7 ¹  Melkisedek em i king bilong Salem, na pris bilong God antap tru. Husait i bin bungim Abraham taim em i pait na kilim ol king na wokabaut i kam bek long ples, Melkisedek i bungim em long rot na i blesim em. ² Long em tasol, Abraham i givim namba hap long olgeta samting. Nem bilong Melkisedek i gat minin olsem, "King bilong stretpela pasin" na arapela nem, em i king bilong Salem na i minim olsem, "King bilong bel isi." ³ Melkisedek i nogat papa na mama na ol tumbuna lain bilong en. Em i nogat de mama i bin karim em na de bilong em i dai. Em i stap wankain olsem Pikinini Bilong God na pris bilong i stap oltaim oltaim. ⁴ Yupela i luksave olsem Melkisedek, em i gat biknem tru. Tumbuna bilong yumi Abraham em i pait na kisim ol samting na em i skelim long tenpela hap na givim long Melkisedek. ⁵ Ol lain pikinini bilong Livai husait i kisim wok pris i tok olsem, ol arapela Israel i mas skelim ol samting bilong ol long tenpela hap na givim wanpela hap long ol Livai. Ol Israil em ol brata bilong ol Livai na tu pikinini bilong Abraham. Tasol ol Israel i kisim wanpela hap bilong samting bilong ol na givim long Livai, husait i brata bilong ol yet. ⁶ Melkisedek em i no kamap long lain bilong ol Livai. Tasol em i kisim wanpela hap bilong ol samting Abraham i givim na i kamap blesing long husait promis bilong God i stap long en. ⁷ Em i tru olsem, man i givim blesing em i bikman. Na man i kisim blesing long en, em i stap aninit. ⁸ Ol Livai i save kisim tenpela hap long ol samtig bilong ol manmeri, tasol ol man bilong i dai. Tasol Melkisedek i kisim wanpela hap bilong ol samting bilong Abraham, buk bilong God i no gat tok long em i dai. ⁹ Yumi inap tok olsem, Livai husait i save kisim tenpela hap bilong ol samting yet i save givim tenpela hap long ol samting, i go long Melkisedek aninit long Abraham, ¹⁰ Long wanem, Livai i stap insat long bodi bilong tumbuna bilong en, long taim Melkisedek i bungim Abraham. ¹¹ Bipo ol manmeri bilong Israil i kisim lo, na dispela lo i tok, ol i mas mekim wok pris. Tasol sapos wok pris bilong ol Livai em inap mekim ol manmeri i kamap gutpela tru, orait bilong wanem God i tok long narapela pris i mas kamap bihain, em wankain olsem Melkisedek, na i no wankain olsem Aron? ¹² Na taim lain bilong ol pris i senis, orait lo tu i mas senis. ¹³ Na long husait ol dispela samting i toktok long en, em i bilong narapela lain husait i no bin wok pris long alta. ¹⁴ Yumi save pinis, Bikpela bilong yumi em i kamap long lain bilong Juda, Moses i no bin mekim wanpela tok long ol dispela lain bai i stap pris. ¹⁵ Wanem samting mipela i tok em i klia sapos narapela pris i kirap wankain olsem Melkisedek. ¹⁶ Em i no antap long lo bilong dispela graun we em i kamap pris, tasol i kamap antap long pawa bilong laip i stap oltaim. ¹⁷ Tasol tok bilong God i kamap strong bilong  em, "Yu bai i stap pris oltaim oltaim wankain olsem Melkisedek." ¹⁸ Olsem na lo bilong bipo ol i nau putim i stap long sait, long wanem, dispela lo i no gat strong na i no inap helpim yumi. ¹⁹ Lo i no bin mekim wanpela samting i kamap gutpela tru. Olsem na God i opim pinis narapela rot i gutpela tru na i winim lo na long dispela rot, yumi ken i go klostu long God. ²⁰ Na em i no mekim tok promis nating, Nogat. Ol arapela pris i kamap pris taim ol i no mekim tok promis, ²¹ tasol God yet i tok tru antap na Jisas i kamap pris. Buk bilong God i tok olsem, "Bikpela i tok tru antap pinis, bai yu stap pris oltaim oltaim, na em i no inap senisim tok bilong en." ²² Olsem na dispela kontrak Jisas i mekim, em i gutpela moa na i winim kontrak bilong bipo. ²³ Bipo planti man i save kamap pris, long wanem, ol i save dai na ol i no i nap i stap pris oltaim. ²⁴ Tasol Jisas i stap oltaim oltaim. Em i holim wok pris oltaim, na i nogat senis bilong en. ²⁵ Olsem na oltaim em i nap tru long kisim bek ol manmeri i kam klostu long God long nem bilong en, long wanem, em i stap oltaim oltaim na em i save beten long helpim ol. Dispela kain hetpris em inap tru long helpim yumi. ²⁶ Na dispela kain hetpris, em inapim yumi tru. Em i no gat sin o rong na em i stap klin. God i putim em i stap antap tru long heven, longwe tru long ol man bilong mekim sin. ²⁷ Em i no ken mekim ofa long olgeta de pastaim long rausim sin bilong em yet. Na bihain ken, rausim sin bilong ol manmeri olsem pris bilong bipo i save mekim. Nogat. Em i mekim ofa wanpela taim tasol na em i givim laip bilong em yet long God. ²⁸ Lo i save makim ol man i no gat strong, long kamap hetpris. Tasol dispela tok tru i kamap bihain long lo, em i makim Pikinini Bilong God. Em i gutpela man tru na em i kamap namba wan man tru bilong helpim yumi na bai em i stap olsem oltaim oltaim.