9 ¹ خداوندا همۀ وجودِ اَمرَه ترَه شُکر کونم و تمامِ تی کارایِ عجیبَ همۀ مردمَ گویم. ² تو می شادی و می خوشی ایی، تی نامِ مُتعالِ رِه سرود خَأنم. ³ وختی می دوشمنان عقب نشینی کوند، تی حضورِ جَه به زمین کفد و هلاکَ بود. ⁴ چره کی انصافِ اَمرَه مرَه داوری بوکوده ایی و جایگاه داوری رو عادلانه نیشته ایی. ⁵ تو قومانَ توبیخ بوکوده ای و شریرانَ نابودَه کوده ای و اوشَأنِ نامَ تا اَبد جی میَأن بوبورده ای. ⁶ دوشمن همیشه رِه نابودَ بوسته اوشأنِ شهرانَه ویرانَ کوده ای، جوری کی حتی اوشَأنِ نامم باقی نِمَأنسته. ⁷ اما خداوند تا اَبد پادشاهه، اون خو تختَ داوری رِه بپا بوکوده. ⁸ اون جهانَ عدلِ و اِنصافِ اَمرَه داوری کونه. ⁹ خداوند مظلومانِ رِه پناهگاهه، و سختی موقع اوشَأنِ رِه ایتَه بلندِ قلعه یَه مَأنه. ¹⁰ اوشَأنی کی تی نامَ شنَأسد ترَه توکل کوند، چره کی تو ای خداوند، هیچموقع کسانی کی ترَه طلب کوندَه ترکَ نوکونی. ¹¹ خداوندی کی صَهیونِ میَأن نیشته رِه سرود بخَأنید و اونِ کارانَ قؤمَأنِ میَأن اعلام بوکونید. ¹² چره کی اون قاتلانَ بی سزا نِنه و مظلومانِ فریادَه فراموشَ نوکونه. ¹³ ای خداوند مرَه فیض عطا بوکون و بیدین چوطو می دوشمنانِ دسِ جَه عذاب کِشَأن درم، خداوند مرَه رَحم بوکون و مرگِ جَه نجات بدن. ¹⁴ تا می نجاتِ وَسی ترَه همۀ اورشلیمِ مردمِ ورجَه ستایش بوکونم و شادمان بوبوم. ¹⁵ کافران چاهی میَأن دکفتد کی دیگرانِ رِه بِکده بود، و دامی دورون گرفتارَه بود کی دیگرانِ رِه بنَه بود. ¹⁶ خداوند خودشَه آشکارَه کوده و خو داوری یَ اِجرا بوکوده، شریران خودشَأنِ بنَه دامِ میَأن گرفتارَه بوسته دَأرد. ¹⁷ شریران و همۀ مردمی کی خدایَ فراموشَ کوده دَأرد هلاکَ بود. ¹⁸ مظلومان و بیچاره یان همیشه رِه جی خاطر نوشود و اوشَأنِ اُمید تا اَبد به باد نیشه. ¹⁹ ویریز ای خداوند و کافرانَ داوری بوکون، وَأنَأل انسان پیروزَ بِه. ²⁰ ای خداوند اوشَأنِ جانِ میَأن ترس تَأوأد تا بفهمد کی فقط انساند و وَس.