¹ Ari Yesus ago disaipel nenaq le yuw urumnib kazaq ban tugwahtiqiy, Uliq garasen gigo og saw ban. ² Gwahtiqim Yesus muy hulosim hitiqsamo mat araq ago bugaw meqinta inaq luwaqta hodhod hulosim in agerab tubol. ³ Mat na hodhodabmo luw os yaqta. Ossa mataw in wazan yo hiqiy yaqayta. ⁴ In mat na aben amub am wazan haiq. Ad in sen-ib am wazan haiqmo. Kam kabemmo in abensen sen-ib am waz yaqayta teq in sen na gibultayad ankap asenab usaqta na wolzilay yaqtamo. In mat awaz meqin diqtamo. ⁵ Sirisirimo zeqab teq taromab in teq garahab osad in ek tonad inmo ahol asan gig-ib watitayaqta. ⁶ Ari mat na anan Yesus in pesanmo bolsa ahol waqad in sibim bolim Yesus anog nib abakbakan ulum laquwim tur. ⁷ Turad in dedibmo lileyim bilam, Yesus ham, Ni God ulilibta atatin. Ni ya ezaq itonan bol? ham. Ya God ameb nibilenaiq ham. Ni santitiy hi yag ham. ⁸ NI ezaqgo Yesus tekomo tubulon, Bugaw meqin ham ni mat ka hulosad gawhtiq ham. ⁹ Haqan teq in susumun ug, Ni ninan ezaq? ham. Haqan in bilam, Ya inan kuluwmo ham. Na ezaqgo i mataw kabemmo diq ham. ¹⁰ Teq mat na anad awaz meqin amalib ame kabemmo Yesus bulonyaq, Ni saw kab bugaw higimuz haqyaq. ¹¹ Haqsa bul gihumaban araq ayahta didaq neqad garah amanmanib sinsinmo turiy. ¹² Tursa bugaw meqinta nagan ginad meqniysa Yesus buloniy, Ni i giqemid i bul ko gimuganib le woqiy haqiy. ¹³ Haqan Yesus bilam, Lehiy ham. Haqanmo mat aholib bugaw meqinta giqusiyta na gwahtiqim le bul na giduganib tuwoqiy. Waqanmo bul bunmo sibim woleh garah amanman-ib bay hi lek tonim yuw meb woqan yuw gineqanmo tumoq bugiy. Bul na bunmo ginulinan 2,000 nazaq. ¹⁴ Ari mataw bul giwamuzim osiyta na in daq na ahol waqad titukiy. Tukim lehad teq uliqab teq saw haresmo in nagah ahol waqiyta na awagamun tibilaqiy. Bilaqsamo on mataw huritim in nagah na ahol waqnan tilehiy. ¹⁵ Lehim in Yesus ago hib bolim mat kwaziqmo bugaw meqinta kabemmo amuganib usiyta na in ahol tuwaqiy. Mat na anad dimunta waqim tubusan welim osaq in ahol waqad tirabiy. ¹⁶ Rabsa mataw gimeb daq ahol waqiyta na in mat kwaziqmo bugaw meqinta aholib usiyta na awagamun gibilenad teq in bul ago bilaq toniy. ¹⁷ Bilaqan mataw na Yesus abeq yahad buloniy, ni saw ka huloseq leh haqiy. ¹⁸ Haqan Yesus le muyib tugwalsa mat bugaw meqinta aholib usan in gimuzta na in inmo lehan anad bilaqsa in anad awaz meqin amalib Yesus bulon yaq, ya ninmaq leh daiqyaq. ¹⁹ Haqan Yesus hulos. Hulosad in mat na bulon, ni ningo uliqab nisenlul gigerabmo leh ham. Leheq teq Iyahta daq iyah diqmo em nigta na teq in ni ninan anad meqniyta na ni gibilen ham. ²⁰ Haqan mat na saw anan Dekapolis haqayta nab lehim uliq bunmo luwad in nagah Yesus inmen amta na tibilaq bugyaq. Sa mataw bunmo huritim gihol turuh nemyaq. ²¹ Ari teq Yesus ago disaipel nenaq yuw kuroqan Galiliy urotim aqurumnib kozaq ban ta lehiy. Lehan mataw kabemmo bolim Yesus agerab humab tuwoliy, yuw na aqurumnib. ²² Humab wolim Yesus inaq nab ossa Juda gigo bit humab wolayta ago danmebta araq anan Zairus haqay na bolim Yesus asen agerab ahol hulosan wom. ²³ Ahol hulosan woqim osad in anad meqniysa ame kabemmo bulon yaq, yaqgo amun aw amikta tumoqnan diq tonaq haqyaq. Ni boleq niben aholib emeq wazid in ahol dimniyeq hi moqan haqyaq. ²⁴ Haqan Yesus in inaq ago bitab tilah. Lehsa on mataw Yesus muzim inaq lehad teq in aholib soqotim daq inaq leh yaqay. ²⁵ Lehsa aw araq sirisirimo ned huneg yaqta na in Yesus muzim mataw na nenaq tileh yaqmo. Ulig 12 nazaq, moq na aholib usta. ²⁶ Usa mataw gimeq inaqta santitiy ayahmo ug yaqayta, in ahol tidimniy daq haqyaq. Teq haiq aw na ago gimeq kabemmo mataw na gigo hib tuhulos bugta teq in ago moq na asit a hi hiqiy yaq. Haiqgam in aholib moq ayahmo diq iyaq. ²⁷ Ari aw na Yesus ahol awagamun huritim in anad tiqan, ya iben Yesus ago tubusan wazeq teq ya ihol tidimniy daq ham. ²⁸ Haqan in bilam, mataw biyahta na gilik manib gwatiqim nenaq lehad in Yesus abun ban loqimmo aben le in ago tubusan tuwaz. ²⁹ Wazimmo in ago ned murandiq nawaqmo tumay. Mayan aholib moq tihiqiyan in ahol tubulonyaq. ³⁰ Loyinsa Yesus ago zaway asor tuhulos ugim lahta na ago in ahol tiloyinmo. Nazaq iyan in ahol biliyim bilam, nog aben yaqgo tubusan waz? ham. ³¹ Haqan ago disaipel buloniy, ni mataw kabemmo soqot nigim ninaq le hayta ka a hi gibiyaq e? haqiy. ³² Haqan teq haiq. Yesus saw waqim leh bol, nog diq daq na amta na ago haqad. ³³ Sa aw na in naga aholib gwatimta na ago anad emad in tirab yaq. Rabad in bolim Yesus anognib abakbakan ulum laquwim turad nagah aholib gwatimta na in tibilaq bug. ³⁴ Bilaq bugan Yesus bulon, ya imiy ham ni ya inan helmo ham ta naqmo ni eman ni nihol tidimniy ham. Ningo moq tihiqiyan ni leh nigam dimniysa os ham ³⁵ Ari Yesus gamuk bilaqad nab tursamo Jairus ago bitab mataw asor osim bolim in gigo mat ayahta na danib ahol waqad buloniy, ningo amun aw tumom haqiy, nagaqgo i Tisa atuw a ta bolam? haqiy. ³⁶ Haqan Yesus gamuk na ago adek a hi emad in Jairus bulon, ni hi rab ham. Ni God amomo anan helmo haq ham. ³⁷ Haqad teq in on mataw bunmo giwasihan nab tursa in Pita teq Jems amam Jon inaq naqmo giwaqim ginaq tilah. ³⁸ Lehim in Jairus ago bitab tugwahtiqiy. Gwahtiqim in mataw ek tonad gaq wazad ossa tigibiy. ³⁹ Gibiyad in lehim gibilan, ne nagaqgo gaqad saw zunad osay? ham. Aun aw na a hi mom ham. In usaq ham. ⁴⁰ Haqan on mataw na bunmo in ezaq tiyuqwuniy. Yuquwunsa Yesus gimuzan asanib gwatisqa in amun anen amam teq inmo ago disaipel ezeqman na giwaqim nenaq bit aduganim amun usaqta nab le tugwahtiqiy. ⁴¹ Gwahtiqan in amun na aben wazim in Juda gigo nanib bulonim kazaq bilam, Amun aw amik, ni eraq ham. ⁴² Haqan hidmo in eraqim tiloq gelyaq. Amun aw na ayah tiqiy bugim in ago ulig 12 nazaq tiqiyta. Ad amun anen amam in nagah na gimeb ahol waqim in gihol turuh nem naqmo diq iy. ⁴³ Sa atoranmo gibilan, nagah ka ago ne mat araq hi kidik buloniy ham. Haqan in amun didaq ugid neqgo gibilan.