62 ¹ می جان فقط خدا حضورِ جَه آرام گیره، چره کی می نجات اونِ طرفه جَه یه. ² اون تنها نجات دهنده و می پوشت و پناهه، پس هیچ موقع شکست نوخورم. ³ تا کِی خَأئید مردیَ فوتورکید و اونَ بوکوشید کی حصارانِ مَأنستَأن خمَ بوسته و فوکوردَأستَأن دره؟ ⁴ شیمی فکر فقط اَنه کی اونَ اونِ مقامِ جَه بیجیر بأورید، شومَأن دوروغَ دوست دَأرید، خودتَأنِ زبانِ اَمرَه اونَ برکت دهید ولی شیمی دیلِ میَأن اونَ لعنت کونید. ⁵ ای می جان، فقط خدا ورجَه آرامَ بون، چره کی می اُمید فقط اونه. ⁶ اون تنها نجات دهنده و می پوشتیبانه، اون می محافظه، پس هیچموقع شکست نوخورم. ⁷ می نجات و سر بلندی خدا طرفه جَه یه، خدا می قوّت و می پوشت و می پناهگاهه. ⁸ ای مردم، همیشه اونَ توکل بوکونید و خودتانِ مشکلاتَ اونَ بوگوئید، چره کی خدا اَمی پناهگاهه. ⁹ همۀ مردم، چی کوچدانه و چی پیلدانه، ناچیزد و ایتَه نفس ویشتر نییِد، اگر همه تَه یَ ترازو رو وزن بوکوند بادِ جَه هم سبکترد. ¹⁰ ظلمَ توکل نوکونید و اونچی یَ کی دوزدی جَه بدس اَورید اُمید ندَأرید، هر چقدرم شیمی دارایی زیادَه بِه اونَ دیل دنوَدید. ¹¹ بارها بیشتَأوسته دَأرم کی خدا بفرماسته: قدرت خدا دس نَهه. ¹² ای خداوند رحمتم تی طرفه جَه یه، و تو هر کسَ مطابقِ اونِ کاران جزا دهی.