3 ¹ خداوندا، می دوشمنان چقده زیادَ بوسته دَأرد، خیلیان بر ضدِ من ویریشتد. ² خیلی کسان دربارۀ من گب زند و گویده: خدا اونِ داد فَأنرسه، اونِ رِه نجاتی نییه، ³ اما ای خداوند، تو می دؤرِ رِه سپری ایسی و خطرِ جَه مرَه محافظت کونی، تو می جلال و می سر بلندی ایی. ⁴ خداوندَه آوازِ بلندِ اَمرَه دخَأدِم، و اون خو کوهِ مقدسِ جَه مرَه اجابت بوکود. ⁵ من درازَ کشم و خوسم و جی خواب ویریزم، چره کی خدا می جَه مراقبت کونه. ⁶ هیزاران هیزار دوشمنِ جَه کی جی هر طرف مرَه دؤرَ کوده دَأرد ترسی نَئرم. ⁷ ای خداوند، ویریز، ای خدا مرَه نجات بدن، چره کی می دوشمنانَ سِزا دهی و اوشَأنِ دندانانَ ایشکینی. ⁸ نجات جی خداونده طرفه و اون خو قؤمَ برکت دهه.