8 ¹ Em i kamap insait long 20 yia, olsem Solomon i wokim haus bilong God Yawe na haus bilong em yet, ² olsem Solomon i wokim ol haus gen long diwai Hiram i bin givim long em na em i putim ol manmeri bilong Israel insait long ol. ³ Solomon i pait wantaim ol Amatsoba na i winim ol. ⁴ Em i wokim Tadmor long ples nating na ol biktaun bilong putim ol samting, em ol haus em i wokim long Hamat. ⁵ Em i wokim tu Bet Horon em Bet Horon antap na narapela long daunbilo, ol biktaun taun i gat ol geit na ol ain banis wantaim. ⁶ Em i wokim taun baalat na ol biktaun taun bilong putim ol samting em yet i gat na ol biktaun bilong putim ol karis na ol taun bilong ol man i save bosim ol hos na wanem ol taun em i wokim long amamas bilong em long Jerusalem, long Lebanon, na ol hap ples em i lukautim. ⁷ Olgeta manmeri husat i bin i stap bek long lain bilong ol Hit, ol Amor, ol lain Hivi na ol lain Jebus, husat i no bilong ol lain Israel, ⁸ ol tumbuna pikinini lain husat i stap bek long ples em ol husat ol lain Israel i no bin bagarapim ol, Solomon i mekim ol i kamap wokboi, olsem nau ol i save mekim wok yet nau. ⁹ Tasol Solomon i no mekim ol manmeri bilong ol Israel i wok strong. Tasol, ol i kamap ol soldia bilong em, ol ofisa bilong ol soldia na ol i kamap ol man i go pas long ol karis na ol man i save raun long ol hos. ¹⁰ Dispela em ol hetman na ol man i go pas na man i save bosim na skelim wok bilong king Solomon, namba bilong ol dispela man i kamap olsem 250 olgeta. ¹¹ Solomon i bringim pikinini meri bilong king Fero long biktaun bilong Devit na putim em long haus em yet i bin wokim long em. Em i tok, "Meri bilong mi i no ken i stap long haus bilong Devit king bilong ol Israel, long wanem hap bokis kontrak bilong God Yawe i bin kam long en em i stap holi." ¹² Na Solomon i mekim ofa bilong paia i kukim olgeta long God Yawe long alta klostu long dua bilong haus lotu em yet i wokim. ¹³ Em i mekim ofa bilong paia i kukim olgeta, olsem wok long wanwan dei. i bihainim wanem lo bilong Moses i tok, long ol sabat dei, long ol nupela mun na long tripela taim ol i makim long wanwan krismas, em ol bung bilong bret i no gat yis, bung bilong amamas long kaikai, na bung bilong i stap long haus win. ¹⁴ Long bihainim lo bilong papa bilong em Devit, Solomon i makim ol ples ol pris i mas wok long en na long ol livai long ol wok mak bilong ol, olsem wok mak bilong wanwan dei. Em tu makim ol man bai i was long wanwan geit long wanwan dei, olsem wokman bilong God Devit i bin tok. ¹⁵ Dispela manmeri i no tanim baksait long tok bilong King o ol pris na ol livai i mekim, wankain long wanem kain hevi i kamap long haus bilong putim ol samting. ¹⁶ Olgeta wok Solomon i tok long ol i mas mekim em i pinis, long taim ol i kirapim wok i go inap long taim ol i pinisim wok, Na olgeta wok bilong haus bilong God Yawe em i pinis gut tru. ¹⁷ Na Solomon i go long Esion Geba na i go long Elat long nambis bilong graun bilong Idom. ¹⁸ Hiram i salim ol sip bilong em wantaim sampela man na ol man i save long pasin bilong solwara na sampela wok man bilong Solomon long kantri Ofir na kisim gol hevi bilong en klostu16 ton na i kisim i kam givim long King Solomon.