27 ¹ Tok bilong God Yawe i kam gen long mi na i tok olsem, ² 'Nau pikinini man, yu mas krai na sori long taun Taia. ³ God Yawe i tok olsem long yu, Taun Taia yu save stap klostu long solwara na wok bisnis wantaim ol arapela kantri, yu bin tok, Mi gutpela tru. ⁴ Ol man bilong wokim taun i mekim yu i kamap olsem gutpela sip na yu save stap long namel bilong solwara. ⁵ Ol i kisim diwai saipres long Maunten Hemon na wokim sip, na ol i kisim sida long Lebanon na sapim mas bilong taitim sel. ⁶ Ol i kisim diwai ok long Basan na i wokim pul na ol i kisim diwai saipres long nambis bilong Saiprus na ol i wokim ploa. Na ol i bilasim wantaim tit bilong elefan. ⁷ Ol i kisim ol naispela laplap long Isip na wokim sel long en olsem plek na ol i kisim gutpela blupela na pepolpela laplap long nambis bilong Elisa na taitim long sip bai ol boskru i ken stap aninit long en. ⁸ Ol man bilong pul long sip em ol man bilong Saidon na Avad na ol saveman i stap namel em ol i kepten bilong sip. ⁹ Na sampela saveman bilong Bablos i stap long sip na i wok long pasim ol hul long plang long sip. Na ol sip bilong arapela kantri wantaim ol boskru i kam na i baim ol samting bilong yu. ¹⁰ Ol man bilong taun Pesia, Lidia na Libya i wok olsem soldia long ami bilong yu, ol i hangamapim hap plang bilong pait na hat kapa bilong ol long banisim yu. ¹¹ Ol ami bilong taun Avad na Helek i was na banisim banis bilong taun. Na ol man bilong taun Gama i stap long taua na i was long ol birua na ol i hangamapim hap plang bilong ol long banis bilong yu. Olsem na ol dispela lain i mekim yu i kamap gutpela tru. ¹² Tasis i bin wok bisnis wantaim yu long wanem yu gat planti gutpela samting bilong salim. Em ol samting olsem silva, ain, kapa na soda bilong baim yu bin salim long en. ¹³ Yu bin mekim wok bisnis wantaim kantri Java, Tubal na Mesek na yu givim ol samting bilong yu long ol long kisim ol olsem wokboi nating na ol samtimg ol i wokim long bras. ¹⁴ Ol man bilong taun Bet Togama i givim ol hos bilong wok na ol hos bilong pait na ol donki bilong mekim wok bisnis. ¹⁵ Ol man bilong Rodes na ol manmeri i stap long nambis i wok bisnis wantaim yu na ol i givim yu tit bilong elefan na blakpela diwai eboni bilong baim ol samting bilong yu. ¹⁶ Ol man bilong Aram i givim yu planti samting olsem retpela laplap na ol laplap ol i bin samapim ol gutpela bilas long en na ol gutpela ston i dia tumas bilong baim ol samting bilong yu. ¹⁷ Na ol Juda na Israel i givim yu wit, kek, hani na wel bilong diwai oliv na wanpela marasin bilong baim ol samting long yu. ¹⁸ Ol man long taun Damaskas i bin wok bisnis wantaim yu na ol i givim yu wain ol i bin kisim long Helbon na gras bilong sipsip ol i kisim long Sahar. ¹⁹ Ol Dan na Javan bilong Isal i bin wok bisnis wantaim yu na ol i bringim ain na sanda ol i wokim long diwai kalamus bilong kisim ol samting bilong yu. ²⁰ Ol man bilong Diden i givim yu blanket ol i save putim aninit long satel bilong hos long kisim ol samting bilong yu. ²¹ Ol man bilong kantri Arebia na ol lida bilong Keda i givim yu ol pikinini sipsip, ol man sipsip na ol meme bilong baim ol samting bilong yu. ²² Na ol bisnisman bilong taun Seba na taun Rama i bringim gol na ol kain paura i gat gutpela smel bilong baim ol samting bilong yu. ²³ Ol man bilong taun Haran, Kane na Iden i bin wok bisnis wantaim Seba, Asur, Kilmad na wantaim yu. ²⁴ Long maket ples bilong yu ol i bringim ol klos i gat planti plaua na ol kainkain kala na ol blanket i gat planti kala bilong putim long haus bilong baim ol samting ol i laik kisim long yu. ²⁵ Na ol sip bilong Tasis i karim kago bilong yu i go long arapela hap. Tasol yu i olsem wanpela sip i pulap long kago na i stap namel lo solwara. ²⁶ Na ol man bilong pul i pul i go long namel bilong biksolwara na bikpela win i kam long hap sankamap na i bagarapim yu. ²⁷ Olgeta mani, kago na bilas bilong yu na ol boskru na ol kepten na ol kamda bilong sip na ol ami na olgeta man i stap insait long sip na ol bisnisman i lus long solwara. ²⁸ Na ol boskru i singaut na i mekim nambis i guria. ²⁹ Na ol man i holim pul bilong sip i kam daun long sip na i go sanap long nambis. ³⁰ Ol i harim krai na sori bilong yu na ol i putim das long het bilong ol na ol i tanim tanim long sit bilong paia. ³¹ Na ol i rausim gras long het bilong ol na ol i kamap kela na pasim klos bilong sori na krai sori i stap. ³² Ol i mekim singsing bilong man i dai na ol i singsing olsem 'Taia yu stap namel long solwara i nogat wanpela taun i bagarap olsem yu.' ³³ Na yu salim kago bilong yu i go long arapela kantri na olgeta i kisim inap na ol king i kisim ol dispela samting na ol i kamap maniman. ³⁴ Tasol nau yu bagarap na yu go daun tru long solwara na olgeta boskru wantaim olgeta kago bilong yu i lus long solwara. ³⁵ Ol manmeri i stap klostu long solwara i harim olsem yu kisim bagarap na ol i guria na pret nogut tru. Na ol king tu i pret na pes bilong ol i kamap narakain. ³⁶ Yu bagarap olgeta na yu no inap stap moa long dispela graun."