38 ¹ Long ol dispela taim Hesekaia em sik nogut tru na klostu bai dai. Olsem na profet Isaia pikinini man bilong Amos, i kam long em na tokim em, "God Yawe i tok, 'Stretim haus bilong yu, bai yu dai, yu no inap i stap moa.'" ² Bihain Hesekaia tanim pes i go long banis na beten long God Yawe. ³ Em beten na tok, "Plis God Yawe, yu tingim mi long gutpela pasin mi i save mekim long ai bilong yu wantaim olgeta gutpela bel bilong mi." Bihain Hesekaia bikmaus na krai. ⁴ Bihain tok bilong God Yawe i kam long Isaia na i tok, ⁵ "Go na tokim Hesekaia, lida bilong ol manmeri bilong mi. 'God Yawe i tok olsem, Mi God bilong tumbuna bilong yupela Devit i tok olsem, Mi harim pinis beten bilong yu na lukim ai wara bilong yu. Lukim nau yet mi laik srukim narapela 15 yia moa i go antap long laip bilong yu. ⁶ Na bai mi helpim yu wantaim dispela biktaun long han bilong king bilong Asiria na mi bai banisim dispela biktaun. ⁷ Dispela em bai kamap tok tru mak long yu i kam long mi God Yawe, mi bai mekim wanem samting mi tok long mekim. ⁸ Lukim bai mi mekim seido istap antap long leda long Ahas long i go bek 10-pela lek mak.'" Olsem na seido i go bek 10- pela lek mak long ples em i kam long en. ⁹ Dispela em i beten bilong king Hesekaia bilong Juda, em i raitim taim em sik nogut tru na i kirap gen. ¹⁰ "Mi tok taim mi i stap namel long laip bilong mi, mi bai i go long bikpela dua bilong ol dai man, em nau ol salim mi i go i stap olgeta yia. ¹¹ Mi tok olsem mi i no inap long lukim gen God Yawe, long ples ol man i gat laip i stap yet. Mi no inap moa lukim ol manmeri na husat istap long dispela graun. ¹² Laip bilong mi ol rausim na karim i go olsem haus sel bilong man bilong lukautim sipsip, yu rausim mi olsem hap laplap na katim mi i go aut olgeta namel long nait na tulait, laip bilong mi i laik pinis. ¹³ Mi bikmaus na krai i go i nap tulait i bruk, olsem laion yu brukim olgeta bun bilong mi. Namel long dei na nait tasol yu laik pinisim laip bilong mi. ¹⁴ Mi singaut na krai olsem liklik pisin swalo na dav na ai bilong mi i no les long lukluk i go antap. Bikpela, mi bagarap na kisim taim, helpim mi. ¹⁵ Bai mi tok wanem? Em tok aut long mi na em mekim pinis. Bai mi wokabout isi isi long ol hap yia mi gat bilong wanem mi pulap long sori. ¹⁶ Bikpela, ol hevi na bagarap yu salim i kam long mi em gutpela long mi, i nap yu givim mi bek laip bilong mi, yu stretim pinis laip na gutpela pasin sindaun bilong mi. ¹⁷ Em long gutpela bilong mi olsem mi i go insait long hevi. Yu helpim mi pinis long kam aut long hul bilong bagarap, bilong wanem yu tromoi olgeta sin bilong mi long beksait bilong yu. ¹⁸ Ples bilong dai man i no i nap long tok tenkyu long yu, dai i no inap amamas long yu ol lain i go insait long matmat bai i no gat bilip long yu. ¹⁹ Man i stap laip, man i no dai yet, em dispela man bai tok tenkyu long yu olsem nau mi mekim, wankain olsem papa i save putim bilip tok bilong yu i go long ol pikinini. ²⁰ God Yawe i laik helpim mi, bai yumi amamas wantaim musik olgeta taim insait long haus bilong God Yawe." ²¹ Olsem Isaia i bin tok, "Larim ol kisim ol hap fik na putim antap long sua na em bai pinis." ²² Hesekaia tu i tok olsem, "Wanem mak bai i soim olsem em i taim bilong mi long i go antap long haus bilong God Yawe?."