49 ¹ ای همۀ قؤمَأن اَنَ بیشتَأوید. ای جهانِ مردمان گوش بوکونید. ² ای ای عوام و ای خواص، ای فقیر و ثروتمند. ³ می زبان حکمتِ جَه گب زنه و می دیلِ فکرِ جَه فَهم جاریه. ⁴ مثلأنَ توجه کونم و وختی چنگ نواختن درم اونِ معنی یَ گویم. ⁵ چره مصیبتِ روزانِ دورون ترسان بوبوم؟ یا موقعی کی دوشمنان مرَه محاصره بوکوده دَأرد. ⁶ اَشَأن مردمی ایسد کی خوشَأنِ ثروتَ توکل دَأرد و خوشَأنِ مال و اموالِ فراوانی یَ افتخار کوند. ⁷ هیچ وخت کسی نِتَأنه خو برَأرِ جانِ کفاره یَ فَأده و نتَأنه اونِ خونِ قیمتَ خدایَ پرداخت بوکونه. ⁸ چره کی ایتِه آدم جانِ کفاره خیلی گرانه و هیچ قیمتی کافی نیه ⁹ تا کسی تا اَبدالآباد زنده بمَأنه، و مرگ و فسادَ نیدینه. ¹⁰ همه دینیم کی حتی حکیمانم میرد و هَطو جاهلان و اَبلهانم میرد، همۀ اَشَأن خوشَأنِ ثروتَ وارثانِ رِه باقی نِهد. ¹¹ اوشَأن فکر کوند کی اوشَأنِ خانه یان دائمی و همیشگی یه، هَنه وَسی خوشَأنِ نامَ نهد خوشَأنِ خانه یان و زمینانِ رو. ¹² ولی حُرمت و مقام آدمَ مرگِ جَه نجات نده، بلکی آدمانم حیوانانِ مَأنستَأن میرد. ¹³ اَ کسانی سرنوشته کی خودشانَ توکل دَأرد و هَطو کسانی سرنوشت کی اَجور اشخاصِ جَه پیروی کوند. ¹⁴ اوشَأن گوسفندانی یَ مَأند کی مرگَ محکوم بوبُستد و اوشَأنِ چوپان مرگه، صبحِ موقع دوروستکاران اوشَأنَ شکست دهد و اوشَأنِ جسد قبرِ میَأن پوسِه به دور از اوشَأنِ کاخان. ¹⁵ ولی خداوند می جانَ مُرده یانِ عالمِ جَه نجات دِهه. ¹⁶ پس وختی بیده ای کسی مال و اَموال، و اونِ خانه شکوه زیادَه بوست، آشفته نوبون، ¹⁷ چره کی وختی بیمیره، چیزی خو اَمرَه نوبوره و اونِ دارایی اونِ دونبال سر قبرِ دورون نیشه. ¹⁸ هر چقدم اون خو زندگی دورون خوشبخت بیبِه و مردم اونِ موفقیتِ وَسی اونِ جَه تعریف بوکوند، ¹⁹ ولی بازم آخر سر میره و شِه خو اَجدادِ ورجَه و دِ هیچموقع نورَ نیدینه. ²⁰ ثروت و مقام کسی یَ مرگِ جَه نجات نده و آخر سر اونم حیوانانِ مَأنستَأن میره.