12 ¹ ای برَأرَأن، در برابرِ خدا اَ لُطف و رحمت، شومرَه اِلتماس کونم شیمی بدنَأنَ قربانی زنده و مقدسِ مَأنستَأن خدایَ تقدیم بوکونید، کی اَجور قربانی یَ خدا پسند کونه، شیمی عبادتِ روحانی و عاقلانه هَنه. ² اَ جهانِ مردمِ کردِکارَه تقلید نوکونید، بلکی وَألید خدا شیمی اَفکار عوضَ کونه تا بواسطۀ اون همۀ شیمی وجود تغییر پیدا کونه، تا بتَأنید خدا ایراده یَ درک بوکونید و اونچی کی مفید و کامل، و جی خدا نظر پسندیده ایسِه یَه، تشخیص بدید. ³ چون بواسطۀ اون فیضی کی مرَه عطا بوبُسته، شومرَه گویم، خودتانَ ویشتر جی اونچی کی ایسید به حیساب نَأورید، بلکی خودتَأنَ او مقدار ایمانی کی خدا شومرَه فَأدَه دَأره مرَه قضاوت بوکونید. ⁴ هوطو کی ایتَه بدنِ میَأن اَعضایِ زیادی وجود دَأره، ولی همه تَه ایته وظیفه نَئرِد، ⁵ اَمَأنم اگرچی زیادیم، وختی مسیح مرَه ایتَه بیهیم، همۀ اَمَأن ایتَه بدنَه چَأکونیم و هر کودامِ اَمَأن همدیگرِ اَعضائیم. ⁶ پس وَأستی عطایایِ مختلفی کی خدا بر طبقِ خو فیض، هر کودامِ جی اَمَأنَ عطا بوکوده یَ بکار بوبوریم. پس اگر کسی عطیه، نَبوته، وَأستی اونَ بسته به خو ایمان انجام بده، ⁷ اگر خدمته، خدمت بوکونه، اگر تعلیم دَئَنه، تعلیم بده، ⁸ اگر موعظه کودَنِه، موعظه بوکونه، اگر تَوان دَأره فقیرانَ کمک بوکونه، سخاوتمندی مرَه اَ کارَه بوکونه، اگر تَأنه رهبری بوکونه، جِدی بیگیره و پورکار بیبِه، و کسانی هم کی تَأند بیشکیفته دیلَأنَ آرامَ کوند، شادی و خوشی اَمرَه اَ کارَ بوکوند. ⁹ تظاهر نوکونید کی مُحبت کودَأن دَأرید، بلکی شیمی مُحبت، صادقانه و جی تَه دیل بیبِه، بَدی جَه بیزار بیبید و اونچی کی خوبه یَ سخت دوچوکید. ¹⁰ مُحبتِ مسیحایی مرَه همدیگرَ دوس بدَأرید و هر کودام جی شومَأن دیگری یَ ویشتر جی خودش اِحترام بوکونه. ¹¹ علاقه و شور و شوقِ اَمرَه خدایَ خدمت بوکونید. ¹² او نقشه ای وَسی کی خدا شیمی زندگی رِه دَأره شادمان بیبید، رنج و مصیبتِ میَأن صبور بیبید و دوعا کودَأنِ جَه خستَه نیبید. ¹³ هر وخت مقدسین چیزی اِحتیاج بِدَأشتد اونِ برطرف کودَأنِ رِه همکاری بوکونید و همیشه مهمانواز بیبید. ¹⁴ اوشَأنی رِه کی شومَرَه آزار دِهِد، برکت بخَأئید، برکت بخَأئید و لعنت نوکونید. ¹⁵ کسانی مرَه کی شادماند، شادی بوکونید و کسانی مرَه کی گریاند، گریه. ¹⁶ همدیگر رِه اَرزشِ برابر قائل بیبید، مغرور نیبید، بلکی کسانی مرَه کی طبقۀ محرومِ جَه یِد، بینیش ویریز بوکونید و خودتانَ دیگرانِ جَه بوجُرتر ندَأنید. ¹⁷ هیچموقع بدی عوض، بدی نوکونید، مراقب بیبید شیمی کردِکار مردمِ چومِ پِش خوب بیبِه. ¹⁸ تا او جایی کی ایمکان دَأره و شومرَه مربوط بِه، همۀ مردمِ مرَه صُلح و صَفا دورون زندگی بوکونید. ¹⁹ ای عزیزان، هیچموقع شیمی انتقامَ نیگیرید، بلکی اونَ مکافاتِ خدایی یَ واگذار بوکونید. چون کیتابِ مقدسِ تثنیه دورون بینیویشته بوبُسته: «خداوند گویه؛ انتقام می شینه، منم کی جزا دِهِم» ²⁰ و بازم بینیویشته بوبُسته: «اگر تی دوشمنَ ویشتایِه، اونَ سِئرَ کون و اگر عطش دَأره اونَ آب فَأدن، چون تی اَ کار، اونَ شرمنده کونه» ²¹ بدیَ تسلیم نیبید، بلکی خوبی کودَأنِ اَمرَه، بدیَ تسلیم بوکونید.