52 ¹ ای آدمِ قدرتمند، چره بدیَ افتخار کونی؟ خدا محبت همیشه پا برجایه. ² ای حیله گر تی زبان ایتَه تیزه تیغِ مَأنستَأن دیگرانِ نابودی رِه نقشه کِشه. ³ بدی یَ ویشتر جی خوبی دوس دَأری و دوروغَ ویشتر جی راستی. ⁴ ای دغل باز همۀ گبانِ مرگبارَ دوس دَأری. ⁵ خدا هم ترَه تا اَبد هلاکَ کونه، و ترَه، تی خانه جَه بیرون فَأکشه و تی نسلَ زنده یانِ زمینِ جَه تَأوَأده. ⁶ عادلان اَنَ دیند و ترسد، و ترَه خنده گیرد ⁷ و گوید: اَهان، اَ کسیه کی خدایَ توکل نوکود، بلکی خو ثروت و مال و منالَ توکل کوده و شریرَ پناه بوبورد. ⁸ ولی من سبزِ زیتونِ دارِ مَأنستَأنم کی خدا خانه میَأن بوجُر اَیه. من تا اَبد خدا رَحمتَ توکل دَأرم. ⁹ اونچی وَسی کی مرَه بوکوده ای تا اَبد ترَه شُکر کونم و همۀ مقدسانِ ورجَه تی نامَ اعلام کونم و گویم کی تو مهربانی.