39 ¹ Long dispela taim, Maduk-Baladan pikinini man bilong Baladan, king bilong Babilon i salim pas na wanpela presen i go long Esekaia. Long wanem em i harim olsem Esekaia i sik na i orait gen. ² Esekaia i amamas long dispela ol samting. Em i soim ol man bilong givim toksave long bakstoa i gat ol gutpela samting olsem silva, gol, paura i gat gutpela smel na ol sanda wel, bakstoa bilong ol samting bilong pait na olgeta narapela samting i save stap insait long en. I no gat wanpela samting moa i stap long kingdom bilong em, Esekaia i no soim ol. ³ Orait profet Aisaia i kam long king Esekaia na i askim em olsem, "dispela ol man i tok wanem long yu? Ol i kam long we? Orait Esekaia i tok, "Ol i kam long mi long longwe kantri bilong Babilon." ⁴ Aisaia i askim, "Ol i lukim ol wanem samting long haus bilong yu? Orait Esekaia i bekim tok olsem, "Ol i lukim olgeta samting i stap insait long haus bilong mi. I nogat wanpela samting mi no soim ol. ⁵ Orait Aisaia i tokim Esekaia, "Harim toktok bilong God Yawe i gat olgeta strong. ⁶ God Yawe i tok. 'Harim, i gat taim bai i kamap na olgeta samting long haus bilong yu ol tumbuna bilong yu i bin putim i stap long bipo i kam inap nau em bai ol i karim i go long Babilon. I no gat wanpela samting bai i stap. ⁷ Ol pikinini man yu yet i kamapim, bai ol i kisim ol dispela samting i go long Babilon na ol bai katim na rausim bol bilong ol na ol bai stap wokboi bilong king. ⁸ Orait Esekaia i tokim Aisaia, "Tok bilong God Yawe yu autim em i gutpela. ''Long wanem em i tingim olsem , ''olgeta samting bai stap gut na orait long taim em i stap laip yet.