31 ¹ Orait taim ol dispela i pinis, olgeta manmeri bilong Israel i go long biktaun bilong Juda na brukim ol ston tawa na ol i katim ol pos bilong Asera na ol i brukim ol alta long Juda na Benjamin na long Efraim na Manase, inap ol i bagarapim tru olgeta. Orait olgeta manmeri bilong Israel i go bek long wanwan ples bilong ol. ² Hesakia i makim wanwan lain bilong ol pris na ol Livai long mekim ol wok bilong ol. Em i makim ol long mekim ofa bilong paia i kukim olgeta na ofa bilong kamapim wanbel, long mekim wok na long givim tenkyu na amamas long haus lotu bilong God Yawe. ³ Na em i makim ol abus long banis bilong King long mekim ofa bilong paia i kukim olgeta long moning na long apinun na ofa bilong paia i kukim olgeta bilong ol de sabat, bilong nupela mun na ol narapela bikpela dei olsem ol i raitim long lo bilong God Yawe. ⁴ Na em i tokim ol manmeri i stap long Jerusalem long givim ol kaikai long ol pris na ol Livai bai ol i ken mekim wok bilong ol gut na bihainim lo bilong God Yawe. ⁵ Taim tok save i go long ol manmeri bilong Israel, kwiktaim tumas ol i givim nambawan hap kaikai bilong wit, wain, wel, hani, na ol kaikai bilong gaden. Ol i kisim namba10-hap bilong olgeta samting i kam na em i kamap bikpela tru. ⁶ Ol manmeri bilong Israel na Juda i stap long biktaun bilong Juda tu i kisim namba 10-hap bilong ol bulmakau na sipsip na namba 10-hap bilong ol samting ol i bin makim bilong God Yawe, God bilong ol na i kam bungim. ⁷ Long namba tri mun ol i stat long bungim ol samting bilong ol i go inap long namba 7 mun. ⁸ Taim Hesekia na ol lida i kam lukim dispela ol samting ol i bungim, ol i litimapim nem bilong God Yawe na ol manmeri bilong em Israel. ⁹ Orait Hesekia i askim ol pris na Livai long ol dispela ol samting ol i bungim. ¹⁰ Hetpris Asaria bilong lain bilong Sadok, i bekim tok bilong em olsem.''Taim ol manmeri i kisim ol ofa bilong ol i kam long haus bilong God Yawe, mipela i kaikai na i pulap, na planti moa i stap yet, long wanem God Yawe i blesim ol manmeri bilong em olsem na dispela hap i stap yet'' ¹¹ Orait Hesekia i tokim ol long redim bakstua insait long haus bilong God Yawe, olsem na ol i redim. ¹² Orait ol i bungim olgeta samting bilong ofa, ol namba ten hap na ol samting ol i makim bilong God Yawe. Konania bilong Livai i bosim dispela wok na brata bilong em Simei em i stap namba-tu bilong en. ¹³ Jehiel, Asasia, Nahat, Asael, Josabat, Eliel, Ismakia, Mahat na Benaia ol i wok aninit long Konania na Simei brata bilong en, olsem king Hesekia i bin makim na Asaria ofisa bilong haus bilong God. ¹⁴ Kore pikinini bilong Imna bilong Livai, em i stap long dua bilong hap san kamap i bosim ofa bilong ol manmeri i givim long laik bilong ol yet long God, em i tilim ol ofa bilong God Yawe na ol ofa bilong rum tambu. ¹⁵ Ol lain i wok aninit long Kore em Eden, Miniamin, Jesua, Semaia, Amaria na Sekania insait long biktaun bilong ol pris. Ol i kisim wok bilong tilim ofa inapim olgeta lain pris. Long ol lapun na ol yangpela. ¹⁶ Na ol i save givim ol pikinini man krismas bilong ol inap tripela yia na i go antap, ol i save raitim nem bilong ol long lista bilong lain tumbuna bilong ol insait long haus bilong God Yawe, olsem na ol i save bihainim na mekim wanwan wok bilong ol. . ¹⁷ Na ol i save tilim long ol pris bihainim lista bilong ol tumbuna bilong ol, wankain olsem long ol Livai, 20-yia na antap, inapim wanwan wok bilong ol. ¹⁸ Na ol i raitim nem bilong olgeta liklik pikinini, ol meri bilong ol wantaim ol pikinini man na ol pikinini meri bilong ol. Olgeta lain i gat wok bilong mekim ol i kamap klin. ¹⁹ Sampela pris long lain bilong Aron ol i stap long ol liklik ples klostu long ol biktaun na i gat sampela Livai i stap ol i save tilim kaikai i go long olgeta pris nem bilong ol i stap long lista bilong ol Livai. ²⁰ Hesekia i save mekim dispela long olgeta hap long Juda. Em i save mekim gutpela na stretpela pasin na em i save bihainim tru God Yawe, God bilong em. ²¹ Long olgeta wok em i mekim long haus bilong God na long bihainim lo na ol tok bilong God, em i save mekim wantaim olgeta bel bilong em olsem na olgeta samting em i mekim i save kamap gutpela tru.