10 ¹ خداوندا، چره دور ایسأیی؟ چره سختی موقع ترَه جیگا دیهی؟ ² شریران غرورِ اَمرَه فقیرانَ ستم کوند، و اوشَأنَ نقشه یأنی دورون کی بِکِشه دَأرد گرفتار کوند. ³ چره کی شریران افتخار کوند کی اَجور نقشه دَأرد، اوشَأن طمعکارانِ جَه تعریف کوند ولی خدایَ فُحش دهد و لعنت کوند. ⁴ شریران غرورِ اَمرَه گوید؛ بازخواست نوکونه، همۀ اوشَأنِ فکر اَنه کی اصلاً خدایی وجود نَئره. ⁵ اوشَأن خوشَأنِ کارانِ دورون همیشه موفق بود. و خوشَأنِ دوشمنانَ هیچ حساب کوند و خدا احکامَ توجهی نئرد. ⁶ خوشَأنِ دیلِ میَأن گوید: مرَه هیچی نیبه و هیچ موقع مشکلی پیش نَأیه. ⁷ اوشَأنِ دهَن پوره جی دوروغ و نفرین و تهدیده، و اوشَأنِ زبانِ جَه شرارت و گوناه وَأره. ⁸ دهاتانِ نزدیکی جیگا خورد و مردمِ بی گوناهه رَأفأ ایسَد و اوشأنِ چومَأن چرخه تا بیچاره یانَ گرفتارَه کوند. ⁹ شیرِ مَأنِستَأن خوشأنِ جا میَأن کمین کوند و مردمِ فقیر بیچاره رَأفأ ایسَد تا اوشأنَ به دام تَأوَأدد. ¹⁰ بیچاره مردم، اوشَأنِ ضرباتِ مرَه خوردَ بود و اوشَأنِ قدرتِ اَسیر بود. ¹¹ اَ شریران خوشَأنِ دیلِ میَأن گوید: خدا فراموشَ کوده، اون خو رویَ وَأگردَأنِه دَأره و هیچموقع اَ چیزانَ نیدینه. ¹² ای خداوند، ای می جانِ خدا، ویریز و شریرانَ سِزا بدن، فقیرانَ فراموشَ نوکون. ¹³ چره ایجازه دهی شریران ترَه اِهانت بوکوند و خوشَأنِ دیلِ میَأن بوگوید تو اوشَأنَ بازخواست نوکونی؟ ¹⁴ ولی تو ای خداوند، مردمِ غَم و غُصه یَ دینی، تو همیشه آماده ای کی درمانده یانَ کمک بوکونی، بیچاره یان و درمانده یانِ اُمید تویی، تو یتیمانِ جَه حمایت کونی. ¹⁵ اَ بدکارانِ دسَ بیشکن و شریرانَ اوشَأنِ شرارتِ وَسی مجازات بوکون، تا اوشَأنِ شرّ جی میَأن بیشه. ¹⁶ خداوند تا اَبدالاباد پادشاهه. کسانی کی دیگر خدایَ پرستش کوند اونِ زمینِ جَه هلاکَ بود. ¹⁷ خداوندا، تو بیچاره یانِ دوعایَ ایشتَأوی، تو اوشَأنِ دردِ دیلَ گوش کونی و اوشَأنِ دیلَ قوی کونی. ¹⁸ تو یتیمان و مظلومانِ حقِ جَه دفاع کونی تا دِ انسانِ خاکی نِتَأنه ترس و وحشت ایجاد بوکونه.