29 ¹ Hesekia i kamap king taim em i gat 25 krismas, em i stap king inap 29 yia long Jerusalem. Nem bilong mama bilong em Abisa, em i pikinini meri bilong Sekaria. ² Em i mekim ol stretpela pasin long ai bilong God Yawe, olsem papa bilong en Devit i bin mekim. ³ Insait long namba wan yia bilong em i stap king, long namba wan mun. Hesekia i opim ol dua bilong haus lotu bilong God Yawe na em i stretim ol. ⁴ Em i kisim ol pris na livai i go insait na bungim olgeta long ples bilong bung long hap san kamap. ⁵ Na em i tokim ol, "Harim mi, yupela ol Livai. Stretim na klinim yupela yet na stretim na klinim haus bilong God Yawe, em God bilong ol lain tumbuna na rausim olgeta pipia long ples holi i go. ⁶ Ol lain tumbuna bilong yumi i brukim lo na mekim pasin nogut long ai bilong God Yawe, God bilong mipela. Ol i lusim em, tanim pes bilong ol long ples God Yawe i save stap na ol i givim baksait long en. ⁷ Tu ol i pasim ol dua bilong geit na mekim ol lam i dai, ol i no kukim paura i gat gutpela smel o mekim ofa bilong paia i kukim olgeta insait long ples holi i go long God bilong Israel. ⁸ Olsem na belhat bilong God Yawe i pundaun antap long ol Juda na Jerusalem na em i mekim ol i kamap man bilong pait na stap wantaim bikpela pret na i no stap aninit long em, yu ken lukim long ai bilong yu yet. ⁹ Olsem na ol papa bilong mipela i pundaun long bainat bilong ol bilong ol birua na ol pikinini man, pikinini meri na ol meri bilong mipela i stap long kalabus. ¹⁰ Nau em insait long bel bilong mi long mekim kontrak wantaim God Yawe, em God bilong Israel, olsem bai bikpela belhat bilong em i ken i lusim yumi. ¹¹ Ol pikinini man bilong mi, nau yupela noken les, God Yawe i makim yupela long sanap long ai bilong em, lotu long em na yupela bai i stap ol wokman bilong em na kukim ol paura i gat gutpela smel." ¹² Bihain ol lain Livai i kirap, Mahat pikinini man bilong Amasai, Joel pikinini man bilong Asaria bilong lain Kohat bilong Merari, Kis pikinini man bilong Abdi, Asaria pikinini man bilong Jehalelel bilong lain Geson, Joa pikinini man bilong Sima na Iden pikinini man bilong Joa, ¹³ long pikinini man bilong Elisafan, Simri na Jeuel na ol pikinini man bilong Asap, Sekaraia na Matania wantaim ¹⁴ ol pikinini man bilong Heman, Jehuel na Simei, ol pikinini man bilong Jedutun, Semaia na Usiel. ¹⁵ Ol i bungim ol brata bilong ol na ol i stretim na klinim ol yet na ol i go insait olsem king i tok, bihainim tok bilong God Yawe, long klinim haus bilong God Yawe. ¹⁶ Ol pris i go insait tru long haus bilong God Yawe bilong klinim, ol i bringim olgeta pipia ol i painim insait long haus lotu bilong God Yawe i go insait long ples bung bilong haus lotu. Ol livai i kisim i go autsait long liklik wara Kidron. ¹⁷ Nau ol i stat long stretim na klinim long namba wan dei bilong namba wan mun. Long namba 8 dei bilong mun ol i kamap long geit bilong haus bilong God Yawe. Na long 8-pela dei moa ol i stretim na klinim haus bilong God Yawe. Long namba 16 dei bilong mun ol i pinis. ¹⁸ Bihain ol i go long King Hesekia insait long haus king na tok, "Mipela i klinim olgeta haus bilong God Yawe, ol alta bilong mekim ol ofa bilong kukim wantaim olgeta samting bilong wok na tebol bilong bret i stap long rum tambu wantaim olgeta wok samting. ¹⁹ Na mipela i redim na stretim na klinim olgeta samting King Ahas i bin rausim taim em i givim baksait long God long taim em i stap king. Lukim, olgeta i stap pas long alta bilong God Yawe." ²⁰ Bihain King Hesekia i kirap long moning taim tru na bungim olgeta hetman bilong biktaun na em i go antap long haus bilong God Yawe. ²¹ Ol i bringim 7-pela bulmakau man, 7-pela sipsip man, 7-pela pikinini sipsip na 7-pela memek man olsem ofa bilong rausim sin bilong kindom, ples i stap klostu long alta na bilong ol Juda. Em i tokim ol pris na ol pikinini man bilong Aron long mekim ofa antap long alta bilong God Yawe. ²² Na ol i kilim ol bulmakau na ol pris i kisim blut na tromoi antap long alta. Bihain ol i kilim ol sipsip man na tromoi blut bilong ol antap long alta na ol i kilim tu ol pikinini sipsip na tromoi blut bilong ol antap long alta. ²³ Ol i bringim ol memek man bilong mekim ofa bilong rausim sin i go long king na ol manmeri i bung, ol i putim han antap long ol. ²⁴ Ol pris i kilim ol na mekim ofa bilong rausim sin wantaim blut antap long alta olsem pei bilong asua bilong olgeta Israel, king i tok ofa bilong paia i kukim olgeta na ofa bilong rausim sin ol i mas mekim bilong olgeta Israel. ²⁵ Hesekia i putim ol Livai insait long haus lotu bilong God Yawe wantaim ol bras na ol kainkain gita, em i mekim olsem bihainim toktok bilong Devit, Gat, em wokman bilong king na Profet Natan, long toktok i kam long God Yawe long maus bilong ol profet bilong em. ²⁶ Ol livai i sanap wantaim ol samting bilong Devit ol i save mekim musik na ol pris wantaim ol biugel. ²⁷ Hesekia i tokim ol long mekim ofa bilong paia i kukim olgeta antap long alta. Taim ofa bilong paia i kukim olgeta i stat, ol singsing bilong God Yawe i stat tu wantaim ol biugel na ol samting bilong mekim musik bilong Devit, king bilong ol Israel. ²⁸ Olgeta manmeri i mekim lotu na ol man bilong singsing i singim ol song na ol man bilong winim biugel ol i winim biugel, olgeta dispela samting i kamap i go inap ofa bilong paia i kukim olgeta i pinis. ²⁹ Taim ol i mekim ol ofa pinis, king wantaim olgeta lain husait i stap wantaim em i brukim skru na mekim lotu. ³⁰ Moa yet, King Hesekia na ol hetman i tokim ol Livai long singim ol song long litimapim nem bilong God Yawe wantaim ol tok bilong Devit na bilong Asap, wokman bilong king. ol i singim song wantaim amamas na ol i brukim skru na mekim lotu. ³¹ Bihain Hesekia i tok, "Nau yupela i stretim na klinim yupela yet long God Yawe. Kam long hia na bringim ol ofa na tenkyu ofa long haus bilong God Yawe." Olgeta manmeri i bringim ol samting bilong mekim ofa na tenkyu ofa na olgeta lain husait i gat gutpela bel i bringim ol ofa bilong paia i kukim olgeta. ³² Namba bilong ol ofa bilong paia i kukim olgeta ol manmeri i bringim i kam em, 70 bulmakau, 100 sipsip man na 200 pikinini sipsip. Ol i kukim olgeta dispela long ofa bilong paia i kukim olgeta i go long God Yawe. ³³ Ofa bilong stretim na klinim ol yet em 600 bulmakau man na 3,000 sipsip. ³⁴ Tasol ol pris i liklik lain tumas long rausim skin bilong ol ofa bilong paia i kukim olgeta, olsem na ol Livai, ol brata bilong ol i helpim ol inap wok i pinis na inap long ol pris i stretim na klinim ol yet. Ol Livai i lukaut gut tru long stretim na klinim ol yet winim ol pris. ³⁵ Na antap long dispela, i bin i gat planti ofa bilong paia i kukim olgeta, ol i mekim wantaim bikpela lotu ofa na ofa bilong dring long olgeta ofa bilong paia i kukim olgeta. Long dispela pasin bilong mekim lotu long haus bilong God Yawe i kamap gut. ³⁶ Hesekia i amamas, na ol manmeri tu i amamas, long wanem samting God i redim long ol manmeri bilong em, long wok i kamap hariap.