26 ¹ Taim yupela i kamap pinis long dispela graun, God Yawe i givim yupela olsem graun bilong yupela yet, long lukautim na stap long en, ² orait yupela i mas kisim ol nambawan hap kaikai bilong dispela graun God Yawe i givim yupela long en, na putim long basket na kisim i go long dispela ples God Yawe i makim olsem ples bilong em yet. ³ Yupela i mas tokim ol pris i wok long ol dispela dei olsem,'Nau long dispela dei mipela i luksave olsem God Yawe i givim mipela dispela graun olsem em i tok long givim ol lain tumbuna bilong mipela.' ⁴ Na pris i mas kisim dispela ol basket long han bilong yupela, na putim i go daun klostu long alta bilong God Yawe bilong yupela. ⁵ Yupela i mas tokim God Yawe bilong yupela olsem, 'Tumbuna bilong mipela em man long Aram. Em i go long Isip wantaim liklik namba bilong ol man, tasol long Isip ol i kamapim planti namba na ol i kamap strongpela kantri tru. ⁶ Ol Isip i mekim nogut long mipela na kalabusim mipela na ol i mekim mipela long wok olsem ol wokboi nating. ⁷ Tasol mipela i krai long God Yawe, God bilong ol papa bilong mipela na em i harim krai na lukim dispela pen mipela i pilim long wok kalabus bilong mipela. ⁸ God Yawe i kisim mipela i kam aut long Isip wantaim bikpela na strongpela han bilong en, wantaim bikpela pret na ol han mak na ol mirakel ⁹ na em i kisim mipela i kam long dispela ples na givim dispela graun long mipela, em graun i pulap long milk na hani. ¹⁰ Nau lukim, mi kisim dispela ol nambawan hap bilong dispela kaikai long dispela graun bilong yu God Yawe, i givim long mipela.Yupela i mas kisim dispela ol kaikai i go long God Yawe na lotu long em, ¹¹ na yupela i mas amamas long olgeta gutpela samting God Yawe, God bilong yupela i mekim long yupela, long haus bilong yupela yet, long ol Livai na ol man bilong narapela ples i kam stap wantaim yupela. ¹² Taim yupela givim pinis nambawan hap bilong kaikai long namba 3 yia, dispela em yia bilong givim olsem na yupela mas givim long ol Livai, ol man bilong narapela ples, long ol pikinini papa bilong ol i dai pinis na long ol meri man bilong ol i dai pinis, bai ol i kaikai na pulap na stap insait long biktaun. ¹³ Yupela i mas tokim God Yawe bilong yupela olsem, mipela i kisim ol samting long haus bilong mipela na givim long ol Livai, ol man bilong narapela ples, ol pikinini papa bilong ol i dai pinis na long ol meri man bilong ol i dai pinis, olsem olgeta lo yu bin givim long mipela long bihainim.Mi no bin sakim tok bilong yu na lusim tingting long bihainim. ¹⁴ Mi no bin kaikai wanpela bilong ol dispela kaikai long taim mi stap long sore na krai, mi no bin putim long sampela hap taim mi no stap stret long ai bilong yu na mi no bin givim long kisim biknem long man i dai tu, mi bihainim olgeta tok bilong God Yawe bilong mi na mi no sakim to bilong God Yawe na mi bihainim olgeta tok em i tokim mi long bihainim long en. ¹⁵ Yu save stap long heven long ples i holi tru na lukluk i kam daun long ol manmeri bilong yu, em ol Israel na mekim gut long dispela graun yu givim long mipela olsem yu bin tok long givim ol tumbuna lain bilong mipela, em graun i pulap long milk na hani, ¹⁶ Nau long dispela dei God Yawe bilong yupela i givim dispela strongpela tok long yupela. Olsem na yupela i mas bihainim olgeta tok na lo bilong em. Olsem bai yupela i holim pas dispela tok na bihainim wantaim olgeta bel na tingting bilong yupela. ¹⁷ Nau yu tokaut olsem God Yawe em i God bilong yupela, olsem bai yupela i wokabaut long pasin em i laikim na bihainim olgeta tok na lo bilong em na harim nek bilong em. ¹⁸ Nau long dispela dei God Yawe i tokaut klia olsem yupela ol manmeri bilong em yet, olsem em i promisim yupela, olsem na yupela i mas bihainim olgeta tok na lo bilong em, ¹⁹ na em bai mekim yupela kamap bikpela lain manmeri wantaim biknem i abrusim ol narapela kantri em i wokim na yupela bai kisim biknem i go antap tru. Na yupela bai i stap olsem ol manmeri tru bilong God Yawe, olsem em yet i bin tok."