13 ¹ همه وَأستی دولتَ مطیع و اونِ قوانینَ اِحترام بند، چره کی قدرتی نییِه کی خدا طرفِ جَه نیبِه و جهانِ میَأن، همۀ قُدرتَأن و دولتَأنَ خدا برقرار بوکوده. ² پس هر کی کشورِ قوانینِ جَه سرپیچی بوکونه، در حقیقت خدا جَه نا ایطاعتی بوکوده و مُجازات بِهِه. ³ چون دوروستکاران کی دولتِ مأمورانِ جَه ترسی نَئرِد، بلکی خلافکاراند کی اوشَأنِ جَه ترسد. پس اگر خَأیی مأمورانِ جَه ترسی ندَأری و دیلواپسی میَأن نِئسی، قوانینِ جَه ایطاعت بوکون و همیشه آسوده خاطر بوبون. ⁴ دولتِ مأمور، جی خدا طرف وظیفه دَأره ترَه یاری بوکونه، ولی اگر خلافی بوکودی اونِ جَه بترس، چون هَأچین شمشیر نَئرِه، اون خدا خادمِ تا خدا غضبَ اِجرا بوکونه و هر کسی کی خطا بوکوده یَ مجازات بوکونه. ⁵ پس وَأستی قانونِ جَه ایطاعت بوکونید، نه فقط خدا غضبِ ترسِ وَسی، بلکی شیمی وجدانِ آسایشِ وَسی هم قانونَ مطیع بیبید. ⁶ هَ دو دلیلِ وَسی هم، وَأستی شیمی مالیاتَ فَأدید تا دولتِ مأمورانِ حقوق تهیه بیبِه، تا بتَأند خدا کارَ انجام بِدد، یعنی شومرَه خدمت بوکوند. ⁷ پس هر کسَ اونچی کی اونِ حقِ یَ اونَ فَأدید، اگر مالیاته، مالیاتَ فَأدید، اگر عوارضه، عوارضَ فَأدید، اگر اِحترامه، اِحترام بِنید، و کسانی کی عزّتِ سزاواردَ عزیز بدَأرید. ⁸ خودتانِ قرضَ فَأدید و کسی یَ بدهکار نیبید، فقط خودتانَ بدهکار بدَأنید کی هَمش مردمَ مُحبت بوکونید، هر کی دیگرانَ مُحبت کونه حقیقت اَن کی شریعتَ بجا بَأورده دَأره. ⁹ چون خدا اَحکام کی گویه؛ زِنا نوکون، قتل نوکون، دوزدی نوکون، طمع ندَأر و هر حُکمِ دیگری کی ایسِه، همه تَه در اَ حُکم خولاصه بوبُسته کی گویه:«تی همساده یَ تی جانِ مَأنستَأن دوس بدَأر.» ¹⁰ و کسی کی خو همساده یَ دوس بدَأره اونَ بدی نوکونه، پس تنها حُکمی کی اِحتیاج دَأرید مُحبته، و اگر مُحبت بوکونید همۀ شریعتَ بجا بَأورده دَأرید. ¹¹ مُحبت بوکونید چون وخت گوذشتَأن دِرِه، و اَمی زمان به آخر فَأرسَأن دِرِه، هَسَه دِ وَأستی جی خواب ویریزید، ایمروز اَمی نجات و اَمی خداوندِ وَأگردستَأن، جی اون روزی کی ایمان بَأوردیم نزدیکتره. ¹² شب تومامَ بوستَأن دِرِه و روز نزدیکه، پس تاریکی اَعمالَ، کُهنه رختِ مَأنستَأن فیشأنید و نورِ زِره یَ دوکونید. ¹³ جوری رفتار بوکونید کی کسانی سزاوار بیبِه کی روزِ روشنایی دورون ایسَأد و مردم اوشَأنَ دِئِن دَأرد. پس جی عَیاشی و مستی و زِنا و هَرزگی و حِسادت و دعوا دوری بوکونید. ¹⁴ همۀ شیمی وجود عیسی مسیح شین بیبِه، و جسمِ هوسَأنِ دونبال نیشید.