10 ¹ Olsem ol lang i dai insait long wel sanda na i mekim em i smel nogut, olsem tasol wanpela liklik longlong pasin inap bagarapim gutpela tingting na sindaun. ² Bel bilong ol gutpela man i save kirap long mekim stretpela pasin tasol bel bilong ol longlong man i save kirap long mekim pasin nogut. ³ Taim man i nogat gutpela tingting i wokabaut long rot, pasin bilong em i soim ol man olsem em i nogat gutpela tingting. ⁴ Sapos hetman bilong yu i kros na belhat long yu, yu noken lusim wok bilong yu. Pasin bilong i stap isi inap daunim bikpela belhat. ⁵ Mi bin lukim wanpela pasin nogut, wanpela asua i kam long ol hetman. ⁶ Ol i givim ol gutpela na bikpela wok long ol man i nogat gutpela tingting na ol liklik wok ol i givim long ol moni man. ⁷ Mi bin lukim ol kalabusman i sindaun long hos na i go na ol moni man i wokabaut long rot olsem ol kalabusman. ⁸ Sapos wanpela man i wokim bikpela hul, em yet inap pundaun i go insait long en na sapos wanpela man brukim banis bilong haus bai snek inap kaikai em. ⁹ Sapos wanpela man i mekim wok bilong brukim bikpela ston long maunten, hap ston inap bruk na paitim em na man i katim diwai long tamiok bai diwai i bagarapim em. ¹⁰ Sapos tamiok i no sap na man i no sapim bai em i mas taitim bun long katim diwai, tasol gutpela tingting i save kamapim rot bilong gutpela sindaun. ¹¹ Man i gat save long mekim snek i stap isi bai kisim helpim olsem wanem sapos em i no mekim em i stap isi na snek i kaikai em pinis. ¹² Ol toktok i kam long maus bilong man i gat gutpela tingting bai mekim gut long em tasol ol tok long maus bilong man i nogat save bai bagarapim em. ¹³ Taim man i nogat gutpela tingting i stat long toktok, ol tok kranki tasol i kam autsait na taim em i laik pinisim toktok bilong em, em i autim ol tok nogut tru. ¹⁴ Man i nogat gutpela tingting i save toktok planti tumas, tasol ol man i no save wanem samting bai i kamap. Husait man inap save, taim dispela man i dai pinis wanem samting bai kamap bihain? ¹⁵ Ol man i no gat gutpela tingting i save hat wok tru na pinisim strong bilong ol tasol ol yet i no save long rot i go bilong kamap long taun. ¹⁶ Graun, bikpela hevi bai kamap long yu sapos king bilong yu em i yangpela mangi na sapos ol hetman bilong yu i kirap long moning taim bilong wokim bikpela kaikai. ¹⁷ Graun, yu ken amamas sapos pikinini bilong ol bikman i stap king bilong yupela na ol hetman i kaikai long taim bilong en stret bilong kisim strong na i no long dring na spak nabaut. ¹⁸ Sapos man i les nabaut long stretim het bilong haus bai het bilong haus bai bruk i kam daun na bai ren i pundaun. ¹⁹ Kaikai i mekim man i amamas, wain i mekim bel bilong man i gutpela tru na moni i mekim olgeta wok man i laikim. ²⁰ Yu noken tok nogut long king long maus na long tingting na yu noken tok nogut long ol lain i gat planti moni taim yu i stap insait long rum slip bilong yu, long wanem ol pisin antap long skai bai kisim ol toktok bilong yu na i go tokaut long ol.