4 ¹ God i promis long givim mipela malolo, tasol mipela i mas lukaut, nogut mipela i abrusim dispela promis bilong God long kisim dispela malolo. ² Mipela i bin harim gutnius bilong Jisas, wankain olsem ol manmeri i harim bipo.Tasol dispela gutnius i no inap helpim ol lain, husait ol i no wanbel insait long dispela bilip na i no harim tok. ³ Mipela manmeri husait i bin bilip long Jisas, bai mipela inap long kisim ples bilong malolo, olsem God i tok, "Mi bai soim belhat bilong mi, na tok tru olsem, 'Ol bai i no inap i go insait long ples mi promis long givim malolo long ol,'' taim mi pinisim olgeta wok bilong mi long stat bilong dispela graun. ⁴ God i tokaut long taim em i mekim pinis olgeta samting long dispela graun, em i tok long buk bilong en long namba seven de, "God i malolo, bihain long olgeta wok.'' ⁵ Na em i tok ken olsem, "Ol bai i no inap i go insait long ples mi promis long givim malolo long ol." ⁶ Olsem na, sampela lain manmeri inap i go insait long ples malolo bilong God. Tasol ol lain manmeri bilong Israil i bin harim dispela gutnius, ol i no kisim dispela ples bilong malolo long wanem, ol i sakim tok bilong God. ⁷ Tasol God i makim narapela taim bai mipela inap i go insait long dispela ples bilong malolo. Dispela taim em "Nau" bihain long planti de i go, olsem em i mekim tok long king Devit olsem tok i stap pastaim. "Nau sapos yupela i harim maus bilong God, orait yupela i no ken pasim bel bilong yupela strong tru." ⁸ Sapos Josua i bin givim ol ples bilong malolo, orait God i no inap toktok long narapela de. ⁹ Olsem na i gat wanpela de malolo i stap yet, bilong ol lain manmeri bilong God. ¹⁰ Husait ol manmeri i kam long dispela malolo bilong God, bai em tu i malolo long olgeta hevi bilong em, olsem God i bin mekim pinis bilong en. ¹¹ Olsem na yumi mas strong long go insait long dispela ples malolo, bai nogat wanpela man i ken bikhet na sakim tok, olsem ol i bin mekim. ¹² Tok bilong God i stap laip na i gat bikpela strong, na i winim tru sap bilong bainat i gat tupela hap bilong en. Em i save katim tru namel wanpela hap bilong tingting ,na spirit na bun bilong mipela. Dispela tok i olsem jas i save skelim hait tingting long bel bilong olgeta manmeri. ¹³ Nogat wanpela samting i hait long ai bilong God. Olgeta samting i stap ples klia na em i save lukim olgeta samitng yumi mekim. Mipela bai sanap long ai bilong God na tokaut long olgeta samitng mipela i mekim. ¹⁴ Orait yumi i gat bikpela hetpris i stap, na em i go insait tru long heven. Em Jisas, Pikinini bilong God. ¹⁵ Olsem na yumi mas holimpas dispela bilip yumi save tokaut long en. Hetpris bilong yumi inap marimari na sori long yumi, long wanem, yumi nogat strong long daunim sin. Olgeta traim i save kamap long yumi, dispela olgeta i bin kamap pinis long em, bilong traim em tu. Tasol em i no mekim sin. ¹⁶ Olsem na yumi noken pret, yumi mas i go klostu long God. Yumi go long em, long wanem, em man bilong marimari na bai em i sori long yumi. Na sapos yumi gat hevi, orait marimari bilong em bai i helpim yumi.