¹ Makura Jefuta muGileyada kwakalire mukavita wankondo unene. Ngoli ghuye kwakalire mona wamushondeli wamukafumu. Gileyada ndje akaliro vashe. ² Mukamali wa Gileyada naye kwayitire vana vavakafumu vamwe. Opo vakulire vana vavakafumu vamukamali, avatininiki Jefuta atundemo mumundi nakumutantera, ''Kapi ngaghupingako kwanavintje kuvalikoro lyetu. Ove mona rume wamukamali naye peke.'' ³ Makura Jefuta atjayuka kuvakuru vendi nakukatunga mushirongo sha Toba, ano vakafumu vavakorokotji avakakupakerera mwa Jefuta nakuyendaghura naye. ⁴ Tupu ghapitapo mayuva, mbunga yavaAmoni ayitura vita navaIsraeli. ⁵ Opo vatulidirepo vita mbunga yaAmoni varwite vaIsraeli, matimbi gha Gileyada aghayendi mukukashimba Jefuta akatunde kushirongo sha Toba. ⁶ Avatantere Jefuta, ''Tuyende nakukakara mpititi wetu mukukarwanita mbunga yavaAmoni.'' ⁷ Jefuta atantere vampititi vaGileyada, ''Anwe mwanyenga nakuntininika nitunde mumundi wavavava. Mukonda munke nka munayere kukwande ashi mughudito muna?'' ⁸ Matimbi gha Gileyada agha tantere Jefuta, ''Mbyo ngoli tunavyukiri kukoye, tuyende kumwe nakukarwanita mbunga yavaAmoni, nakukakara mpititi wanavantje ovo vatungo mu Gileyada.'' ⁹ Jefuta atantere matimbi gha matimbi, ''Ntjeneshi muntwara kumundi mukarwanita mbunga yavaAmoni, ano ntjeneshi Karunga ngakampe lifundo kukwavo, ame ngani kara mpititi wenu.'' ¹⁰ Matimbi gha Gileyada aghatantere Jefuta, ''Ngoli Karunga akare mbangi pakatji ketu ntjeneshi kapi tukaviruwana yira momo tunavighamba!'' ¹¹ Makura Jefuta ayendi namatimbi gha Gileyada, ano vantu avamutura mpoititi nakuvarawira. Opo akalire kumeho yaKarunga muMizipa, Jefuta avyukuruka matwenyidiro naghantje ogho atulire. ¹² Makura Jefuta atumu ntumi kwa hompa wambunga ya Amoni, aghamba, ''Nke vinakarerepo vita pakatji ketu? Morwa munke unakutininika mukughupa shirongo shetu?'' ¹³ Hompa wambunga ya Amoni alimburura ntumi da Jefuta, ''Mukondashi opo vayire vaIsraeli vatunde muEgipute, kwayatushakanine shirongo kutunda kuAmoni dogoro kuJaboko, dogoro musheli munya yaJorodani. Weno mutuvyutire ovyo virongo mumbiri.'' ¹⁴ Shimpe nka Jefuta atumu ntumi kwa hompa wambunga ya Amoni, ¹⁵ nakughamba, ''Ovino mbyo ana ghamba Jefuta: Israeli kapi aghupa shirongo shavaMowaba na shirongo sha mbunga ya Amoni, ¹⁶ ngoli opo vatundire muEgipute, ano Israeli kwayendire yamburundu vatambe kulifuta lya mbu nakuya pa Kadeshi. ¹⁷ Opo vatumine ntumi kwa hompa wa Edomu, mukughamba, 'Tunakanderere tupulitire mukuvindakana tupite mushirongo shoye,' hompa waEdomu kapi aviteghelire. Vavo nka shimpe kutuma ntumi waMowaba, ngoli ashwena. ¹⁸ Ano vaIsraeli avakara paKadeshi. Makura avayendi yandundu nakukunduruka shirongo sha Edomu na shirongo sha Mowaba kwashipitilire kwara upumeyuva nakukatomeka ntanda davo kusheli kunya ya Arunoni. Ngoli kapi vapitire mushirongo sha Mowaba, mukondashi Arunoni ngo mururani wakaliro wa Mowaba. ¹⁹ Israeli kutuma ntumi kwa Sihoni, hompa wavaAmori, ogho apangereliliro muHeshiboni amutantere, 'Tunakanderere tupulitire tuvindakane mushirongo shoye, tuyende kulivango lyetu.' ²⁰ Ngoli Sihoni kapi avahuguvalire vaIsraeli mukuvindakana vapite mushirongo shendi. Makura Sihoni apongeke vakavita vendi navantje nakuyenda kuJahazi, ano mukukarwanita Israeli. ²¹ Makura Hompa, Karunga wavaIsraeli, atapa Sihoni na mbunga yendi nayintje mumaghoko gha Israeli nakuvafunda. Makura Israeli aghupu shirongo nashintje sha vaAmoni ovo vatungiro mushirongo osho. ²² Avaghupu navintje ovyo vyakaliro mushirongo sha vaAmori, kutundilira kuArunoni dogoro Jaboko, na kutundilira mumburundu dogoro kuJorodani. ²³ Ano makura Hompa, Karunga wa vaIsraeli, atjidamo vaAmori kumeho ya vantu vendi Israeli, ano ovo shimpe kuna kushana kughupa ghuweke shirongo shavo? ²⁴ Kapi ghuvhura kughupa shirongo osho Kemoshi, Karunga ghoye, akupa? Makura kehe shirongo Hompa Karunga wetu osho atupa, kapi ngomushighupa. ²⁵ Ngoli pano ove ne ghumunene wapitakana Balaka mona wamukafumu waZipora, hompa wa Mowaba? Ogho akaliro na nkondo mukutangulita vaIsraeli? Ogho afutiro naruntje vita mukukavarwanita? ²⁶ Opo vatungire vaIsraeli mwaka mafere matatu muHeshiboni na kudimukunda dako, na muAroeri na kudimukunda dako, na mumadoropa naghantje akaliro kurukenkera rwa Arunoni - Morwa nke wadilire kushighupa ruvede runya? ²⁷ Kapi naruwana vyavidona, Ngoli kuna kunduwana mwamudona mukuhomokera. Karunga, mupangeli, ndje atokoro panamuntji pakatji kambunga yaIsraeli na mbunga yaAmoni.'' ²⁸ Ngoli hompa wambunga yaAmoni kapi aghatambwire matjilito gha Jefuta ogho amutuminine. ²⁹ Makura mpepo yaKarunga ayikara paJefuta nakukavindakana apite Gileyada pa Manase, na kuyavindakana apite Mizipa ya muGileyada ayavindakane mukupita mbunga ya Amoni. ³⁰ Jefuta atura mughano kwaKarunga na kughamba, ''Ntjene ukampa lifundo kumbunga ya Amoni, ³¹ Makura keheshino ngashirupuko mulivero lya ndjugho yande mukukugwanekera name opo nganikavyuka mumpora kumbunga ya Amoni ngashikara sha Karunga, ano ame nganishidjamberako mundjambo yakushwakerera.'' ³² Makura Jefuta avindakana apite mumbunga ya vaAmoni mukukarwana navo, ano Karunga amupa lifundo. ³³ Avahomokere nakuvadipagha unene kutundilira kuAroeri dogoro Miniti - Vitata dimurongo mbiri - nakuAbeli Keramimu. Ano mbunga yavaAmoni avavatura munda yalipangero lya mbunga ya vaIsraeli. ³⁴ Jefuta akaya kumundi wendi pa Mizipa, ano monendi wamukamali ndje arupukiro amukondawire namutjakilili oku kuna kudana. Ghuye ndje monendi ahuru, ano kughupako ogho ghuye kapi akalire namonendi wamukafumu ndi wamukamali. ³⁵ Ano tupu amukengire ngoweyo, ataghura vyuma vyendi nakughamba, ''Ani nane! Monande-kadi! Ghuna ndjitiri ruguvo, ano una kara muntu ogho ana kundjitiro tjutju! Morwa nayashwiri kanwa kande kwa Karunga, ano ngoli kapi nivyuka muruku kulitwenyidiro lyande.'' ³⁶ Ghuye avatantere, ''Vava, munatura mughano kwaKarunga, ruwanenu navintje kukwande ovyo munatwenyidiri, mukondashi Karunga ana kavyuta rughoko muroye kuvanankore voye, vaAmoni.'' ³⁷ Nko kutantera vashe, ''Mpulitirenu litwenyidiro lyenu. Ntjuvenu mpentjande nikakukarere mwedi mbiri, nishapuke niyende nakukaghurumuka mumandundu mukukalira udona wande, name na vaunyande.'' ³⁸ Avamutantere, ''Yenda.'' Amutumu ayende mwedi mbiri. ghuye avashuvu, ghuye na vaunyendi, nakukalira udona wendi mumandundu. ³⁹ Kughuhura wamwedi mbiri akavyuka kuvashe, ovo vamuruwanino kutwara mulitwenyidiro olyo atulire mumaghano. Ghuye kapi aviayivire mukafumu, ano vino avikara ngoli mpo muIsraeli ⁴⁰ ashi vakadona va vaIsraeli kehe uno mwaka, mumayuva mane, mukuvitanturura vitimwitira vya mona-kadona wa Jefuta muGileyeda.