3 ¹ ای عزیزِ برأرأن، نوکونه خیلی از شومَأن بخَأئید معلم بیبید، چون دَأنید کی اَمَأن معلمینْ سخت تر داوری بیهیم. ² چون همۀ اَمَأن گوناه کونیم، و کسی کی بتَأنه گب زَئَنِ موقع خطا نوکونه، آدمِ کاملی ایسه و تَأنه چیزایِ دیگرِ دورونم خورَه مهار بوکونه. ³ اَمَأن ایتَه پیلدانه اَسبَ دَهَنه زنیم و اونَ خودمانِ مطیع کونیم، و اَطو همۀ اونِ بدنَ هر طرف کی بخَأئیم بوریم، ⁴ و یا ایتَه کوچدانه سُکانِ مرَه شَه ایتَه پیلدانه کشتی یَ کی بادهایِ توندِ مرَه اَطرف اوطرف شِه یَ مهار کودَأن، و هر طرفی کی ناخدا بخَأیه اونَ هدایت کودَأن. ⁵ و هَطو، زبانم اَمی بدنِ میَأنْ ایتَه کوچی عضوه، ولی پیله اِدعا دَأره. شَه پیلدانه جنگلَ ایتَه کوچی آتشِ مرَه سوجَأنن. ⁶ زبانم آتشَ مَأنه. اَمی بدنِ همه تَه اَعضا دورون، زبان دونیایی جی شرارته کی همۀ آدمی وجودَ آلوده کونه، و اونِ زندگی یَ جهنم کونه. ⁷ انسان، همه جور حیوان و پرنده و خزنده و حیواناتِ دریایی یَ رام بوکوده و بعدِ اَنم رام کونه. ⁸ ولی هیچ آدمی نتَأنه زبانَ رام بوکونه، زبانْ، شرارتی ایسه شرور و رام نوبوستَأنی، و پور جی زهری کی کوشه. ⁹ اَمَأنْ اَمی زبانِ مرَه خداوندْ و پئرَ شُکر و ستایش کونیم، و هو زبانِ مرَه آدمانَ کی خدا شبیه خلق بوبُسته دَأردَ لعنت کونیم. ¹⁰ ایتَه دهنِ جَه هم ستایش بیرون اَیِه هم نفرین! ای برأرأن، اَ کار دوروست نییه. ¹¹ آیا بِهِه ایتَه چشمه جَه هم آب شور بیرون بأیه هم آبِ شیرین؟ ¹² ای برأرأن، آیا اِمکان دَأره اَنجیر دار زیتون بأوره؟ یا اَنگور دار اَنجیر؟ هَطو هم چشمۀ آبِ شور نتَأنه آبِ شیرین روان بوکونه. ¹³ کیه شیمی میَأن کی حکیم و عاقل بیبه؟ اون وَأستی خو زندگی و خو اَعمالِ دوروستِ مرَه نیشان بده، اَعمالی کی فروتنی مرَه همراهه و حکمتِ جَه سرچشمه گیره. ¹⁴ ولی اگر شیمی دیلِ میَأن حسادت و خودخواهی و عصبانیت وجود دَأره، افتخار نوکونید و هَچین خودتانَ عاقل نیشان ندید چون کی دوروغه. ¹⁵ اَجور حکمتْ جی بوجُر نازل نیبه، بلکی زمینی و نَفسانیه، و حکمتی ایسه شیطانی. ¹⁶ چون هر جا حسادت و خودخواهی بیبه، هویَ آشوب و هر جور شرارت وجود دَأره. ¹⁷ ولی اون حکمتی کی بوجُرِ جَه یه، اول از همه کی پاکه، بازن صُلح جویه، و مُلایمه و حرف گوش کونه، پور جی رَحمت و ثمرۀ خوبه، و بی غَرضْ و بی ریایه. ¹⁸ عدالتْ، محصولی ایسه کی صلح و صفا میَأن کاشته بِهِه، کسانی دسِ اَمرَه کی صُلح جوید.