14 ¹ کسی یَ کی اونِ ایمان سُست تره، شیمی جمعِ دورون قبول بوکونید، بی اَنکی درباره اونِ عقاید اونِ مرَه جرّ و بَحث بوکونید. ² اینفرِ ایمان اونَ وَأله کی هر چی بوخوره، حتی گوشتِ حیوانی کی بُتِ رِه قربانی بوبُسته، اما دیگری کی اونِ ایمان سُست تره، اَ کارَه ایشتباه دَأنه و اصلاً گوشت نوخوره و فقط سبزیجات خوره، اَ چیزَأنِ وَسی همدیگرِ اَمرَه جرّ و بحث نوکونید. ³ پس اوشَأنی کی همه چی خورد، کسانی یَ کی نوخوردَ حقیر ندَأند، و کسانی کی پرهیز کوند، نوَأستی اوشَأنی کی همه چی خوردَه محکوم بوکوند، چره کی خدا اوشَأنَ قبول بوکوده دَأره. ⁴ اوشَأن خدا بنده یِد نه شیمی بنده، اوشَأن وَأستی فقط خدایَ جواب پس بدد نه شومرَه، پس وَألید خدا اوشَأنِ عقیده دوروستی یا نادوروستی یَ اوشَأنَ نیشان بِدِه، خدا قادره کی اوشَأنَ یاری بوکونه تا دوروسته راهَ پیدا کوند. ⁵ بعضیَأن خیال کوند کی مسیحیَأن وَأستی خدا عبادت کودَأنِ وَسی یهودیانِ مقدسِ روزَأنَ عزیز بدَأرد، بعضیَأنم گویده کی اَ کار ایشتباهِ و خدا همۀ روزَأن برابرد، اَجور مسائلِ دورون، هر کس وَأستی خوره تصمیم بیگیره. ⁶ اونی کی ایتَه مخصوصِ روزِ دورون خدایَ عبادت کونه، خدا وَسی اَ کارَه کونه و خَأیِه خدایَ خوشحالَ کونه، و اونی هم کی همۀ روزَأنَ برابر دَأنه، خدا وَسی اَ کارَه کونه و خَأیِه خدایَ خوشحالَ کونه، و هر کسی هم کی حیوانِ قربانی گوشتَ خوره، خدا وَسی خوره چون خدایَ شُکر کونه، و اونی هم کی نوخوره خدا وَسی نوخوره و خدایَ شُکر کونه. ⁷ چون هیچکودام جی اَمَأن فقط خودمانِ رِه زندگی نوکونیم و هیچکودام جی اَمَأن فقط خودمَأنِ رِه نیمیریم. ⁸ چون اگر زندگی کونیم خداوندِ رِه زندگی کونیم، و اگر بیمیریم خداوندِ رِه میریم، پس چی زنده بِمَأنیم چی بیمیریم، خداوندِ شینیم. ⁹ و هَنه وَسی بو کی مسیح بِمرد و زندَه بوست تا زنده یان و مُرده یانِ خداوند بیبِه. ¹⁰ پس تو چره تی برَأر خَأخورَ محکوم کونی؟ تو چی وَسی تی برَأر خَأخورَ حقیر کونی؟ به یاد بدَأرید همۀ اَمَأن خدا تختِ پِشِ جَه به پا ایسیم، تا اون اَمرَه قضاوت بوکونه. ¹¹ چون اِشعیایِ نبی کیتابِ دورون بینیویشته بوبُسته: «به خودمِ زندگی قسم کی هر زانویی می پِشِ جَه خمَه بِه، و هر زبانی خدا ورجَه اِعتراف کونه» ¹² پس هر کودام جی اَمَأن وَأستی خو حیسابَ خدایَ پس بده. ¹³ پس بهتره کی همدیگرَ محکوم نوکونیم و مسیحیانِ دیگرِ مسیرِ دورون مانع چَأنکونیم و کاری نوکویم کی اوشَأنِ ایمان سُستَ بِه. ¹⁴ اختیاری اَمرَه کی خداوند عیسی مسیح مرَه بدَه دَأره، اطمینانِ اَمرَه گوفتَأن دِرم، خوردنِ گوشتِ حیوانی کی بُتِ رِه قربانی بوبُسته اِشکال نَئره، ولی اگر کسی اَ کارَه نادوروست و گوناه بدَأنه، نوَأستی اَجور گوشتَ بوخوره، چون اگر بوخوره گوناه بوکوده دَأره. ¹⁵ اگر دینیدی اونچی کی خوردَن دَأرید شیمی برَأرَ ناراحتَ کونه، دِ نوَأستی او کارَه انجام بدید، وگرنه محبتِ راه و رسمَ رفتار نوکوده دَأرید. وَأنَألید شیمی خوردَنِ وَسی، کسی ایمان جی میَأن بیشه کی مسیح اونِ رِه خو جانَ فدا بوکود. ¹⁶ پس کاری نوکونید کی او کارِ انجامِ وَسی شیمی جَه بد بوگویِد، هر چن اگر او کار شیمی نظرِ جَه دوروست بیبِه. ¹⁷ چون خدا ملکوت، خوردَأن و وَأخوردَأن نییِه، بلکی عدالت و سلامتی، و شادی ایی ایسه کی روح القدس عطا کونه.