76 ¹ خدا یهودیه میَأن معروفه و اونِ نام اسرائیلِ میَأن عظیمه. ² خدا خانه اورشلیمِ میَأن نَهه و کوهِ صَهیونِ رو ساکنه. ³ اون اویَ دوشمنِ تیر و کمانَ بیشکینه و اونِ شمشیر و سپر، و همۀ اونِ سلاح هانَ نابودَ کود. ⁴ تو پور جلالی، تو عظیم تر و پور شکوه تر جی همۀ کوه هانی. ⁵ دوشمنانِ دلاوران غارت بوبُسته دَأرد و مرگِ خواب بوکوده دَأرد، همۀ اوشَأنِ جنگجو مرداکأنِ میَأن اینفرم نِئسَه بو کی خو دسَ اَمی طرف درازَ کونه. ⁶ ای یعقوبِ خدا وختی تو اوشَأنَ تشر بوشویی، اوشَأنِ اسبان و ارابه یان خوشَأنِ جا سر خوشکَ بوستد. ⁷ تی هیبت عظیمه، وختی کی تو عصبانی بی کی تَأنه تی حضورِ جَه بِئسِه؟ ⁸ جی آسمان داوری یَ اعلام بوکودی، وزمین بترسه و ساکت بِسَه. ⁹ اونموقع کی خدا داوری رِه ویریزه تا همۀ مظلومانَ خلاصَ کونه. ¹⁰ انسانِ خشم جُز اَنکی ترَه ستاش بوکونه، نتیجۀ دیگری نَئره. تو انسانِ خشمَ مهار کونی و تی قدرتِ نشان دَئَنِ رِه اونِ جَه بهره بوری. ¹¹ شیمی خدا یَهوَه رِه نذر بوکونید و اون نذرانَ اَدا بوکونید. ای اسرائیلِ همساده یان، اَ خداوندِ عظیمه رِه هدیه بأورید. ¹² اون حاکمانِ مغرورَ نابودَ کونه و جهانِ پادشاهانِ دیلِ میَأن وحشت تَأوَأده.