37 ¹ Kamap long dispela taim nau King Esekaia i harim dispela toktok. Em i brukim ol klos bilong em na karamapim em yet wantaim ol klos bilong sori na i go insait long haus bilong God Yawe. ² Em i salim Eliakim, dispela man husait i lukautim ol samting bilong haus wantaim kuskus Sebna na ol hetman bilong ol pris i karamapim ol yet wantaim klos bilong sori na i go long profet Aisaia, pikinini man bilong Amos. ³ Ol i tokim em olsem, "Esekaia i tok, 'Dispela dei em i dei bilong kisim hetpen, sori na pilim sem, olsem taim pikinini i redi long kam aut long bel bilong mama tasol mama i no gat strong inap long karim em. ⁴ I luk olsem God bilong yu God Yawe bai i harim ol tok bilong het komanda, husait king bilong Asiria, masta bilong em i salim em i kam long salensim dispela God i stap laip na bai rausim ol toktok God Yawe i bin harim long en. Nau beten long ol liklik hap lain i stap yet long hia.'" ⁵ Olsem na ol wokman bilong king Esekaia i kam long Aisaia, ⁶ na Aisaia i tokim ol, "Tokim masta bilong yu olsem, 'God Yawe i tok, "Yu noken pret long ol toktok nating yu i bin harim, long ol wokman bilong king bilong Asiria i bin tok bilas long mi long en. ⁷ Harim, bai mi kirapim bel bilong em na em bai harim ol sampela toktok na bai i go bek long graun bilong em yet. Bai mi mekim em i pundaun long bainat bilong graun bilong em yet."'" ⁸ Nau het komanda i kam bek gen na lukim olsem king bilong Asiria i pait wantaim ol lain Libna, long wanem em i bin harim olsem king i bin i go pinis long Lakis. ⁹ Nau Senaserip i harim olsem Tiaka king bilong ples Kus na Isip i bin bung wantaim long pait wantaim em, olsem na em i salim toktok i go bek gen long Esekaia wantaim dispela toktok, ¹⁰ "Tokim King Esekaia bilong Juda olsem, 'Yu noken larim God bilong yu husait yu i gat strongpela tingting long em i giamanim yu na tok, "King bilong Asiria bai i no inap win na kisim Jerusalem." ¹¹ Lukim, yu i bin harim wanem samting ol king bilong Asiria i bin mekim long olgeta hap graun taim ol i bagarapim ol nogut tru. Yupela ting bai God bilong yupela i kisim yupela bek gen? ¹² Long ol kantri ol papa bilong mi i bin bagarapim, olsem Kosan, Haran, Resef na ol lain bilong Iden long Tel Asa, ol giaman god bilong dispela ol kantri i bin helpim ol tu? ¹³ King bilong Amat, king bilong Apat, king bilong ol biktaun bilong Sefavaim, ol Hena na Iva i stap we?'" ¹⁴ King Esekaia i kisim dispela leta long han bilong ol man bilong karim tok na ritim. Nau em i go antap long haus bilong God Yawe na i go soim long ai bilong em. ¹⁵ King Esekaia i beten long God Yawe, ¹⁶ "God Yawe, papa bilong olgeta samting, God bilong Israel, yu husait i sindaun antap long ol serubim ensel, yu tasol yu God i stap antap long olgeta ples bilong ples graun. Yu i kamapim ol heven na graun. ¹⁷ God Yawe, putim ia long mi na harim. Opim ai bilong yu God Yawe na lukim na harim ol toktok bilong Senaserip husait i salim ol man i kam long tok pilai long dispela God i stap laip. ¹⁸ God Yawe, ol king bilong Asiria i bin bagarapim olgeta kantri na ol graun bilong ol, dispela em i tru. ¹⁹ Ol i putim ol giaman god bilong ol i go long paia, long wanem, ol i no god trutru tasol em ol hanmak bilong ol man tasol ol i wokim long diwai na ston. Olsem na ol Asiria i bin bagarapim ol. ²⁰ Olsem na nau God Yawe, helpim mipela long strong bilong king bilong Asiria na bai olgeta manmeri bilong ples graun bai save olsem yu tasol yu God Yawe na nogat narapela i stap." ²¹ Nau Aisaia, pikinini man bilong Amos i salim tok bilong Esekaia go na i tok, "God Yawe, God bilong Israel i tok, 'Yu i bin beten long mi long Senaserip king bilong Asiria, ²² dispela em tok bilong God Yawe i tok aut long Senaserip king bilong Asiria, "Yangpela meri bilong maunten Saion, i no bin slip wantaim wanpela man yet i tok pilai long yu na i lap long yu, pikinini meri bilong Jerusalem i sakim het long yu. ²³ Yu i bin salensim na tok bilas long husait? Yu i bin apim nek bilong yu na putim yu yet i go antap na birua long husait? Yu i birua long dispela Holi Wan bilong Israel. ²⁴ Yu i bin salensim Bikpela wantaim ol wokman bilong yu na i tok olsem, 'Mi bin i go antap long ol longpela maunten bilong Lebanon wantaim planti karis bilong mi na bai mi i katim daun ol longpela Seda diwai na ol diwai saipres long antap na bai mi i go insait moa long ples antap, long ol bik bus i gat ol gutpela prut. ²⁵ Mi i bin digim ol hulwara long ples bilong narapela lain na dring. Mi i draim ol bikpela wara bilong ol lain Isip aninit long lek bilong mi yet.' ²⁶ Yu no bin harim olsem mi bin tingim bipo yet na mi i wok long en i stap? Nau mi i kisim i kam olsem mi bin tok long en. Yu i stap long rausim ol strongpela biktaun i go daun na bungim long wanpela hap. ²⁷ Ol lain asples i nogat strong olsem na ol i ranawe go kam nabaut wantaim sem. Ol i olsem ol gras long hap graun, grinpela gras, gras antap long ruf bilong haus o long hap graun bipo long win bilong san kamap. ²⁸ Tasol mi save long sindaun bilong yu na go autsait bilong yu, kam insait bilong yu na dispela belhat bilong yu long mi. ²⁹ Long dispela belhat bilong yu wantaim mi na pasin bilong sakim tok i no stret long iau bilong mi. Bai mi i putim huk long nus bilong yu na hap rop ol i save putim long maus bilong hos long maus bilong yu na bai mi tanim yu i go bek long hap yu i kam long en." ³⁰ Dispela bai i kamap olsem mak bai i soim yu. Dispela yia bai yu i kaikai ol wel samting i grow na long namba 2 yia bai yu kaikai wanem samting i grow antap long en. Tasol long namba 3 yia yu mas planim na kaikai, planim ol wain gaden na kaikai prut bilong ol. ³¹ Ol liklik lain bilong Juda i stap laip bai i stap na bai kamap planti gen. ³² Long Jerusalem, bai dispela liklik hap lain bai i kam aut, long maunten Saion ol lain i stap laip bai i kam. Em i strongpela tingting bilong God Yawe bai i kamap.'" ³³ Olsem na God Yawe i tok olsem long king bilong Asiria, "Em bai i no inap kam insait long dispela biktaun na em bai i no inap sutim spia bilong em long hia. Em bai i no inap kam long hia wantaim hap palang bilong stopim spia na bainat o raunim banis na wokim leda i go antap long banis. ³⁴ Dispela rot em i kam long en bai i kamap olsem rot bilong em bai i go bek gen, em bai i no inap kam insait long dispela biktaun, God Yawe i tok aut olsem. ³⁵ Long wanem, bai mi i lukautim dispela biktaun na kisim em bek antap long tok bilong mi yet na long tok bilong Devit wokman bilong mi." ³⁶ Nau ensel bilong God Yawe i go aut long kemp bilong ol Asiria na kilim idai 185,000 ol soldia. Taim ol man i kirap long bik moning, ol bodi bilong ol dai man i stap long olgeta hap. ³⁷ Olsem nau Senaserip king bilong Asiria i lusim Israel na i go bek long ples bilong em na i stap long Ninive. ³⁸ Bihain, taim Senaserip i lotu long haus bilong god giaman bilong em Nisrok, tupela pikinini man bilong em Adramelek na Saresa i kilim em wantaim bainat na ol i ranawe i go long graun bilong Ararat. Nau Esadon narapela pikinini man bilong Senaserip i kamap king, kisim ples bilong em.