¹ Makura mbunga ya Israeli ayikara yira muntu umwe, kutundilira ku Dana dogoro ku Beresheba, kumwe nashirongo sha Gileyada nasho, ano nko kuya ponga pamwe kumeho ya Karunga pa Mizipa. ² Vayenditi vambunga nayintje, varudi naruntje rwa Israeli, avakara mumavango ghavo mukuponga kwa mbunga ya Karunga - 400, 000 vakafumu vaparupadi, ovo vanakuwapayikiro mukurwa namarufuro. ³ Ano mbunga ya Benyameni avayiyuvhu ashi mbunga ya Israeli kayiyendi kuMizipa. Mbunga ya Israeli ayighamba, ''Tutantere ashi weni mo vyashoroka vihuna vino.'' ⁴ MuLevi, nturaumbo ya mukamali ogho vadipaghire, alimburura, ''Ame kwayire muGibeya mushirongo shahameno ku vaBenyameni, name nashihora shande, tukarare mo matiku.'' ⁵ Matiku ogho, vayenditi va Gibeya avahomokere, avakundurukida ndjugho, mukushana vandipaghe, Ava kwatere shihora shande kunkondo, kumwe nakufa. ⁶ Ani ghupu shihora shande nakushitetaghura mumaruha, ano nko kughatuma kumaruha gha shirongo gha upingwa wa Israeli, munkondo yakuruwana vihuna ovyo navifita ntjoni mu Israeli. ⁷ Ngoli, namuvantje vaIsraeli, kupenu maghano ghenu nakukutantera mpopa.'' ⁸ Mbunga nayintje ayishapuka yira muntu umwe nakughamba, ''Kwato umwe wetu ayendo kutende yendi, ano kwato nka umwe wetu avyuko kundjugho yendi! ⁹ Ngoli pano vino mbyo tunahepa kukaruwana kuGibeya: Tukashihomone momo yinakututwalidira fungu-fungu. ¹⁰ Kutughupa vakafumu murongo movalifere mwayendo rudi naruntje rwa Israeli, ano ano lifere limwe movaliyovi, na valiyovi limwe mova mayovi murongo, vakurenka vatapere mbunga yino , makura opo vakaya kuGibeya mu Benyameni, vavo makura vakavafutite kuvihuna ovyo ovyo varuwana muIsraeli.'' ¹¹ Makura vakafumu navantje vavaIsraeli avakupongayiki mukurwanita shitata yira muntu umwe. ¹² Marudi gha vaIsraeli avatumu vakafumu mwayendo rudi rwa Benyameni naruntje, avatanta, ''Vihuna munke mwaruwana mukatji kenu? ¹³ Ano ngoweyo, tupenu ovo vantu vavadona muGibeya, makura atwe tuvadipaghe, ano makura tughupilire mo udona uno muIsraeli.'' Ngoli vaBenyameni kapi vategherelire kuliywi lyavakuru vavo, mbunga yaIsraeli. ¹⁴ Ngoli vana vaBenyameni ava rupuka navantje pamwe muvitata vaye kuGibeya mukuya kuwapayika mukurwita vana vaIsraeli. ¹⁵ Mbunga ya Benyameni ayiya nayintje pamwe vatunde muvitata vyavo mukurwana muliyuva olyo vakavita mayivi dimurongo mbiri na ntayimwe ovo vakushongero kurwana marufuro. Mukuwedererako, kwakalire vakafumu mafere ntambiri ovo vatogholire vatungimo va muGibeya. ¹⁶ Movo vakavita navantje kwakalire mo vakafumu mafere ntambiri varumontjo. Navantje vakunonga ruhuki naliwe ano ngoli nakushekuna shi. ¹⁷ Mbunga ya Israeli, mukudira kushetakanita ku vaBenyameni, shivaro sha vakafumu 400,000, ovo vakushongero kurwa na marufuro. Navantje vano vakafumu mapenda. ¹⁸ Mbunga ya Israeli ayishapuka, mukuyenda ku Beteli, nakukapura livyukito kwa Karunga. Ava pura, ''Are wakuvhura muhovo kuhomona mbunga ya Benyameni kuruha rwetu?'' Karunga aghamba, ''Juda ndje wakuvhura kuhomona muhovo.'' ¹⁹ Vana va Israeli avashapuka ngurangura nakutwara ntanda yavo pepi na Gibeya. ²⁰ Vakafumu vavaIsraeli avayendi vakarwite va Benyameni. Avatura livango lya marwanambo mukuvarwanita pa Gibeya. ²¹ Mbunga ya Benyameni ayirupuka mo muGibeya, ano nko kudipagha vakafumu mayovi dimurongo mbiri na mbiri vavaIsraeli muliyuva olyo. ²² Makura vakafumu vavaIsraeli avakupameke naumwavo nakukatura mutunda wa marwanambo mulivango shimpe ndyolyo olyo akalire marwanambo muliyuva lyamuhovo. ²³ Makura mbunga ayikanduka nakukalilira kumeho ya Karunga dogoro ngurova, nakushana luvyukito kwa Karunga. Avaghamba, ''Kuvhura nka shimpe tukarwane na vaghuni vetu, mbunga ya Benyameni ndi?'' Karunga aghamba, ''Kavahomonenu!'' ²⁴ Makura mbunga ya Israeli ayiyendi vakarwe na vakavita va vaBenyameni liyuva lyauviri. ²⁵ Muliyuva lyauviri, vaBenyameni avarupuka mukurwana navo kuGibeya nakukadipagha vakafumu mayovi ntantatu vamumbunga ya Israeli. Navantje kwakalire vakafumu ovo vakurongero kurwa narufuro. ²⁶ Makura mbunga nayintje ya Israeli, mbunga nayintje, avakanduka kuBeteli nakukalira, ano avkashungira kumeho ya Karunga nakudililira muliyuva olyo dogoro ngurova nakudjamba ndjambo yakushwakerera na ndjambo ya mbili kwa Karunga. ²⁷ Mbunga yaIsraeli ayipura Karunga - shasho shikesha sha makugwanekero sha Karunga mposhili momo mumayuva ogho, ²⁸ ano Pinehasi, mona Eliyazara wa mukafumu Eliyazara wa Aroni, ndje akaliro mughukareli wakumeho ya Shikesha mumayuva ogho - ''Kuvhura tuyende kuvita shimpe nka vyakurwanita mbunga ya Benyameni, vaghuni vetu, ndi tushayeke?'' Karunga aghamba, ''Kahomonenu, mukondashi yona nganimuvatera mukuvafunda.'' ²⁹ Makura vaIsraeli avatura vakafumu mumavango gha lihorameno vakundurukide Gibeya. ³⁰ Mbunga ya Israeli ayirwanita mbunga ya Benyameni muliyuva lyautatu, ano nko kutulitapo virwana vyadimukweyo mukurwanita Gibeya yira momo vaviruwanine pamuhovo. ³¹ Mbunga ya Benyameni avayendi nakukarwana nayo mbunga, ano nko kuvatwara ure nashitata. Avatameke kudipagha vantu vamwe. Vavo kwakalire kuviha dimurongo ntatu da vakafumu va vaIsraeli ovo vafiro mumafuva na muvitaghura. Muvitaghura vimwe vyayendo dogoro ku Beteli, ano nevi vyayendo ku Gibeya. ³² Makura mbunga ya Benyameni ayi ghamba, ''Tunavafundu nakutuduka, yira rwa muhovo.'' Ngoli mbunga ya Israeli ayi ghamba, ''Tutjirenu nakuvaghupako tuvatware ure na shitata dogoro kuvitaghura.'' ³³ Vakafumu va vaIsraeli navantje avayimana mumavango ghavo nakukutura vavene mumukweyo wa virwana pa Bala Tamara. Makura mbunga ya Israeli ovo vabatiro mumavango gha mukaholya-holya ava duka mo mumavango ghavo vatunde mu Mare Gibeya. ³⁴ Avatundumo vayarwanite Gibeya vakafumu mayovi murongo ovo vatogholire mo mu vaIsraeli navantje, ano virwana aviditopa, ngoli va Benyameni kapi vavidimbulire ashi virwana vina shana kuvamanapo. ³⁵ Karunga afundu va Benyameni kumeho ya Israeli. Muliyuva lyo, mbunga ya Israeli kwadipaghire 25,100 va Benyameni. Navantje ovo vadipaghire mbovo ovo vakushongero kurwa narufuro. ³⁶ Makura mbunga ya Benyameni avavikenge ashi vanavafundu. Vakafumu va vaIsraeli kwayendire kuntji ya vaBenyameni mukondashi vavo kwavarwire pa vakafumu ovo vatulire mu mavango gha ghuvando pandje ya Gibeya. ³⁷ Makura vakafumu ovo vavandiro avashapuka na kukwangura muku mukuvadukira mu Gibeya, ano nko kuhomona shitata nashintje na rufuro rwa ghutwe. ³⁸ Avatulitapi shiyivito sha vakafumu va vaIsraeli na vakafumu ovo va vandiro mulihorameno ashi kulikara liremo lyalinene lya muti olyo lindjumburuko litundo mushitata. ³⁹ Opo vashitumine shiyivito ku vakafumu va vaisraeli avapiruka mukurwana. Ngoli va Benyameni vavo vanavareke kuvahomona na kudipagha vakafumu va vaIsraeli vakutika kuviha dimurongo ntatu, ano nko kughamba, ''Vyaushuri tunavafundu kumeho yetu, yira vita vya muhovo.'' ⁴⁰ Makura opo lyayokomokere mo ngundi yamuti litunde mushitata, va Benyameni ava piruka bnakukenga muti una kuyendo muwiru una kutundo mushitata nashintje. ⁴¹ Makura vakafumu va vaIsraeli avapiruka nakurwana navo. Vakafumu va vaBenyameni avakara nashitukutjima, mukondashi vavikenire shi lidipagho lyalinene linakaro kukwavo. ⁴² Makura avaduka vatunde kuvakafumu va vaIsraeli, avatjayukiri vadukire mumburundu. Ano ngoli virwana avi vamanenenepo. Vakafumu va vaIsraeli avarupuka mo mushitata nakuvadipagha opo vakayimanine. ⁴³ Avakundurukida va Benyameni, avavatjida nakukulyatanga pa Noha, mundjira nayintje yakuyenda kuupumeyuva wa ruha rwa Gibeya. ⁴⁴ Kuruha rwa rudi rwa Benyameni, kwafire ko vantu mayovi murongo ntantatu, navantje vakafumu vayivikwi muvita. ⁴⁵ Avavyuka nakutjilira mumburundu vadukire kuliwe lya Rimoni. VaIsraeli avadipagha nka pamayovi matano gha vaBenyameni mwayendo vitaghura. Avatwikiri yakuvashupura, kuvakwama pepi mundjira nayintje ya kuGidomu, nakudipaghapo shimpe nka waro mayovi maviri. ⁴⁶ Vakavita navantje va Benyameni ovo vafiro liyuva olyo kwakalire mayovi dimurongo mbiri na ntano - vakafumuovo vakurongero kurwa narufuro, navantje ovo kwakalire vayivikwi muvita. ⁴⁷ Ngoli vakafumu mafere ntayimwe avapiruka nakutjwayukira mumburundu, yakuvyuko naliwe lya Rimoni. Vavo kwakalire po mwedi ne paliwe lya Rimoni. ⁴⁸ Vakafumu va vaIsraeli avakavyuka mukurwanita vana va Benyameni ano mundjira yavo omo ava homona na rufuro rwa utwe, shitata, kutura ko na vimuna na kehe vino vawanine. Vavo kwasholire kehe yi doropa mundjira yavo.