17 ¹ Olgeta lain manmeri bilong Israel i wokabaut i go long ples drai bilong Sin, ol i bihainim wanem God i tokim ol. Ol i go na stap long wanpela ples ol i kolim Repidim, tasol long dispela hap i no gat wara i stap bai ol manmeri i ken drink. ² Olsem na ol manmeri i komplen long Moses gen na ol i tok, "Givim mipela wara long drink." Moses i tok, "Bilong wanem yupela i komplen long mi? Na bilong wanem yupela i traim God?" ³ Tasol ol manmeri i nek drai tru long wara olsem na ol i komplen yet long Moses. Ol i tok, "Bilong wanem yu kisim mipela i kam aut long Isip? Em mas yu kisim mipela i kam aut long hia bai mipela wantaim ol pikinini bilong mipela na animol i ken dai long wara?" ⁴ Olsem na Moses i prea long God na em i tok, "Bai mi mekim wonem long ol dispela manmeri? Ol i redi nau long kilim mi wantaim ston?" ⁵ God i tokim Moses, "Go paslain long ol manmeri na kisim ol sampela het man bilong Israel wantaim yu, kisim tu dispela stik we yu i bin paitim wara long en na go. ⁶ Bai mi sanap pas long yu antap long dispela ston long as bilong maunten Sanai na bai yu paitim disepla ston. Wara bai i kam aut long en na bai ol manmeri i ken drink." Olsem na Moses i mekim olsem long ai bilong ol het man bilong Israel. ⁷ Em i kolim dispela ples Masah na Meriba bilong wanem, ol lain menmeri bilong Israel i komplen na ol i traim Bikpela na i tok, "Tru God Yawe i stap namel long mipela o nogat? ⁸ Ol ami bilong ol lain Amelek i kam na pait wantaim ol Israel long ples Repidim. ⁹ Moses i tokim Josua, "Kisim ol sampela man long go pait wantaim ol lain bilong Amelek tumoro." Bai mi sanap antap long maunten na holim dispela stik God i tokim mi long karim. ¹⁰ Olsem na Josua i pait wantaim ol Amelek olsem Moses i tok. Taim ol i pait yet, Aron, Hur na Moses i go antap long het bilong maunten, bai ol i ken lukim olgeta hap ples ol i pait long en. ¹¹ Long taim Moses i apim han bilong en i go antap, ol Israel i wok long winim pait na taim em i putim han bilong en i go daun, ol Amelek i wok long winim pait. ¹² Taim han bilong Moses i hevi, Aron na Hur i kisim wanpela bikpela ston na i putim aninit na Moses i sindaun long en. Na taim em i sindaun long ston, tupela i holim han bilong en. Wanpela i hoim wanpela sait han na narapela i holim narapela sait han. Olsem na han bilong Moses i stap antap i go inap long taim san i go daun. ¹³ Long dispela rot Josua i winim ol lain bilong Amelek long pait. ¹⁴ God Yawe i tokim Moses, "Raitim dispela long wanpela buk na ritim long Josua. Bilong wanem bai mi bagarapim na pinisim olgeta lain manmeri bilong Amelek." ¹⁵ Bihain Moses i mekim wanpela ston alta na i kolim dispela alta "God Yawe em i flek bilong mi." ¹⁶ Em i tok, "Wanpela tok promis i bin kamap long sia king bilong God, olsem God bai i pait wantaim ol lain manmeri bilong Amelek oltaim oltaim!"