¹ Anggelang, ping ap'etal Kristus gomimise gang pitomba, sanang, sukanavera, Roh topuni, tomamoling, oli tomitajajahi, ² sukanavera oli tomianu ganokung, pinggene anukelang, pingpuni anamang, piomitajajahi anukelang. ³ Ake ail jua ukarajangse ake avak gaheli ganang, oli ane gagola ganang oli avak tajaning anga gagunang naga, ibase gene avak galolang, ugaluali, anga miama nama ebeng usudi se ginga lebeh minua. ⁴ Ingake anu-anu ikarajang angaba galokang moling ganang ibase nama ebeng gegdi migauling ⁵ Gang gegae ganokung ading ae ihahamami, mangvede ae gabung anga gajoang, ⁶ mang vede Lahatala garupa anga ae gabung, kapalbalu Tuhan Yesus Lahatala galahama bana oli nangka puni anamang bana. ⁷ Gang oli gafag gene mangvede iljoa ka geng ubana oli gang gavak emanghula mangvede manusia ebeng garupa anga gajuang. ⁸ Nengdi navak ukapaing sebola nengdi manusia bagie, nang navak gene galolang oli ugaluali sampe uamina, tabi amina toe leut tang hila ⁹ Adingba miama bandu gavagi, Lahatala geng p'uhi mida oli miama gengtang gaharung angaba gane migatela dari nama ebeng gane ¹⁰ ae Yesus gane gomi, anu-anu giaka p'ung muding toe burangmi, oli gie palika tang nagaba oli poe palika dumang ¹¹ oli anu-anu galebul betur umangku sebola Kristus Yesus angaba Tuhan miama Lahatala galiali gomi, gengba pimang! Lahatala Piomimi Karajang ¹² Ang gagelang, kaku gonong serang gonongba ae Yesus gasajang gariang gomi, ing oras taganang geg ugaluali ka bola ae oras anu nang ae ilatopuni, lebe-lebe vede oras nangka ala topuni bana asalamat ukarajang oli uling p'aliling jajari. ¹³ Anggelang, Lahatala ba ae iomimi karajang, niomimi mada ujali ukarajang miama nening angaba gengdi rasa sanang. ¹⁴ Ajimi anga ukarajang ibase iavakal gajahing ganang oli ake talalaulak ganang ¹⁵ aganise ingake gahalang ganang mangvede Lahatala gaval gidat ba nama gahula bana ae badaba tele gihahamami mangvede tarang gie palika tang. ¹⁶ Gahur kavali ap'etal anga puni anamang anihise sampe Kristus ga vid neng u nang navak tajaning, nangka ehi parasuma bana oli karajang paksa mang parasuma. ¹⁷ Mang mianukelang nengdi malekang na ve gahalung mangvede ga ve miama sadaka gavagi, nang etang agala oli sukanavera ninangajimi ilatopuni sukanavera. ¹⁸ Ingdi migamota, etang oli agala oli mang jimi nala topuni ping sukanavera hi. Timotius oli Epafroditus Paulus Ginggahing ¹⁹ Tuhan Yesus gomimi, nang bagang sanang user Timotius genggahing jema engharak ani hise gene nomi sanang oras hojat nang umagia. ²⁰ Nangka nama ebeng jua gala bana namajua ka neng u banaga mang vede geng gajoang ujajai bola tatabani hise gengdi ap'etal nua. ²¹ Ang gelang, gagomimi anga mang tabura gaparlo angaba galahama, kabola miama Kristus Yesus gaparlo gadang bana. ²² Mangvede, inggeli Timotius gavag gap'ili miama i tubing jema gang oi nala topuni balenta gagomi anga injil ading p'ana ubalenta ututuk ubagang mang vede val ol anu gang gene miama gimang galahama. ²³ nang bagangsenang bisase user geng gahing migamota nang golageli nening angaba jadi nalahama, ²⁴ oli nang Tuhan Yesus uparsaja sehula nengdi nalokang adu user engharak. ²⁵ Agani ibase, nang uganokung Epafroditus giparlo genggahing jema gengharak. Gengadi nakaku naserangba ning topuni karajang, naserangba ning topuni tabura, oli nama adingdi nama hur panatu p'ana magenang oli naparlu gang gene gakanap. ²⁶ Anggelang, gomimi tatabi ninang ajimi ningmimada oli tatabi gomi mang susah, gagomi ing umagia sebola gang keta. ²⁷ Ani angaba, tulang tabi gang keta hamper gang amina, ani ibase Lahatala gomi nama gajahi anga gang miama gatuving, oli kabola miama galokang galahama bana, ani ibase miama nengi nadang, anihise nasusalala ake teng tang jia ganang. ²⁸ Anggelang, nang jadi bola tatabanihi enggahing bale abung, aganihise ing sukanavera oras ing bale ulinggeli, oli naharep'ang anga gang mahela. ²⁹ epafroditus gengtarima ae Lahatala gomi oli sukanavera gomi, oli namaba geng gajoang anga uada ³⁰ gagomi anga gang hamper amina Kristus gakarajang; gomi gang gavag p'uhi miama gualmagang anga gatilal oli nua gatulung molingba ing dapa taning miameneng.