51 ¹ خدایا، تی محبتِ همیشگی وَسی مرَه رَحم بوکون، و تی کرمِ بی پایانِ جَه می گوناهانَ ببخش. ² مرَه می گوناهانِ جَه بوشور و می خطایانِ جَه پاکَ کون. ³ چون من می تقصیرانَ اعتراف کونم و می گوناهان همیشه می چومِ جولو نَهَه. ⁴ بر علیه تو، بله بر علیه تو ای خداوند گوناه بوکوده دَأرم، و اونچی کی تی نظرِ جَه بده یَ انجام بدَه دَأرم، هَسَه تو حق دَأری مرَه داوری و محکوم بوکونی. ⁵ من تقصیرکار بودونیا بأموم، جی هو لحظه ای کی می مار مرَه حامله بوبُست من گوناهکار بوم. ⁶ تو صداقت و راستی طرفداری، پس می فکرَ حکمتِ جَه پورَه کون. ⁷ مرَه زوفا اَمرَه پاکَ کون تا طاهر بوبوم، و مرَه بوشور تا برفِ جَه سفیدترَ بوم. ⁸ ای کی می استخوانانَ بوکوبُسته ای، لذت و خوشی یَ دوباره مرَه وَأگردَأن تا می جان ایبار دیگر شاد بیبِه. ⁹ می گوناهانَ ندید بیگیر و می تقصیرانَ ببخش. ¹⁰ ای خدا می دورونِ جَه دیلی پاک خلق بوکون و روحی اُستوار مرَه عطا بوکون. ¹¹ مرَه خودتِ حضورِ جَه بیرون تَأنوَأد و تی روحِ قدوسَ می جَه فَأنگیر. ¹² خودتِ نجاتِ شادی یَ دوباره مرَه وَأگردَأن و مرَه یاری بوکون تا ذوق و شوقِ اَمرَه ترَه ایطاعت بوکونم. ¹³ بازن تی اَحکامَ خطاکارانَ تعلیم دهم و گوناهکاران تی طرف وَأگردد. ¹⁴ ای خدایی کی می خدای نجات ایسی، مرَه جی خونریزی دورَه کون تا می زبان ایبار دیگر تی عدالتِ سرودَ بخَأنه. ¹⁵ خداوندا، مرَه قدرت بدن تا بتَأنم دهن بازَه کونم و ترَه ستایش بوکونم. ¹⁶ تو قربانی دوست نَئری وگرنه تقدیم کودم، تو سوختنی قربانی یَ پسند نوکونی و خوشحالَ نیبی. ¹⁷ خدایا، می قربانی می بیشکفته دیله، تو بیشکفته دیل و خوردَه بوسته روحَ خوارَ نوکونی. ¹⁸ خداوندا، خودتِ لطفِ وَسی صَهیونَ احسان بفرما و اورشلیمِ حَصارانَ دوباره چَأکون. ¹⁹ اونموقع جی قربانی یانِ شایسته راضی بیهی، قربانیانِ تمام سوز و قربانی یانِ کاملِ جَه، بازن تی مذبحِ رو گوساله یانَ تقدیم کوند.