¹ Vakafumu vavaEfurayimu avatantere Gidiyoni, ''Nke ngoli unavituruwanene vino? Kapi watuyitireko opo vayendire ukarwanite vaMidiyani.'' Makura avakara nadimutangu dadinene naye. ² Avatantere, ''Ovyo naruwana ngoli kuvishetakanita kukwenu? Nani kapishi ghuyivi washindjembere sha Efurayimu shapitakana shindjembere nashintje vayangura kwa Abiyezera? ³ Karunga anamupa lifundo kuvahompa ghona vavaMidiyani - Orebu na Zebu! Vinke nka vyaviwa mukuvishetakanita kukwenu?'' Apa avighambire vino ugara wavo aghushaya kukwendi. ⁴ Gidiyoni aya kuJorodani nakuyaruta, na vakafumu mafere matatu ovo akalire navo. Vavo vanaroroka, ngoli shimpe kuna kutwikira kutjida. ⁵ Atantere vakafumu vamuSukoti, ''Nakanderere penuko dimuntje da mboroto kumbunga oyo yinakunkwamo, mukondashi vanaroroka, ntani nka ame kunakutjida Zeba na Zalimuna, vahompa vavaMidiyani.'' ⁶ Vayenditi nko kughamba, ''Maghoko ghava Zeba na Zalimona nani ngoli kapishi mumaghoko ghoye? Mukonda munke tutapera mboroto kuvakavita voye?'' ⁷ Gidiyoni aghamba, ''Opo akatupa lifundo Karunga kwa Zeba na Zalimona, nganiya tavaghura vipapa vyenu namarumiya na ntjontjo da mumburundu.'' ⁸ Atundupo ayendi kuPaniyeli nakuvatantera vantu vako yira momu mwamuhovo, ngoli vakafumu vaPaniyeli avamulimburura yira momu vamulimbwilire vakafumu vamuSukoti. ⁹ Atantere nka vakafumu vaPaniyeli nakughamba, ''Opo ngani kavyuka nampora, nganiya ganda runo ruhunga.'' ¹⁰ Ngoli Zeba na Zalimuna vavo muKarikori na vakavita vavo, vakutika yira pavakafumu mayovi murongo na ntano. Ovo navantje vahupaliropo kuvakavita navantje vambunga yakughupumeyuva, mukondashi ovo vafiro vakafumu 120, 000 ovo vafiro kurufuro. ¹¹ Gidiyoni ayendi mundjira oyo vapitanga vatungi vamutende, yakapito muNoba na Jogebeha. Afundu vakafumu va vankore, mukondashi kapi vayivilire lihomono. ¹² Zeba na Zalimona avahene, ano Gidiyoni nko kuvatjida, akavakwata vahompa vaviri va vaMidiyani - Zeba na Zalimona - nakutura vakavita vavo navantje mughutjirwe. ¹³ Gidiyoni, mona rume wa Jowashi, akavyuka kuvita mukuyapita kuHeresi. ¹⁴ Ayakwata mwanuke wamukafumu wamuSukoti na kumupurayera. Mwanuke wamukafumu atjanga palivhu madina ghavapangeli nagha gha matimbi dimurongo ntambiri na ntambiri vamuSukoti. ¹⁵ Gidiyoni aya kuvakafumu vamuSukoti nakughamba, ''Kengenu vaZeba na Zalimona, ovo mwantjepire likendjo nakughamba, 'Ghunafundu kare vaZeba na Zalimona ndi? Kapi tuyiva ashi kuvhura tupe vakavita voye mboroto.''' ¹⁶ Gidiyoni aghupu matimbi ghamushitata, nakufutita vakafumu vamuSukoti namiya na ntjontjo damumburundu. ¹⁷ Makura akaganda ruhunga rwamuPaniyeli nakudipagha vakafumu vamushitata. ¹⁸ Makura Gidiyoni atantere Zeba na Zalimona, ''Vakafumu vakufana weni mwadipaghire muTabora?'' Avalimburura, ''Yira ove, mo vakara. Navantje kwamonikire yira vana va vakafumu vahompa.'' ¹⁹ Gidiyoni aghamba, ''Vavo kwakalire vaghuni vande va vakafumu, vana vavanane va vakafumu. Karunga muyumi, ndi mwavashuvire naghuyumi, nanwe ndi kapi nimudipagha.'' ²⁰ Atantere Jeteri (mbeli yendi), ''Shapuka nakuvadipagha!'' Ngoli mukafumu ghona kapi apweyire rufuro rwendi mukondashi atjilire, mukondashi ghuye shimpe mwanuke. ²¹ Makura Zeba na Zalimuna avaghamba, ''Shapuka naghumoye nakutudipagha! Yira mukafumu, munkondo dendi.'' Gidiyoni ashapuka nakudipagha Zeba na Zalimuna. Aghupu maghurenga ogho akaliro muntingo da ngamero davo. ²² Makura mbunga yaIsraeli ayitantere Gidiyoni, ''Tupangere - ove, monoye wamukafumu, namutekuroye wamukafumu - Mukondashi unayatuyoghora mulighoko lyava Midiyani.'' ²³ Gidiyoni avatantere, ''Kapi nakumupangera me, nampiri monande wamukafumu kapi ngamupangera. Karunga ndje ngamupangero.'' ²⁴ Gidiyoni avatantere, ''Tanko nimupure anwe ashi kehe uno ayite vimbilingwa ovyo mwakakwata.'' (VaMidiyani kwakalire navimbilingwa vyangorodo mukondashi vavo vaIshimayeli). ²⁵ Avalimburura, ''Atwe tunahafa mukuvitapa kukoye.'' Ava yara lirwakani na kehe uno mukafumu avhukuminipo vimbilingwa ovyo akakwatire. ²⁶ Mukumo vavimbilingwa ovyo apulire kwakalire 1, 700 shekeli yangorodo. Kuturako ovyo navyo vakakwatire vyamaghurengwa, tulyenge, vyuma vyaumbomboshi ovyo kavadwatanga vahompa vavaMidiyani, nakutura ko maghuketanga agha kagha kundurukidango muntingo da ngamero davo. ²⁷ Gidiyoni muvimbilingwa aruwanamo Karunga wavipempa nakushitura mushitata shendi, muOfura, ano vaIsraeli navantje avashondapara mukutongamenako. Ashikara ngoli rutenda rwa Gidiyoni navo vamumundi wendi. ²⁸ Makura vaMidiyani kwavafundire kumeho ya mbunga yaIsraeli ano kurambwita dimutwe davo kapi vavivhulire nka. Makura shirongo ashikara mumpora mwaka dimurongo ne mumayuva gha Gidiyoni. ²⁹ Jeruba Bara, mona rume wa Jowashi, ayendi nakukatunga mumundi wendi wa mwene. ³⁰ Gidiyoni kwakalire na vana va vakafumu dimurongo ntambiri ovo vakaliro ruvaro rwa mwene, mukondashi ghuye kwakalire navakamali vavangi. ³¹ Shihora shendi, osho shakaliro muShekemu, naye amuyitiri mona wamukafumu, ano Gidiyoni amuti lidina Abimeleki. ³² Gidiyoni, mona rume wa Jowashi, afu mughukurupe waghuwa nakumuhoreka muliyendo lyavashe Jowashi, paOfara yalira lya Abiyezeri. ³³ Ano kutunda opo, tupu afire Gidiyoni, mbunga yaIsraeli ayipiruka nka nakushondera panaumwavo mukutongamena vaBala. Avaruwana Bala-Beriti Karunga wavo. ³⁴ Mbunga yaIsraeli kapi vavhurukire mukufumadeka Karunga, Karunga wavo, ogho avayogholiro mumaghoko gha vanankore vavo navantje ovo vavakundurukidiro. ³⁵ Kapi vatikitiremo vitwenyidira vyalipata lya Jeruba Bala (ogho shi ndje Gidiyoni) mukumuvyutira ghuwa naghuntje ogho aruwanine muIsraeli.