¹ Ading Paulus oli Timotius, Yesus Kristus gamalal, miama nama hamolangba ae Yesus Kristus gomimi oli miama penatua oli miama jumaat ba ae Filipi mi ginang: ² Lahatala, pimang Tuhan Yesus gibarakat oli ginua gahama ginang ajimi giala topuni! Paulus Sambajang oli Nua Ubagang Miama Jumaat ba moe Filipi abangmi ³ Nang Lahatala ganua ubagang vid kakanap nang inguneling. ⁴ Nasambajang gomimi miama inangajimi idang, nang sambajang sukanavera ⁵ angagelang nang nomi tabi puni anamang karajangba ing miameneng ading gagomimi Lahatala gahur gadal ing miameneng nang p'ana lamal ututuk ubagang ading vedevid gahalomang jema gaumatemi. ⁶ Nangnomi tabi-tabi puni anamang karajang nua ading miama yalahama, geng angaba gene gamolo gene gang minua oras Yesus Kristus adu gaumatemi. ⁷ Nauarasa emanghula inangajimi ae nomimi. Nua oras nang ae bubu e mi oli nang ae oras anumi nang inggene anamang ae surat hamolang gomimi, inang ajimi topuni tomianu ae Lahatala ganua gomimi. ⁸ Lahatala anga nua miama pidang pilahama, oras anumi nomi ingmi mada ae Yesus Kristus ganua gomimi. ⁹ Adingba nasambajang: Miama idang ialahama anga tang mang magala, oli hur nua ganokung nua oli hur kavali ajimi nua; ¹⁰ angahise nening banua anga ing bisa u alu; angahi pingka p'ela bana ae Kristus ga orasmi; ¹¹ oli uaji ae te ahi nua angami ba ae Kristus Yesus mi adu miama hamolang oli Lahatala geng tajaning. Paulus Gasusalala Gomimi Lahatala Gahurdal Gaututuk Mangtang Gene Minua ¹² Nakaku gonong, nang bola ing malekang geli sebola nening nang miama yalatutuk anga Lahatala gahurdal mi adu, ¹³ angahise istana ganamul vala oli nama ebeng ajimi geli sebola nama neng hukung miama Kristus gadang. ¹⁴ Piserang urae piupersaja anu ba tang mang Lahatala uparsaja nahukung gomi gagelang ading, tang mang barani Lahatala gahurdal p'ana lamal ututuk tanpa gingka gip'ukang mali bana. ¹⁵ Tabi, nama adedeng ae Kristus gahurdal ututuk oli giomi keta oli teng a uji, ibase jua anga karena giomi nua. ¹⁶ Gingba giomi gagahi nua ging ukarajang karena nua anggelang ginggeli sebola nama neng miama adingmi miama Lahatala gahurdal geng tang. ¹⁷ Senghise oli gingba giomi p'ela, ging ukarajang karena giomi kapusu, giomi tabipuni bana oli giganokung ging tang mang sulit ba miama nalahama selama nang gie na hukung gomimi. ¹⁸ Muse gagahi anga nanening? Gamamolo sebola gene tatabani di, baik ganokung leko-leko nagaba ganokung molo, Kristus ututuk lama, oli ang gelang nang sukanavera. Ya, oli genese nang sukanavera tarus, ¹⁹ anggelang nanggeli sebola isambajang gomimi anga oli Roh Kristus Yesus ga tulungmoling, neningba nalahama jema anga justru mianumi se neng p'ana mana anga uhap'a. ²⁰ Ilba nang mi kakubal mi anamang anga nama ka sama sakali neng gene maniang bana. Gomigamota, nang oli ubarani Lahatala genang hula fede adi oli gegjia oli navak adi gomimi ae ap'etal gomi ae mia p'ela gomimi oli nanua gomimi. ²¹ Angggelang nengabola, ap'etal anga Kristus oli amina anga nua. ²² Ibase, nangkalo bola ap'etal gie naboga p'al ading gomimi, angase nang ukarajang gahi ma u. Senghise, taangba nang malekang u olu, nangka geli bana. ²³ Nang ilugahala ae pilihan alo angami. Naujali angabola ap'etal ading miama mega e oli Kristus gala topuni, karena anga leta minua. ²⁴ Ani ibase, miama ilahama, anga lebe minua kalo nang tetap ap'etal gie naboga p'al adingmi. ²⁵ Na uparsaja ading, nang geli anihise nang inang ajimi yala topuni miha ilnua oli isukanavera ipersaja gomimi gagelang. ²⁶ Nang kalo bola bale yola adu, anihi iavak gaheli paleteng anga mang tang magala ae Yesus Kristus gomimi karena neng. Itopuinitomianu Oli Tatabi Ulamal ²⁷ Agani ibase, ap'etal ganua angaba gene miama Kristus gahurdal gene aganihise kalo nang adu oli ingharak, oliba kalo adu bana, nang boleh umagia bola ing tetap mate anamang ae roh anu gomimi, ganokung anu gala, hama-hama tatabi ulamal miama iugaluali ae Lahatala gahurdal angami. ²⁸ Ake yavak anga ugalolang e musuh gonong ake yop'aliling ganang, karena anga miama giholongbale gene, ibase salamat miama ilahama, oli tanda angadi Lahatala bami adu. ²⁹ Anggelang Kristus gakarunia nua bagang miama pining anga pingka uparasuma galokang bana oli ping ading susalala miama miama galahama. ³⁰ Angaba gagelang ing pergumulan hama gadangmate seperti ing uling se nang gadangmate anga gajoang, oli sekarangba ing umagia ading nangdo gie urasa jia.