16 ¹ Olgeta manmeri bilong Isrel i lusim ples Elim na ol i kam kamap long ples drai bilong Sin, Em i stap namel long ples Elim na Saina, long namba 15 dei bilong namba 2 mun bihain long ol i lusim ples Isip. ² Olgeta manmeri bilong Isrel i kros long Moses na Aron long dispela drai ples. ³ Ol lain Isrel i tokim Moses na Aron, "I gutpela moa mipela i bin dai long han bilong God Yawe long graun bilong Isip taim mipela i sindaun arere long sospen i gat planti abus na bret bilong kaikai. Tasol yu kisim mipela i kamaut long dispela drai ples long kilim mipela olgeta manmeri wantaim hangre." ⁴ Nau God Yawe i tokim Moses, "Bai mi salim bret long heven i kam daun long yu olsem ren i pundaun. Ol manmeri bai i go aut na kisim bret bilong ol inap long ol bai kaikai long wanwan dei na bai mi traim ol na bai mi lukim sapos ol inap long bihainim lo bilong mi. ⁵ Long namba 6 dei bai ol i kisim bret tupela taim moa olsem ol i save kisim long wanpela dei na ol bai redim na kukim ol kaikai ol i bringim i kam." ⁶ Nau Moses na Aron i tokim olgeta manmeri bilong Isrel, "Long apinun taim bai yupela i ken save olsem God Yawe yet i bringim yupela i kamaut long ples Isip. ⁷ Long moning taim bai yupela i lukim strong bilong God Yawe, long wanem, em i harim kros bilong yupela long em. Mipela i wanem bilong yupela na yupela i mekim kros long mipela?" ⁸ Moses i tok tu olsem, "Yupela bai save long dispela, taim God Yawe i givim yupela abus long apinun na bret long moning inap long pulapim yupela, long wanem, God i harim kros bilong yupela. Yupela ting Aron na Mi em husait? Yupela i no kros long mitupela, yupela i kros long God Yawe." ⁹ Moses i tokim Aron, "Tokim olgeta manmeri bilong Isrel, 'Kam klostu long God Yawe, long wanem God i harim pinis bel hevi bilong yupela."' ¹⁰ Olgeta manmeri bilong Isrel i kam bung i stap, taim Aron i toktok na ol i lukluk i go long dispela drai ples ol i lukim glori bilong God Yawe i kam kamap long klaut. ¹¹ Nau God Yawe i tokim Moses na i tok, ¹² "Yu mas tokim ol lain manmeri bilong Isrel olsem, mi harim pinis ol toktok bilong ol. Long apinum taim bai yupela i kai kai ol abus na long moning bai mi pulapim yupela wantaim bret na bai yupela i save olsem mi God Yawe,God bilong yupela."' ¹³ Long dispela taim long apinun ol pisin i kam karamapim ol ples ol manmeri bilong Isrel i stap long en na liklik wara bilong moning olsem ren i pundaun na i raunim dispela hap ples. ¹⁴ Taim liklik wara olsem ren i pinis i gat ol liklik waitpela samting olsem ston ais i stap antap long drai graun. ¹⁵ Taim ol lain manmeri bilong Isrel i lukim dispela, ol i askim ol yet i go i kam, "Em wanem samting nau?" Ol i no save em wanem samting. Moses i tokim ol, "Dispela em bret God Yawe i givim yupela long kaikai. ¹⁶ Dispela em strongpela tok God Yawe i givim: 'Yupela i mas kisim inap long mak bilong yupela yet na inap long bai yupela kaikai long en, kisim 2 kilo mana bilong wanwan man insait long famili bilong yu. Yupela i mas kisim kaikai olsem: Kisim kaikai inap long yupela olgeta manmeri insait long hausel bilong yupela bai kaikai long en.''' ¹⁷ Ol manmeri bilong Isrel mekim olsem wanem God i bin tok, sampela i kisim planti na sampela i kisim liklik. ¹⁸ Ol i luksave taim ol i skelim long hamas kilo ol i kisim long en. Ol lain i kisim planti i no lusim sampela i stap nating na ol lain kisim liklik i no sot long kaikai, long wanem, ol i kisim inap long mak bilong famili bilong ol. ¹⁹ Nau Moses i tokim ol, "Yupela i noken putim sampela kaikai i go inap moning taim. ²⁰ Tasol, ol i no harim tok bilong Moses. Sampela bilong ol i lusim sampela kaikai i go inap long moning tasol ol dispela bret ol i lusim i stap em i smel na bagarap long moning. Ol i mekim Moses i belhat long ol. ²¹ Wanwan manmeri i kisim kaikai long olgeta moning inap long mak ol bai kaikai long en na taim san i kamap strong em i save kamap wara. ²² Long namba 6 dei ol kisim kaikai long tupela mak, em olsem ol wanwan manmeri i kisim 4-pela kilo bret long dispela dei. Olgeta lida man bilong manmeri bilong Isrel i kam long Moses na i tokim em long wanem i kamap. ²³ Nau Moses i tokim ol, "Dispela em wanem God Yawe i tok, 'Tumoro em wanpela bikpela dei bilong malolo na em Dei holi bilong God. Kukim kainkain skon yu laikim long en na boilim ol kainkain kaikai yu laik boilim long en, bai yupela inap long kaikai long nau na sampela i stap larim bilong tumoro moning bai yupela inap kaikai long en."' ²⁴ Ol i harim tok bilong Moses na ol i putim sampela long moning, kaikai bilong ol i no smel o bagarap. ²⁵ Moses i tok, "Kaikai dispela kaikai nau, long wanem, God i makim dispela dei olsem em dei Sabat bilong yumi long lotu long God Yawe, long dispela dei bai yupela i no inap painim kaikai. ²⁶ Bai yupela i kisim kaikai long namba 6 dei, tasol long namba 7 dei bai yupela i no inap kisim kaikai, long wanem em dei Sabat. ²⁷ Long namba 7 dei sampela manmeri i go autsait long kisim kaikai tasol ol i no painim. ²⁸ Nau God Yawe i tokim Moses, "Wanem taim bai yupela i save long harim tok na bihainim lo bilong mi? ²⁹ Lukim, God Yawe i givim yupela Sabat. Long namba 6 dei em givim yupela bret bilong tupela dei. Olgeta manmeri i mas i stap long wanwan hap ples bilong yupela na i noken raun nating autsait long namba 7 dei." ³⁰ Nau ol manmeri i malolo long namba 7 dei. ³¹ Ol lain manmeri bilong Isrel i givim nem long dispela bret, em "manna." Em luk olsem waitpela sit na em i swit tumas. ³² Moses i tok, "Dispela em i strongpela tok bilong God Yawe: 'Yupela i mas putim 2 kilo bilong dispela mana insait long graun sospen i stap na bai yupela i soim long ol pikinini bilong yupela na ol lain pikinini bilong ol tu. Bai ol i lukim dispela bret we mi bin givim yupela long drai ples, taim mi kisim yupela i kamaut long ples Isip."' ³³ Moses i tokim Aron, "Kisim wanpela graun sospen na putim 2 kilo bilong mana i go insait. Putim dispela bret long wanpela gutpela hap long ai bilong God Yawe na ol lain pikinini bilong Isrel bai i luksave long dispela bret." ³⁴ Aron i putim bret long sait bilong bokis kontrak bilong God Yawe, olsem God i tokim Moses long en. ³⁵ Ol lain manmeri bilong Isrel i kaikai mana long 40 -pela yia, inap ol i kamap long graun God i makim bilong ol long stap. Ol i kaikai yet inap ol i kam kamap long mak bilong graun bilong Kenan. ³⁶ Nau em 2 kilo bilong mana em olsem, wanpela hap bilong 10-pela bret tasol.