50 ¹ یَهوَه، خدایانِ خدا گب زنه و جی مشرق تا مغرب همۀ مردمَ خو ورجَه دخَأنه. ² جی صهیونِ کوه، کی مظهرِ زیبائیه، خدا جلالِ نور تاوِه. ³ اَمی خدا اَیِه ولی نه آرام و بیصدا، بلکی ایتَه آتشِ سوزانِ اَمرَه کی اونِ پیشاپیش حرکت کونه و طوفانِ شدیدی کی اونِ دؤرَ بیگیفته دَأره. ⁴ آسمان و زمینَ دخَأنه و شاهد گیره تا خو قؤمَ داوری بوکونه. ⁵ اون فرمایه: می مقدسانَ کی خوشَأنِ قربانی یَأنِ اَمرَه می اَمرَه عَهد دوسته دَأردَه می ورجَه جمعَ کونید. ⁶ آسمانان اعلام کوند کی اون عادله، چره کی خدا خودش داوره. ⁷ ای می قؤم بیشتَأوید من خَأیم گب بزنم، ای اسرائیل بدَأنید کی من خدایم، من خودم بر علیه شومَأن شهادت دهم. ⁸ من قربانی های سوختنی و شیمی دیگر قربانیانِ رِه شمرَه سرزنش نوکونم، چره کی اوشَأنَ همیشه مرِه تقدیم کونید. ⁹ من تی خانه گوساله و تی گله بُزَ احتیاجی نَئرم. ¹⁰ چره کی همۀ جنگلِ حیوانان و همۀ چهارپایانی کی هزاران کوه رو چرا کودَأن درد، میشیند. ¹¹ همۀ پرنده یانی کی کوه هانِ رو پرواز کوند و تمامِ صحرا حیوانان میشیند. ¹² حتی اگر ویشتا هم بوبُسته بِم شمرَه نوگوفتم، چره کی من همۀ جهانِ مالکم و هر چی اونِ میَأن نَهَه میشینه. ¹³ مگر من گاوِ گوشتَ خورم یا بُزِه خونَ وَأخورم؟ ¹⁴ شیمی شُکرگزاری شیمی قربانی بیبه و قولهایی کی خدایِ متعالَ بدَه دَأریدَه وفا بوکونید. ¹⁵ پس سختی و مشکلاتِ موقع مرَه دخَأنید تا شمرَه نجات بدم و شومَأنم مرَه ستایش بوکونید. ¹⁶ ولی خدا شرورَ گویه: به تو چی کی می اَحکامَ به زبان بأوری و دربارۀ می عهد و پیمان گب بزنی؟ ¹⁷ چون اِصلاح بوستَأنِ جَه نفرت دَأری، و می اَحکامَ پوشتِ گوش تَأوَأدَه ایی. ¹⁸ وختی دوزدَ دینی ترَه خوش اَیه و زِناکارانِ اَمرَه بینیش ویرز کونی. ¹⁹ تی دَهنَ شرارتِ رِه بازَه کونی و تی زبانَ دوروغَ عادت بدَه دَأری. ²⁰ نیشته ای تا بر ضدِ تی برَأر بد گویی بوکونی و اونَ تهمت بزنی. ²¹ تو همۀ اَ کارانَ بوکودی و من چیزی نوگوفتم، تو گمان بوکودی کی منم تی مَأنستَأنم، ولی هَسَه ترَه سرزنش کونم و محکوم بی. ²² ای کسانی کی خدایَ فراموشَ کوده اید، مرَه گوش بوکونید، وگرنه شمرَه هلاکَ کونم و فریاد رسی نَئرید. ²³ اونی کی مرَه شُکر و ستایش کونه مرَه احترام بنَه دَأره، هر کی خو راهَ راستَ کونه و می جَه ایطاعت بوکونه، من خدا نجاتَ اونَ نشان دهم.