7 ¹ Na taim Solomon i beten pinis, paia i kam daun long heven na i kukim olgeta ofa bilong paia i kukim olgeta na glori bilong God Yawe i pulapim haus lotu. ² Glori i pulap long haus lotu bilong God Yawe na ol pris i no inap i go insait long en. ³ Taim ol manmeri bilong Israel i lukim paia i kam daun na glori bilong God Yawe i karamapim haus lotu, ol i brukim skru na putim het bilong ol i daun long graun antap long ples ston bilong wokabaut na lotu na tok tenkyu long God Yawe. Ol i tok, "Long wanem em i gutpela na laikim bilong em bai i stap oltaim oltaim." ⁴ Olsem na king wantaim olgeta manmeri i mekim ofa i go long God Yawe. ⁵ King Solomon i kisim 22 000 bulmakau na 120 000 sipsip na memek na mekim ofa. Olsem na king wantaim olgeta manmeri i makim dispela haus em i bilong God stret. ⁶ Ol pris i sanap long hap na ol Livai tu i sanap wantaim ol samting bilong mekim musik i go long God Yawe, em ol dispela musik samting Devit i bin mekim long givim tenkyu long God Yawe insait long dispela song, "Long wanem laikim bilong em i save i stap oltaim oltaim. "Olgeta manmeri i sanap i stap na ol pris i winim biugel. ⁷ Solomon i makim wanpela hap graun i stap namel long ples bilong bung long pes bilong haus bilong God Yawe. Long dispela em i mekim ofa bilong ofa ol i kuim olgeta long paia na gris bilong mekim wanbel ofa, long wanem alta bras i liklik tumas long holim ol ofa bilong kukim olgeta long paia, wanbel ofa na ol gris. ⁸ Olsem na Solomon i mekim bikpela kaikai long dispela taim inap long 7-pela dei na olgeta Israel i stap wantaim em, ol bikpela lain manmeri i stat long Lebo Hamat i go inap long liklik wara bilong Isip. ⁹ Long namba 8 dei ol i bung wantaim, long wanem ol i stap 7 pela dei moa long makim alta i kamap samting stret bilong God na narapela 7- pela dei gen bilong makim bikpela kaikai. ¹⁰ Long namba 23 dei bilong namba 7 mun, Solomon i salim ol manmeri i go bek long ples bilong ol wantaim bel amamas bilong wanem God Yawe i bin mekim gut long Devit, Solomon na Israel ol manmeri bilong em. ¹¹ Olsem na Solomon i pinisim haus bilong God Yawe na haus bilong em yet. Olgeta samting Solomon i tingim long bel bilong em long mekim long haus bilong God Yawe na long haus bilong em yet, em i bin inapim tru. ¹² God Yawe i kamap long Solomon long nait na i tokim em, "Mi bin harim beten bilong yu na mi bin makim pinis dispela ples bilong mi yet olsem haus bilong mekim ofa. ¹³ Sapos mi pasim heven na i nogat ren o sapos mi tokim ol bikpela grashopa long bagarapim graun o sapos mi salim sua long skin bilong ol manmeri, ¹⁴ na sapos ol manmeri mi kolim long nem bilong mi yet, bai i daunim ol yet, beten, painim pes bilong mi na givim baksait long ol sin bilong ol, bai mi harim long heven , lusim sin bilong ol na mekim graun bilong yupela i gutpela gen. ¹⁵ Mi bai was na harim beten bilong ol manmeri i mekim long dispela ples. ¹⁶ Long wanem mi makim pinis na putim em olsem haus bilong mi stret bai nem bilong i stap long en oltaim oltaim. Ai bilong mi na bel bilong mi bai i stap long en olgeta dei ¹⁷ Olsem long yu ,sapos yu i wokabaut stret insait long ol pasin bilong papa bilong yu Devit na i bihainim olgeta toktok mi bin tokim yu na lukautim ol lo bilong mi. ¹⁸ orait mi bai mekim strong sia bilong kingdom bilong yu, olsem mi bin tok insait long kontrak wantaim Devit papa bilong yu, taim mi tok, ' Wanpela tumbuna bilong yu bai i stap bosman oltaim long Israel. ¹⁹ Na sapos yu givim baksait na i no bihainim ol tok na ol lo mi i givim yu na sapos yu go lotuim ol giaman god na brukim skru long ol, ²⁰ orait mi bai kamautim ol long graun bilong mi we mi i givim ol. Dispela haus mi bin makim bilong nem bilong mi bai mi rausim long pes bilong mi na mekim em olsem wanpela stori bilong tingim tasol o stori bilong lap namel long ol manmeri. ²¹ Olsem tasol dispela haus lotu i gat biknem nau, olgeta manmeri husait i wokabaut i kam olsem bai kirap nogut na mekim ol toktok i soim ol i no amamas. Ol bai askim, "Bilong wanem God Yawe i mekim olsem long dispela graun na haus lotu?" ²² Ol arapela bai i bekim, "Em i kamap bilong wanem ol i sakim tok bilong God Yawe god bilong ol husait i kisim ol tumbuna bilong ol i kam aut long Isip tasol ol i holim ol arapela giaman god na brukim skru na lotuim ol. Em i olsem tasol na God Yawe i bringim ol dispela bagarap antap long ol."'