilong yumi. Yu bai i kaikai long olgeta kago bilong ol kantri na bai yu i apim yu yet i go antap long ol kago samting bilong ol. ⁷ Kisim ples long sem bilong yupela bai yupela i gat planti samting moa na long kisim ples bilong ol manmeri i no luksave long yu bai ol i amamas long ol samting bai yu i skelim na givim long ol. Olsem na ol bai i kisim hap moa long graun bilong ol na amamas bilong ol bai i go moa yet. ⁸ Long wanem, mi God Yawe i no save laikim pasin bilong sakim tok bilong lo na stilim samting bilong ol arapela manmeri tasol mi i save laikim pasin bilong laikim narapela na stap aninit long lo. Tru tumas bai mi i bekim bek olgeta samting bilong ol na bai mi i mekim strongpela promis wantaim ol oltaim. ⁹ Ol tumbuna bilong ol bai i kam aut namel long ol kantri na ol pikinini i kamap bihain namel long ol manmeri. Ol lain husait i lukim ol bai amamas long ol olsem ol manmeri husait God Yawe i bin blesim. ¹⁰ Bai mi i gat bikpela amamas tru long God Yawe, wantaim God bilong mi, bai mi amamas tru. Em i bilasim mi wantaim gutpela na stretpela pasin bilong em, olsem ol man bilong marit i save bilasim em yet wantaim gutpela bilas rop i raunim het bilong em na meri i bilasim em yet wantaim klos i gat gutpela bilas ston i hangamap long en. ¹¹ Olsem graun i kamapim ol gutpela gras na olsem ol gaden i save mekim ol kaikai i kamap, wankain tasol, Bikpela God Yawe bai i mekim stretpela pasin na biknem i kamap long ai bilong olgeta kantri.