5 ¹ Taim God i makim wanpela hetpris, em i save putim dispela man long mekim wok bilong en olsem helpim bilong ol manmeri, long mekim wok bilong lusim sin bilong ol. ² Em i ken wok isi wantaim ol dispela lain ol i no gat save na ol lain husait ol i bin giamanim ol long wanem, em yet i no gat strong. ³ Long dispela as, em i mas mekim ol ofa bilong rausim sin bilong ol manmeri na bilong em yet wantaim. ⁴ Man i kamap hetpris, em i gat biknem na i no gat wanpela man i save kisim dispela wok long laik bilong em yet. Nogat. God i save singautim em long kisim dispela wok, olsem bipo God i bin singautim Aron. ⁵ Na Krais tu i olsem. Em i no litimapim nem bilong em long kamap hetpris. Nogat, God yet i makim em bilong mekim dispela wok. God i tokim em olsem, "Yu Pikinini bilong mi. Nau mi kamap papa bilong yu." ⁶ Na long narapela hap tu, God i tok, " Bai yu stap pris oltaim oltaim, wankain olsem Melkisedek." ⁷ Taim Jisas i stap man long graun, em i save prea strong long God na em i save singaut strong na krai planti. Em i save, God inap long kisim bek em, bai em i no ken i dai. God i harim beten bilong en, long wanem, em i save daunim laik bilong em yet na aninit long God. ⁸ I tru Jisas em i Pikinini bilong God, tasol em i karim pen, na dispela i skulim em tru long pasin bilong bihainim tok bilong God. ⁹ Dispela i mekim em i kamap nambawan man tru bilong bihainim tok na olgeta manmeri husait i bihainim em, bai em inap kisim bek ol. ¹⁰ Olsem na God i makim em na i givim em wok hetpris, wankain olsem Melkisedek. ¹¹ Planti tok i stap yet long Jisas i kamap hetpris olsem Melkisedek. Mipela i painim hat tru long soim yupela as bilong dispela tok, long wanem, tingting bilong yupela i pas na i no klia. ¹² Yupela i kamap kristen longpela taim pinis, na inap long yupela i wok long skulim ol arapela long tok bilong God. Tasol nogat. Yupela i sot long tingting, na ol arapela man i mas skulim yupela ken long ol namba wan hap tok bilong God. Yupela i no redi yet long kisim strongpela kaikai. Nogat. Yupela i dring susu yet. ¹³ Yumi save ol dispela lain i save dring susu, em ol liklik pikinini. Na ol i no save gut long ol wanem pasin i stret. ¹⁴ Tasol strongpela kaikai em i bilong ol man i kamap bikpela pinis. Ol kain man olsem, ol i bin traim planti taim long skelim wanem ol pasin i gutpela na wanem ol pasin em i nogut, na nau ol i save pinis na tingting bilong ol i klia.