¹ Abimeleki mona rume wa Jeruba Bala ayendi kulikoro lyavawina muShekemu nakuvatantera valira nalintje valipata lyavawina, ² ''Nakanderere ghambenu vino, makura vampititi navantje vamuShekemu vayuvhe, 'Are anamuwapero, pavana dimurongo ntambiri va Jeruba Bala ogho ngamupangero, ndi ogho umwe ngamupangero?' Vhurukenu ashi ame ne vifupa na rutu rwenu.'' ³ Likoro lyavakawina avaghamberepo kuvampititi vamuShekemu, nakuvipulitira vakwame Abimeleki, vavo kwaghambire, ''Oghuno mughunyetu wamukafumu.'' ⁴ Avamupa vimaliva vyashiliveli dimurongo ntambiri vya muwaya-waya vyatundiro mundjugho ya Bala-Beriti, ano Abimeleki aruwanita shishiliveli mukupongayika vakafumu vavapote na vakorokotji, ovo vayendiro navo. ⁵ Abimeleki ayendi kulipata lyavashe ku Ofura, nakukadipagha vakuru vendi paliwe limwe tupu, vana vavakafumu vaJebura Bala. Nkwandi Jotamu ndje vashuvireko, ntjiraghura ya Jeruba Bala wamukafumu, mukondashi ghuye kwabatire. ⁶ Vampititi vamuShekemu nava vamuBeti Milo avaya pamwe nakuyenda mukukatura akare Abimeleki hompa, kuruha rwa ushivi pepi na ngundi yakaliro mushekemu. ⁷ Opo vavimutantilire Jotamu ovyo, ayendi nakukayimana pawiru ya ndundu ya Gerizimu. Ayiyiri nakuvatantera, ''Nteghererenu, anwe vampititi vaShekemu, makura Karunga kuvhura amutegherere. ⁸ Vitondo avishapuka pamwe vikatungike hompa wavyo. Makura avatantere shitondo shauywe, 'Tupangere.' ⁹ Ngoli shitondo shauywe ashivatantere, 'Nishuve ngoli mauwa ghande, ovyo vamfumadekera vaKarunga na vantu, mukukunga kuvitondo vimwe?' ¹⁰ Vitondo avitantere shitondo shauywe, 'Yiya ukatupangere.' ¹¹ Ngoli shitondo shauywe ashivatantere, ' Kuvhura nganitape ghutovali wande na mauwa gha nyango yande, mukonda tupu nikaye nakukunga vitondo vimwe?' ¹² Vitondo avitantere shindjembere, 'Yiya ukatupangere.' ¹³ Shindjembere ashivatantere, 'Kuvhura nishuve vinyu vande yayipe, oyo yahafitango vaKarunga na vantu, nakuya mukuyakunga vitondo vimwe?' ¹⁴ Makura vitondo navintje aviyendi kushishwa shamigha, 'Yiya ghuyatupangere.' ¹⁵ Shishwa sha migha ashi tantere vitondo, ''Ntjeneshi vyaushili muna shana mungwavekere muuhompa mukatji kenu, nkwandi muye nakuyawana lipopero munda yamundulye wande. Ntjeneshi kapishi ngoli, makura ghurenke mundiro ghutunde mushishwa shamigha nakurenka ghushore vitondo vya Sedeli vya Libononi viveve. ¹⁶ Ano ngoli, ntjene muna kara mughushiri na mughuhunga, opo munatura Abimeleki muuhompa, ano ntjeneshi mwaruwanine vyaviwa kuhamena Jeruba Bala na lipata lyendi, ndi ntjeneshi mwamufutita kutwara omo aviruwanena - ¹⁷ Ndi kughayara ashi vavava kwa muruwanena, mukudjumbilira liparu lyendi, nakughoyora mumaghoko ghava Midiyani - ¹⁸ ngoli panamuntji pano munashapuka mudivyuke lipata lyavavava nakudipagha vana vavo vavakafumu, vantu dimurongo ntambiri paliwe limwe. Makura mbyo munatura Abimeleki mona rume wa mukareli wendi wamukamali, akare hompa wavampititi vaShekemu, mukonda likoro lyenu. ¹⁹ Ntjeneshi mwaruwanine vyaushiri nevi vyauhunga kwa Jeruba Bala nakulipata lyendi, makura munahepa kuhafa mwa Abimeleki, nakurenka naye ahafe mwenu. ²⁰ Ngoli ntjeneshi kapishi ngoweyo, ghurenke mundiro ghutunde mwa Abimeleki nakuveveka vantu vamuShekemu na Bete Milo, mukuveveka Abimeleki.'' ²¹ Jotamu ahene nakuduka, ano ayendi kuBeyeri. Akatunga nkoko mukondashi kwakalire ghure na Abimeleki, mukurwendi wamukafumu. ²² Abimeleki apangere Israeli mwaka ntatu. ²³ Karunga atumu mpepo yayidona pakatji kaAbimeleki na vampititi vamuShekemu. Vampititi vamuShekemu avaghupumo lihuguvaro lyavo mwa Abimeleki. ²⁴ Karunga kwaviruwanine vino mukonda yaviruwana dona ovyo aruwanine kuvana kuvana dimurongo ntambiri va Jeruba Bala mukuvyutira rughoko, ano Abimeleki munyavo wamukafumu ndje vyatumbukilire vyalidipagho lyavo, na vakafumu vamuShekemu navo vyatumbukilire mukonda vamuvatilire mukudipagha vakuru vendi vavakafumu. ²⁵ Ano vampititi vamuShekemu avatura vakafumu mukurara pawiru ya ndundu vamubatere ashi vamurwanite, nakuvaka navantje ovo kavapitango oyo ndjira vakalire. Ovino avavitantere Abimeleki. ²⁶ Gali mona rume wa Ebedi kwayire nalikoro lyendi nakuyenda muShekemu. Vampititi vaShekemu kwamuhuguvalire. ²⁷ Avayendi mulifuva nakukapongayika mandjembere muvipata vya mandjembere, nakughavakamena. Avatura shipito mundjugho ya vaKarunga vavo, oko valyelilire na kunwa, nakufinga Abimeleki. ²⁸ Gali mona rume wa Ebedi, aghamba, ''Are Abimeleki, ndi are shekemu, mposhi atwe tumukarere? Kapishi ndje mona wamukafumu wa Jeruba Bala? Kapishi zebuli lirenga lyendi? Karenu vantu vamuHamoro, vashe vaShekemu! Mukonda munke tukarera Abimeleki? ²⁹ Nahuguvarashi avano vantu ndi mulirawiro lyande vakara! Ndi namughupamo Abimeleki. Ndi namutantera Abimeleki, 'Yita vakavita voye navantje.''' ³⁰ Opo Zebuli, muyenditi washitata, ayuvhire nkango da Gali mona rume wa Ebedi agarapa unene. ³¹ Atumu ntumi kwa Abimeleki mukukashongaghura, aghamba, ''Kenga, Gali mona rume wa Ebedi na valiro lyendi kavaya muShekemu, nakuyita mutoto mushitata mukukupiruka vakuvyuke. ³² Weno, shapuka mushirugho shamatiku, nove na vakavita ovo unakara navo, nakuwapayika libato mumafuva. ³³ Makura ngurangura, ano tupu lina kuyashuruka, kuvinduke mukushapuka nakuya homona hararasi shitata. Opo ngarupuka naye na vantu ovo anakara navo vakuvyuke, ruwana navintje ovyo ngaghushana kuruwana.'' ³⁴ Makura Abimeleki ashapuka paruvede rwa ngurangura, naye na vakafumu navantje ovo akalire navo, nakutura mabatero mukudivyuka vaShekemu - mukukugaunuuka mumbunga ne. ³⁵ Gali mona rume wa Ebedi arupuka nakuyayimana mumangeneno gha livero lya shitata. Abimeleki na vakafumu ovo akalire navo avatundumo mumavango ghavo ogho vavandire. ³⁶ Opo gali akengire vakafumu, atantere Zebuli, ''Kenga, vakafumu ovo vanakughurumuko vatunde pawiru da ndundu!'' Zebuli amutantere, ''Ove kuna kukenga dimundulye pawiru da ndundu yira vantu.'' ³⁷ Gali amutantere nka na kughamba, ''Kenga, vakafumu vanakushughukiro mukatji kalivango, ano mbunga yimwe kuna kutundilira kuruha rwa ushivi wakupongoka.'' ³⁸ Makura Zebuli amutantere, ''Kuni nko nka oko dina kara nkango doye da makunenepito, ove waghambiro, 'Are ngoli ogho Abimeleki ashi atwe tuvhure kumukarera?' Kapishi mbo vakafumu ovo kaghushwaura? Rupuka sha ngoli nakukavarwanita.'' ³⁹ Gali arupuka nakupititira vakafumu vamuShekemu, akarwanite Abimeleki. ⁴⁰ Abimeleki amutjida, ano Gali aduka kumeho yendi. Vavangi kwarwapamine navironda vyavinene kumeho yamangeneno ghalivero lya shitata. ⁴¹ Abimeleki akara muAruma. Zebuli atininiki Gali na valikoro lyandi mukutundamo muShekemu. ⁴² Liyuva lyakukwamako vantu vamuShekemu avarupuka vayende mulifuva, ano vino avavitantere Abimeleki. ⁴³ Aghupu vantu vendi, avagaununa mumbunga ntatu, nakuvatura vavande mumafuva. Ayundju nakumona vantu vanakutundo mushitata ano ghuye avahomona nakuvadipagha. ⁴⁴ Abimeleki na mbunga dendi odo akalire nado avahomona nakukundurukida pa mangeneno gha livero lya shitata. Mbunga dimwe mbiri adi navantje ovo vakaliro mulifuva nakuvadipagha. ⁴⁵ Abimeleki arwanita shitata liyuva nalintje. Akwata shitata, nakudipagha vantu ovo vakaliro mo. Abamaghura makuma gha shitata na kushimwagha mungwa. ⁴⁶ Opo vaviyuvhire vino vampititi navantje varuhungu rwa Shekemu, avakangena muruhungu rwa koro mundjugho ya Eli-Beriti. ⁴⁷ Abimeleki avavimutantere ashi vampititi navantje vana kakupongayika na vantje muruhungu rwa Shekemu. ⁴⁸ Abimeleki akanduka kundundu ya Zalimoni, naye na vakafumu navantje ovo akalire navo. Abimeleki aghupu likuva na kuteta dimutavi. Adikukambeke na kukarawira vakafumu ovo akalire navo, ''Kehe vino munakukenga nakuruwana, nanwe ruwanenu ngoli mushikwagho.'' ⁴⁹ Makura kehe uno atete mutavi nakumukwama Abimeleki. Avavirundayili mukudivyuka likuma lya hungu, nakulitura mundiro, makura vantu navantje vamuruhungu rwa Shekemu navo avafu, vavo vakafumu na vakamali paviha mayovi vafiro. ⁵⁰ Makura Abimeleki ayendi ku Tebezi, nakukakundurukida Tebezi nko kushikwata. ⁵¹ Ngoli mwakalire ruhungu rwarukoli unene mushitata, ano vakafumu na vakamali ntani vampititi navantje vamushitata mo vadukilire nakukagharerera momo. Makura avarondo kumbando-wiru yaruhungu. ⁵² Abimeleki aya kuruhungu nakururwanita, ano nko kuya pepi kulivero lya ruhungu mukurushora. ⁵³ Ngoli pawiru mukamali agandere shinu pamutwe wa Abimeleki ano nko kutaghuka likorongongo lyamutwe wendi. ⁵⁴ Ano nko kuyita wangu-wangu mumati ghona wakushimba shimba virwitito vyendi, nakumutantera, ''Pweyuramo rufuro kumwe na kundipagha, mposhi kwato umwe ngaghambo vyakuhamena kwandeshi, 'Mukamali amudipaghiro.''' Makura mumati ghona wendi arumuvhurura, makura afu. ⁵⁵ Opo vavikengire ngoli vantu vaIsraeli ashi Abimeleki anafu, avayendi kumandi. ⁵⁶ Ngoweyo Karunga avyutire ghudona wa Abimeleki ogho aruwanitire kuvashe mukudipagha vakuru vendi dimurongo ntambiri. ⁵⁷ Karunga kwaruwanine vyavidona navintje kuvantu vamuShekemu mukuvavyutira vyamudimutwe davo namafingiliro ogho atundiliro mwa Jotamu mona rume wa Jeruba Bala.