24 ¹ Tok bilong God Yawe i kam long mi long namba 10 dei bilong namba 10 mun insait long namba 9 yia na i tok, ² "Pikinini bilong man, yu raitim nem bilong dispela dei, long dispela dei stret king bilong Babilon i bin banisim Jerusalem. ³ Olsem na yu autim tok piksa long bikhet pasin bilong dispela lain manmeri. Tokim ol olsem, Bikpela God Yawe i tok olsem, Putim sospen bilong kuk antap long paia na kapsaitim wara i go insait long en. ⁴ Katim olgeta gutpela mit i go liklik na putim i go insait long sospen, mit long lek na mit long sol na kisim ol gutpela bun na pulimapim long sospen. ⁵ Kisim ol bun na pulimapim insait long sospen na putim ol mit antap long ol bun na boilim ol gut. ⁶ Olsem na Bikpela God Yawe i tok olsem, bikpela bagarap bai kamap long ples i gat blut na sospen bilong kuk i gat ros i stap long en bai i no lus. Rausim wanwan inap olgeta i pinis. ⁷ Blut bilong em i stap namel long taun. Em i kapsaitim blut antap long ston na i no long graun bai ol i karamapim long das, ⁸ olsem na em i kirapim belhat bilong bekim pei. Mi putim blut bilong em antap long ston bai ol i no inap karamapim. ⁹ Olsem na Bikpela God Yawe i tok olsem, bikpela bagarap bai kamap long taun i gat blut. Bai mi hipim paiawut i go planti. ¹⁰ Hipim paiawut i go antap na laitim paia. Kukim mit gut wantaim ol kumu i gat smel i go inap wara i drai na ol bun i paia olgeta. ¹¹ Na kisim sospen bras i nogat samting i stap insait long en na sindaunim antap long paia bai paia i kukim olgeta na rausim olgeta doti na ras.' ¹² Paia i kukim em tasol ol ras i kamap long em i no lus, em i taitim bun tru olsem na em i nogat strong moa. ¹³ Ol pasin doti bilong yupela i kamapim sem, long wanem mi laik klinim doti bilong yupela tasol yupela i no inap kamap klin. Bai yupela i no inap kamap klin inap mi pinisim belhat bilong mi long yupela. ¹⁴ Mi, God Yawe i tok olsem na bai mi mekim, bai mi no inap lusim o malolo. Olgeta samting yupela bin mekim na olgeta pasin bilong yupela yet bai kotim yupela! Bikpela God Yawe i mekim dispela tok." ¹⁵ Nau tok bilong God Yawe i kam long mi olsem, ¹⁶ "Pikinini bilong man! Lukim, bai mi rausim strongpela laik bilong yu long wanpela sik nogut, tasol yu i noken pilim pen na krai na kapsaitim ai wara ¹⁷ Yupela mas krai isi long bel tasol. Yupela noken wokim singsing sori bilong dai man. Putim hat long het bilong yupela na pasim sandol long lek bilong yupela, tasol yupela noken karamapim pes bilong yupela long laplap na kaikai bret bilong ol man i stap sori long ol meri bilong ol i dai." ¹⁸ Olsem na long moning mi toktok long ol manmeri na long apinun meri bilong mi i dai. Long moning mi bihainim wanem samting Bikpela i bin tokim mi long mekim. ¹⁹ Ol manmeri i askim mi, "Inap yu tokim mipela long as bilong ol dispela samting yu mekim?" ²⁰ Olsem na mi tokim ol, Tok bilong God Yawe i kam long mi na i tok olsem, ²¹ 'Tokim ol manmeri bilong Israel, Bikpela God Yawe i tok olsem, bai mi bagarapim haus bilong mi, yupela i tok dispela em i strong bilong mipela, yupela i save lukim na amamas na laikim tumas, bihain ol pikinini man na meri bilong yupela bai dai long bainat. ²² Nau bai yupela i mekim stret olsem mi bin mekim, bai yupela i no inap karamapim pes bilong yupela na kaikai bret ol man i kisim i kam long yupela long taim bilong sori na krai. ²³ Bai yupela i putim hat long het bilong yupela na sendol long lek bilong yupela, bai yupela i no inap stap sori na krai long ol man i dai pinis, long wanem ol sin bilong yupela bai mekim bodi bilong yupela i sik na wan wan man bai pilim pen na krai long brata bilong em ²⁴ Olsem na Isekiel bai stap olsem wanpela mak long yupela, olgeta samting em i bin mekim, bai yupela tu i mekim. Nau yupela bai save olsem Mi Yet Mi Bikpela God Yawe.'" ²⁵ "Tasol yu, pikinini bilong man, long dei mi bagarapim dispela tempol em ol i save lukim na laikim tumas na amamas long en na taim mi kisim ol pikinini man na meri bilong ol, ²⁶ long dispela dei, wanpela man long longwe ples bai kisim ol toksave i kam long tokim yu! ²⁷ Long dispela dei bai yupela opim maus long dispela man i bin kam long narapela ples na toktok long em, yupela bai i no inap pasim maus na stap isi moa. Yupela bai stap olsem wanpela mak na bai ol i save olsem Mi Yet Mi God Yawe."