¹ Kuruku ya Abimeleki, Tola mona rume wa Puwa mutekurwa Dodo, mukafumu wa Isasikari ogho atungiro muShamira, mushirongo sha ndundu sha Efurayimu, ashapuka mukuyoghora Israeli. ² Apangura Israeli mwaka dimurongo mbiri na ntatu. Afu na kumuvhumbika muShamira. ³ Amukwama Jaire muGileyada. Ghuye apangura Israeli mwaka dimurongo mbiri na mbiri. ⁴ Ghuye kwakalire na vana vavakafumu dimurongo ntatu ovo kavarondango pavidongi dimurongo ntatu, ano vakalire vakalire navitata dimurongo ntatu, ovyo varukire Havoti Jaire na namuntji lino, ovyo vyakaliro mushirongo sha Gileyada. ⁵ Jaire afu ano avamuvumbiki muKamona. ⁶ Mbunga yaIsraeli ayitwikiri mukuruwana vyavidona mushikenga mantjo gha Karunga na kutongamena va Bala, vaAshitoreti, vaKarunga vaArami, vaKarunga vavaFilisiti. Avashuvu Karunga nakudira kumutongamena nka. ⁷ Ugara wa Karunga aghuhwama kuvaIsraeli, nakuvaghulita mumaghoko ghavaFilisiti na mumaghoko ghavaAmoni. ⁸ Avatonya nakuhepeka mbunga yaIsraeli mwaka odo, ano mwaka ntantatu mbunga yaIsraeli nayintje oyo yatungiro munya muJorodani mushirongo shavaAmori, osho shakaro muGileyada. ⁹ Makura vaAmoni avarutu Jorodani mukukarwanita vaJuda, na vaBenyameni, ntani nava valira lyaEfurayimu, makura Israeli akara ngoli muruguvho rwa runene. ¹⁰ Makura mbunga yaIsraeli ayitakumini kwa Karunga, mukughamba, ''Twa djona kukoye, mukondashi twashuva Karunga wetu nakutongamena va Bala.'' ¹¹ Karunga atantere mbunga yaIsraeli, ''Kapi nani namuyoghora muvaEgipute, vaAmori, vaAmoni, vaFelisiti, ¹² namuvaSidoni nka? VaAmaleki na vaMawoni vamuhepikire; amuntakumini, ano ame animuyoghora mulipangero lyavo. ¹³ Shimpe nka mbyo mwantjuvire nakutongamena vaKarunga navo peke. Ngoli kutunda pano, kapi nitwikira ngoweyo muvaru wakumuyoghora. ¹⁴ Yendenu nakukatakumina vaKarunga ovo mwatongamenanga. Varenkenu vamuyoghore ntjene mughudito munakara.'' ¹⁵ Mbunga yaIsraeli ayitantere Karunga, ''Twa djona. Turuwanene kehe vino vinakaro vyavihunga kukoye. Tunakanderere makura ngoli, tuyoghore namuntji.'' ¹⁶ Avaghupumo vaKarunga vavantunda virongo mumwavo nakukatongamena Karunga . Makura Karunga ashayikita mukukudivikira ruguvho rwa Israeli. ¹⁷ Makura vaAmoni avakupongayiki pamwe nakutoma ntanda yavo muGileyada. VaIsraeli avayapongo nakutoma ntanda yavo pa Mizipa. ¹⁸ Vampititi vambunga yaGileyada avakutantere vavene na vavene, ''Are mukafumu ogho apititiro kurwana navaAmoni? Ogho ngakaro mpititi kwa navantje vatungo muGileyada.''