30 ¹ Hesekia i salim tok long olgeta manmeri long Israel na Juda na tu em i raitim ol pas i go long ol manmeri long Efraim na Manase, olsem ol i mas kam long haus bilong God Yawe long Jerusalem, long mekim kaikai na amamas long bikpela de bilong tingim de God i larim ol Israel stap gut, God bilong ol Israel. ² Long wanem king wantaim ol ofisa na olgeta manmeri long Jerusalem i kam bung na pasim tok long mekim kaikai na amamas long bikpela de bilong tingim de God i larim ol Israel i stap gut long namba tu mun. ³ Ol i no inap long mekim kaikai na amamas long de na mun ol i bin makim pinis long mekim long wanwan yia, long wanem planti ol pris ol i no givim ol yet i go olgeta long God Yawe na ol i no stap klin long mekim wok pris na ol manmeri i no kam bung wantaim long Jerusalem. ⁴ Long tingting na lukluk bilong king na long olgeta manmeri em i gutpela na ol i wanbel long ol dispela samting i ken kamap long namba tu mun olsem ol i bin pasim tok. ⁵ Olsem na ol i wanbel long tokaut long olgeta manmeri long olgeta hap bilong Israel, long Berseba i go long Dan, olsem ol manmeri i ken kam long Jerusalem na mekim kaikai na amamas long tingim dei God i larim ol Israel i stap gut long God Yawe, God bilong ol Israel. Long wanem planti manmeri tru ol i no bin bihainim ol stia tok Moses wokman bilong God Yawe i bin raitim i stap long en. ⁶ Olsem na king wantaim ol ofisa ol i salim ol pas i go long olgeta hap bilong Israel na Juda. Long pas ol i tok, "Yupela ol manmeri bilong Israel, yupela kam bek long God Yawe, God bilong Abraham, Aisak na Israel, olsem na em bai tanim kam bek long yupela ol liklik lain husait i bin ranawe long han bilong ol birua bilong yupela, ol king bilong Asiria. ⁷ Yupela i noken kamap olsem ol tumbuna bilong yupela o ol brata bilong yupela, ol i bin brukim ol lo bilong God Yawe, God bilong tumbuna bilong ol, olsem na em i mekim ol arapela lain manmeri i kamap birua bilong ol na mekim nogut long ol na tok baksait long ol, nau yupela i ken lukim long ai bilong yupela. ⁸ Nau yupela i noken strongim bel bilong yupela olsem bipo ol tumbuna bilong yupela ol i bin mekim, tasol yupela i harim tok bilong God Yawe na kam insait long haus holi bilong em i stap oltaim na lotuim God bilong yupela, God Yawe, na em bai i no inap kros na belhat nogut long yupela. ⁹ Sapos yupela i tanim na kam bek long God Yawe, ol lain husait i bin kisim ol brata na ol pikinini bilong yupela i go olsem ol kalabus manmeri ol bai i sori long ol na larim ol i kam bek hia long graun bilong ol. God Yawe, God bilong yupela em i God bilong marimari na sori, em bai i no inap givim baksait long yupela, sapos yupela i kam bek long em.'' ¹⁰ Orait ol i kisim ol pas i go givim long ol wanwan biktaun bilong olgeta hap graun bilong ol Efraim na Manase, ol i go olgeta long graun bilong ol Sebulun, tasol ol manmeri long ol dispela hap ol i lap na tok pilai long ol. ¹¹ Tasol, sampela ol man long Asa, Manase na bilong Sebulun ol i daunim ol yet na ol i kam long Jerusalem. ¹² God Yawe i givim strong long ol lain Juda na ol i wanbel na ol i harim na bihanim ol tok bilong king na ol bosman, olsem God Yawe i tok. ¹³ Planti manmeri, bikpela lain manmeri tru i kam bung long Jerusalem long mekim kaikai na amamas long Dei Bilong Bret Nogat Yis long namba tu mun ¹⁴ Ol i kirap na rausim olgeta alta bilong paia i kukim olgeta na ol alta bilong kukim ol paura bilong kamapim smok i gat gutpela smel long Jerusalem, ol i tromoi olgeta i go insait long liklik wara Kidron ¹⁵ Orait ol i kilim ol yangpela sipsip bilong tingim de God i larim ol Israel i stap gut long dei 14 long namba tu mun. Ol pris na ol Livai ol i pilim sem, olsem na ol i daunim ol yet na tok sori na tok promis long mekim wok pris na ol i kisim ol ofa bilong paia i kukim olgeta i go insait long haus bilong God Yawe ¹⁶ Ol i sanap long ol ples ol i bin makim bilong ol wanwan lain famili, bihainim ol lo Moses wokman billong God Yawe i bin givim ol. Ol Livai kisim ol blut bilong ol abus na givim ol i go long ol pris na ol pris i kisim na tromoi ol blut antap long alta. ¹⁷ Long wanem i bin i gat planti ol pris na ol Livai ol i no bin mekim ol yet i kamap klin long ai bilong God Yawe ol i kam i stap long dispela bung. Olsem na ol Livai i kilim planti pikinini sisip bilong bikpela de bilong tingim de God i larim ol Israel i stap gut long mekim ofa bilong ol manmeri ol i no stap klin na ol i no inap long mekim ofa long God Yawe. ¹⁸ Planti manmeri tru, planti bilong ol i bilong lain Efraim na Manase, Isaka na Sebulun ol i no mekim ol yet stap klin long ai bilong God Yawe tasol ol i kaikai ofa sipsip olsem na ol i sakim lo Moses i bin givim long ol. Hesekia i prea long God olsem, '' Gutpela God Yawe yu i ken lusim ol rong bilong olgeta manmeri ¹⁹ husait ol i givim bel bilong ol long painim God, em God Yawe, God bilong ol tumbuna bilong ol, maski ol i no stap klin na i no bihainim ol lo bilong haus holi billong yu.'' ²⁰ Na God Yawe i harim prea bilong Hesekia na em i lusim ol sin bilong ol manmeri. ²¹ Ol manmeri bilong Israel husait i bin kam long Jerusalem long mekim kaikai na amamas long tingim Dei Bilong Bret Nogat Yis, ol i amamas tru long mekim olsem i go inap long 7-pela dei. Olgeta dei ol Livai na ol pris ol i singsing amamas wantaim ol gita, kundu na biugel samting na apim nem bilong God Yawe i go antap tru. ²² Hesekia i toktok na strongim olgeta Livai husait i save na klia long mekim wok bilong God Yawe. Olsem na ol i kaikai long dispela bung i go inap long 7-pela dei, long dispela taim ol givim ol ofa bilong bung na stap wantaim, ol tok sori na autim ol sin bilong ol long God Yawe, God bilong ol tumbuna bilong ol. ²³ Olgeta manmeri i bung na pasim tok long mekim kaikai na amamas i go moa long narapela 7-pela dei, na ol i mekim olsem wantaim bikpela amamas. ²⁴ Long wanem Heskia king bilong ol Juda i givim ol manmeri 1,000 bulmakau man na 7,000 sipsip olsem ofa, na ol ofisa i givim ol manmeri 1,000 bulmakau man na 10,000 sisip na meme. Bikpela namba tru bilong ol pris i mekim ol yet i kamap klin long ol i ken mekim wok pris bilong God Yawe. ²⁵ Olgeta manmeri bilong Juda wantaim ol pris na ol Livai na olgeta manmeri husait i bin kam long Israel na tu ol arapela manmeri husait i kam long graun bilong ol Israel na ol husait i save stap long graun bilong ol Juda, olgeta ol dispela manmeri ol i amamas tru. ²⁶ Olsem na ol i bin i gat bikpela amamas tru long Jerusalem, long wanem i no bin i gat dispela kain samting i bin kamap long Jerusalem bipo long taim bilong Solomon pikinini man bilong Devit, king bilong ol Israel. ²⁷ Orait ol pris na ol Livai i kirap na ol putim han bilong ol antap long ol manmeri na prea long ol. God Yawe i harim krai bilong ol na prea bilong ol i go antap long heven, ples Holi God Yawe i save stap long en.