38 ¹ خداوندا، وختی کی خشمگینی مرَه مجازات نوکون. ² تی تیران می بدنِ میَأن فرو بوشوئه و مرَه به زمین بزَه دَأری. ³ تی خشمِ وَسی عذابِ شدیدی میَأن ایسَم، می گوناهانِ وَسی همۀ می استخوانان خوردَ بوسته. ⁴ چون می گوناهان می سرِ جَم دوَأرسته و مرِه سنگینِ بار بوبُسته. ⁵ می حماقتِ وَسی می بدنِ زخمان چرک بوکوده و بوو بیگیفته دَأره. ⁶ خودمِه دور پیچ و تاب خورم و می قامت خمَ بوسته و همۀ روز ناله کونم و اَطرف و اوطرف شؤم. ⁷ می کمر جی دردِ زیاد سوزش کونه و می بدنِ همه جا درد کونه. ⁸ می بدن بی حسَ بوسته و جی پا دکفته دَأرم و خودمِه دیلِ غَم و غُصه وَسی ناله کونم. ⁹ خداوندا، تو می دیلِ ناجِه جَه خبر دَأری و می ناله یَأن تی جَه مخفی نیه. ¹⁰ می دیل توند زنه می قوت بوشو دَأره و نوری می چومَأن میَأن نمَأنسته. ¹¹ می دوستان و می همساده یان اَ بلایی وَسی کی می سر بأمو دَأره می جَه دوری کوند و حتی می خیشَأن می جَه فرار کوند. ¹² اوشَأنی کی می جانِ قصدَ دَأرد مرِه دام نهد، و اوشَأنی کی خَأید مرَه اذیت بوکوند، مرَه تهدید کوند و تمامِ روزَ مرِه نقشه کشد. ¹³ اما من ایتَه کرِ مَأنستَأن بوبُسته دَأرم کی نیشتَأوه و لالی مَأنستَأن کی گب نزنه، ¹⁴ بله، کرَأنِ مَأنستَأن نیشتَأوم و لالانِ مَأنستَأن نِتَأنم جواب بدم. ¹⁵ ولی خداوند من ترَه توکل دَأرم، و تو یَهوَه ای می خدا، تو می جوابَ دهی. ¹⁶ من تی درگاهَ دوعا کونم و تو وَأنَأل کی اوشَأن می ناراحتی جَه خوشحال بود و خوشَأنَ می جَه بوجُرتر بدَأند. ¹⁷ می جان به لب فَأرسه دَأره و جی درد لحظه ای آرام نَئرم. ¹⁸ من می گوناهانَ اعتراف کونم و جی خطایانی کی بوکوده دَأرم پشیمانم. ¹⁹ می دوشمنان سالم و قوید و اوشَأنی کی هَچین می جَه نفرت دَأرد زیادد. ²⁰ اوشَأن می خوبی یَ بدی اَمرَه جواب دهد و می اَمرَه مخالفت کوند، چره کی من سعی کونم دوروستکاری یَ پیروی بوکونم. ²¹ ای خداوند مرَه تنها ننن، ای خدا می جَه دورَه نوبون. ²² ای خداوند، تو می نجات دهنده ایی، می نجاتِ رِه عجله بوکون.