61 ¹ ای خدا می فریادَ بیشتَأو و می دوعایَ اجابت بوکون. ² اَ غریبِ سرزمینِ جَه ترَه دخَأنم، وختی می دیل پریشانه، مرَه ایتَه مطمئنه پناهگاهَ هدایت بوکون. ³ چره کی تو می پوشت و پناه بویی و دوشمنانِ برابرِه جَه مرِه پناهگاه مَأنستَأن. ⁴ تا اَبدالآباد تی خیمه میَأن ساکن بوم و تی بالانِ سایه جیر پناه گیرم. ⁵ چره کی خدا تو می نذرانَ بیشتَأوسته ای و برکاتی یَ می نصیب بوکوده ای کی اوشَأنَ کسانی یَ بخشی کی تی جَه ترسد. ⁶ پادشاه عُمرَه درازَه کون تا سالهای سال و نسلای زیادِ رو سلطنت بوکونه، ⁷ و تی حضورِ جَه ای خدا، تا اَبد حکومت بوکونه، خودتِ محبت و وفاداری همیشگی اَمرَه اونِ جَه محافظت بوکون. ⁸ پس تی نامَ تا اَبد ستایش کونم و هر روز خودمِه نذرانَ اَدا کونم.