8 ¹ Husait man i gat gutpela tingting? Husait i save long laip bilong ol samting i kamap? Gutpela tingting insait long man i save mekim pes bilong em i luk nais na i save senisim pasin bilong man. ² Mi tokim yu long bihaim strongpela toktok bilong king, bilong wonem God i mekim strongpela tok promis long lukautim em. ³ Yu noken i go autsait hariap long ai bilong em na noken pas wantaim samting em i no stret, bilong wonem king i save mekim wonem em i tingim long en. ⁴ Toktok bilong king i save bosim, olsem na husait bai tokim em, ''Yu mekim wonem?'' ⁵ Husait i bihainim strongpela toktok bilong king, i save abrusim bagarap. Bel bilong man i gat gutpela tingting i save luksave long raitpela taim bilong mekim samting. ⁶ Long olgeta samting, i gat raitpela wei bilong bekim tok na taim bilong bekim tok, bilong wonem ol hevi bilong man i bikpela tumas. ⁷ Nogat wanpela i save long ol samting bai i kam bihain. Husait i ken tokim em long ol samting i kamap? ⁸ I nogat wanpela man i save lukautim win bilong em yet na inap long stopim em yet long pulim win. I no gat wanpela man i gat pawa long dei bilong em long dai. I no gat wanpela i save lusim ami long bikpela pait, pasin nogut bai i no inap helpim ol lain husait i stap wokboi bilong en. ⁹ Mi luksave long ol dispela samting long bel bilong mi, mi tingting long olgeta samting i kamap aninit long san. I gat taim man i save mekim nogut long bagarapim narapela man. ¹⁰ Orait mi lukim taim ol man nogut i dai, ol i mekim gut long ol na kisim ol i go long gutpela hap ples bilong planim ol. Ol manmeri i stap long biktaun i toktok planti long pasin nogut ol dispela man nogut i bin mekim. Dispela tu i no gutpela. ¹¹ Taim ol i no mekim save hariap long ol man nogut long pasin nogut ol i bin mekim, em i save kirapim tingting bilong ol narapela man tu long mekim pasin nogut. ¹² Maski taim ol sin manmeri i mekim pasin nogut 100 taim na ol i stap laip yet longpela taim, mi save olsem em bai gutpela moa long ol manmeri i mas i gat daun pasin long God, olain husait i sanap long ai bilong em wantaim daun pasin. ¹³ Tasol man nogut i no inap stap gut, laip bilong em bai i no inap stap longpela taim. Em bai i stap liklik taim tasol olsem tewel na pinis bilong wonem em i no save givim biknem long God. ¹⁴ I gat narapela samting nogut i kamap, samting ol i mekim long dispela graun. Dispela i kamap long ol stretpela manmeri olsem em i kamap long ol manmeri nogut na em i kamap long ol manmeri nogut olsem em i kamap long ol stretpela manmeri. Mi tok dispela samting i no gutpela. ¹⁵ Mi laikim tumas amamas pasin, bilong wonem man i no gat gutpela samting aninit long san tasol long kaikai, dring na stap amamas. Amamas tasol bai i stap wantaim em long taim em i wokhat olgeta dei long laip bilong em we God i givim em aninit long dispela san. ¹⁶ Taim mi givim bel long save long gutpela tingting na save gut long ol wok i kamap long dispela graun, planti wok i kamap na i no gat gutpela slip bilong givim malolo long ai long nait na dei, ¹⁷ orait mi lukluk long olgeta samting God i wokim, tasol man i no inap long save gut long ol wok i kamap aninit long dispela san. Maski hamaspela taim tru man i wokhat long painim aut ansa, em i no inap painim ol. Maski man i gat bikpela save i ting olsem em i save tasol em i no save tru.